Salmos 37 - Tayta Diosninchi Isquirbichishan

Fiyu runacuna imano cashanpis Álef

David isquirbishan alabansa.
Álef

¹ Fiyu runacuna-jananga ama rabyacuychu. Fiyu runacuna charashantapis ama munapaychu.

² Paycunaga guewa chaquejnöpis rätumi ushacäcun. Llullu guewa wañuytacäcojnömi ruracäcun.

Bet

Bet

³ Allillata rurashpayqui Tayta Diosllaman yäracuy. Cay pachacho goyashpayqui Tayta Dios munashannölla caway.

⁴ Cushishalla Tayta Diostaga sirbiy. Paymi llapan munashayquita tarichishunquipaj.

Guímel

Guímel

⁵ Tayta Diospa maquincho cachun bïdayquega. Payllaman yäracuptiquega yanapäshunquipämi.

⁶ Chauraga Diosmi allita ruraj cashayquita ricacächenga. Alli runa cashayquitana pï-maytapis musyachenga.

Dálet

Dálet

⁷ Tayta Diospa ñaupanchöga upällalla cacuy. Pay yanapäshunayquita shuyaray. Ama rabyapaychu alli cayman chayajcunata, ni mana allita rurayta yarpajcunatapis.

He

He

⁸ Fiyucuna-jananga ama rabyashalla cacuychu. Rabyaga mana allimanmi chayachishunquipaj.

⁹ Fiyucunataga Tayta Diosmi illgächenga. Tayta Diosman yäracojcunallanami alli pachacho cawanga.

Vav

Vav

¹⁰ Manapis aycällatanami fiyucunaga illganga. May-jina ashirpis mananami tarinquipänachu.

¹¹ Umildicunami ichanga alli pachacho tiyanga. Tayta Diosmi jauca goyächenga.

Zayin

Zayin

¹² Fiyucunaga alli runacunata mana alliman chayachiytami yarpan. Fiyu ñawillanwanmi ricapanpis.

¹³ Tayta Diosmi ichanga paycunapaj asicun. Musyaycannami fiyucuna illgänanpaj cashanta.

Jet

Jet

¹⁴ Fiyucunaga sablinta, lëchanta, lëcha jitacunanta camaricun pobricunata, alli runacunata wañuchinanpaj.

¹⁵ Ichanga quiquinpa sablillanmi shongupa tucsipaycongapaj. Lëchancunapis agullashami ricacongapaj.

Tet

Tet

¹⁶ Aypallata chararpis fiyu runa cananchïpa ruquenga pobrilla carpis alli runa caymi mas alliga.

¹⁷ Fiyucunapataga callpantapis ushajpämi Tayta Dios ushacächenga. Allicunatanami ichanga yanapanga.

Yod

Yod

¹⁸ Alli runacunataga Tayta Dios waran-waranmi ricaycan. Paycunaga chasquengapaj imaypis mana ushacajtami.

¹⁹ Llaquicuy junajcunachöpis paycunaga manami pengaycho cangachu. Muchuy wichanpis paycunapaga micuynin puchu-puchumi caycangapaj.

Caf

Caf

²⁰ Fiyucunaga ushajpämi illgangapaj. Tayta Diosta chiquejcunaga gaushusha jachanömi rupanga. Goshtaynömi illgacäconga.

Lámed

Lámed

²¹ Fiyucunaga ristacurcurpis manami päganchu. Alli runami ichanga cuyapäcoj cashpan pï-maytapis macyaycun.

²² Tayta Dios bindisyunta goshan cajcunallami alli pachachöga tiyanga. Pay maldisyunta goshan cajcunami ichanga illganga.

Mem

Mem

²³ Tayta Diosmi runataga alli caminullapa pushan. Allilla goyaptin Tayta Diosga cushicunmi.

²⁴ Chay runaga Tayta Dios pushaptinmi tunirpis jatarenga.

Nun

Nun

²⁵ Unay mösu cashä wichanpis, canan auquinna cashäcamapis manami ricashcächu alli runa pishipacaycho goyajtaga. Ni wamrancunapis manami mañapacur purishachu.

²⁶ Alli runacunaga imaypis cuyapäcunmi. Chaymi pitapis ristaycun. Wamrancunapis bindisyunyojmi canga.

Sámej

Sámej

²⁷ Llutancunataga ama ruraychu. Allillata ruray. Chauraga Tayta Dios aunishushayqui pachallachömi tiyanquipaj.

²⁸ Tayta Diosga cuyan allita rurajtami. Pay munashannölla cawajcunataga manami gonganchu. Juchasapacunatami ichanga illgächin. Chaynöpami paycunapaga wamrancunapis mana cangachu.

Ayin

Ayin

²⁹ Alli runacunami ichanga alli pachacho tiyanga. Chayllachömi imaycamapis goyäconga.

Pe

Pe

³⁰ Tayta Diosman yäracoj runaga sumaj yarpachacurcurmi riman. Alli runaga alli cajllatami parlan.

³¹ Tayta Dios yachachishallantami yarparan. Manami mana allimanga chayanchu.

Tsade

Tsade

³² Fiyu runaga michipaycanmi alli runata wañuchiyta yarpapashpan.

³³ Chaypis Tayta Diosga manami camacächengachu fiyu runapa maquinman chayanantaga; pipis «payga juchayojmi» ninantapis.

Qof

Qof

³⁴ Gamga Tayta Diosllaman yäracuy. Payllata wiyacuy. Paymi alliman chayachishunquipaj. Aunishushayqui alli pachatapis goycushunquipaj. Ñawiquiwanmi ricanquipaj fiyu runacunata illgächejtapis.

Resh

Resh

³⁵ Fiyucunataga ricashcä rabyar fiyupa alli-tucojtami. Rämasapa jacha tunir may-maypa chayashannömi chayasha.

³⁶ Chayno caycashanpitami illgacäcusha. Chauraga ashirpis mananami tarishcänachu.

Shin

Shin

³⁷ Masqui ricay juchaynaj runata, Dios munashanno goyaj runata. Chay runaga shamoj watacunacho allillami goyanga.

³⁸ Mana wiyacoj cajcunami ichanga ushajpaj ushacanga. Fiyucunaga shamoj watacunacho llapanmi illganga.

Tav

Tav

³⁹ Alli runacunataga Tayta Diosmi yanapan. Ñacaycuna caycaptinpis Tayta Diosmi pacan.

⁴⁰ Tayta Diosmi imanöpapis gueshpichin. Tayta Diosman yäracuptinmi fiyucunapitapis salban.