Salmos 58 - Tayta Diosninchi Isquirbichishan

Alli arriglananpaj Tayta Diosta mañacushan

David isquirbishan alabansa.

¹ Munayniyojcuna, ¿rasunpachu alli cajta rurarcaycanqui? ¿Allichu arreglaycanqui runacunata?

² Manami. Mana allita rurayllatami yarparcaycanqui. Chayno rurarmi gamcunaga caminuta goycanqui cay pachacho runacuna chiquinacunanpaj.

³ Fiyu runacunaga manaräpis yurillarnami fiyu. Mamanpa pachancho caycällarnami llulla.

⁴ Chay runacunaga benënuyoj culebranömi carcaycan, rinriynaj culebra mana wiyajnömi,

⁵ majiquërucuna upayächinanpaj tucapaptinpis mana wiyajnömi.

⁶ Tayta Dios, ¡quiruncunatapis amirgäriy! Tayta Dios, ¡chay liyuncunapa agärancunata paquirgäriy!

⁷ Guemarisha yacu chaquejnöpis illgacäcuchun. Näni cantuncunacho guewa chaquejnöpis illgacäcuchun.

⁸ Rashta chullojnöpis illgacäcuchun. Achicyaj pachata shullu mana ricashanno quëdachun.

⁹ Cashatanöpis ruparachichun manaräpis cuentata gocuptin. Jachata achurishanno illgarachichun.

¹⁰ Tayta Diosta wiyacojcunaga cushicongami chiquejcunata wañushata ricashpan. ¡Chaquincunatapis fiyucunapa yawarninwanrämi mayllanga!

¹¹ Chayrämi llapanpis nenga: «¡Tayta Diosta wiyacuymi alliga! ¡Cay pachacho canmi Dios llapanta jusgananpaj!» nir.