Salmos 47 - Tayta Diosninchi Isquirbichishan

Tayta Dios ray cashan

Corëpita mirajcuna isquirbishan alabansa.

¹ Llapayqui runacuna, cushicushpayqui macshupäcuy. Tayta Diosta alabay.

² Llapanpitapis mas janajcho caycaj Tayta Diosga manchacunami. Paymi mas munayniyoj ray cay munducho caycajcunapäga.

³ Paymi yanapämashcanchi marcacunapis nasyuncunapis munaynincho cananchïpaj.

⁴ Acrashan runacuna captinchïmi Tayta Diosga cuyamanchi. Chaymi aunimashanchi chacratapis goycamashcanchi. Chay chacrachömi Jacobpa caj famillyancunaga cushisha goyanchi. Selah

⁵ Tayta Diosga cushicushpanmi janajman wichasha. Trompëtacunata tucaycaptinmi tiyananman yaycusha.

⁶ Diosta alabar llapayqui cantay. Rayninchïpaj alabansacunata cantay.

⁷ Tayta Diosmi cay pachacho cajcunapaga Raynin. Salmuta cantar llapan shongunchïwan payta alabashun.

⁸ Tayta Diosmi llapan nasyuncunapa Raynin. Tayta Diosga jamaraycan rispitädu jamacunancho.

⁹ Nasyuncunapa mandajnincunapis Abrahampita mirajcunata Tayta Dios acrashan runacunawanmi shuntacan alabananpaj. (10) Chaynöga carcaycan nasyuncunapa mandajnincunapis Tayta Diospa munaynincho cashpanmi. Tayta Diosga llapanpitapis mas munayniyojmi.