Salmos 4 - Tayta Diosninchi Isquirbichishan

Tayta Diosta chacaypa mañacushan

Cay salmoga David isquirbishanmi. Cuerdasniyoj instrumentuta tucar cantananpämi caycan.

¹ Conträcunapita chapämaj Tayta Diosnë, ¡mañacamuptë yanapaycamay ari! Llaquicuycaptë gamga shacyächimarayquimi. ¡Cananpis cuyapämashpayqui wiyaycamay ari mañacamushäta!

² Munayniyoj-tucoj runacuna, ¿imaycamaraj manacajman churaycämanqui? ¿Imaycamaraj manacajcunallata ashircaycanqui? ¿Imaycamaraj llullacuyllata munarcaycanqui? Selah

³ Tantiyacuy-llapa, Tayta Diosga mandamintunta cumlejcunallatami cuyan. Tayta Diosga mañacuptë wiyamanmi.

⁴ ¡Manchapacuy-llapa! ¡Juchata ama ruraychu! Imata ruranayquipäpis cämayquicho wegurashayqui öra yarpachacuy. Selah

⁵ Llutan yarpashayquicunata cacharir Tayta Diosta wiyacur caway-llapa. Tayta Diosllaman yäracuypis.

⁶ Achcajmi nircaycan: «¿Piraj alli cawayta tarichimäshun?» nir. ¡Tayta Dios, alli ñawillayquipa nogacunaman ricäramuy ari!

⁷ Aypalla rïguyojpitapis, aypalla bïnuyojpitapis masrämi gamga shongöta cushicachinqui.

⁸ Nogaga jaucami puñucöpis. Tayta Dios gamman yäracushpämi cushishallana cawä.