Salmos 34 - Tayta Diosninchi Isquirbichishan

Alli cashanpita Tayta Diosta alabana Álef

Davidga Abimelecpa ñaupancho artita rurar löcu-tucuran. Chaymi Abimelec garguran. Chay wichan imanöpis päsashanpitami David isquirbiran cay alabansata.
Álef

¹ Tayta Diostaga imay örapis alabaycäshämi. Shimillächömi alabansacuna caycanga payta alabanäpäga.

Bet

Bet

² Tayta Diospitami fiyupa cushisha caycä. Umildi runacunapis wiyashpayqui cushicuy.

Guímel

Guímel

³ Tayta Diosta nogawan iwal agradësicushun. Munayniyoj Tayta Diosta llapanchi alabashun.

Dálet

Dálet

⁴ Ruwacuptë Tayta Diosga wiyamashami. Chaynöpami salbamasha llapan manchacuycashäpitapis.

He

He

⁵ Tayta Diosllaman ricarajcunaga cushishami carcaycan. Paycunaga imaypis manami pengaycho cangachu.

Sayin

Sayin

⁶ Llaquicur gayacuptë Tayta Diosga wiyamashami. Llapan llaquicuycunapitami jorgamasha.

Jet

Jet

⁷ Tayta Diospa anjilninmi salban chapan Tayta Diosta rispitajcunataga.

Tet

Tet

⁸ Tayta Dios fiyupa alli cashanta musyanayquipaj masqui camay. Cushishami cawanga payman yäracojcunaga.

Yod

Yod

⁹ Tayta Diosta rispitay pay acrashan cajcunaga. Payta rispitajcunataga manami imapis pishengachu.

Caf

Caf

¹⁰ Rïcucunapis pobriyar muchupacarga yarganmi. Tayta Diosman yäracojcunapaga manami ima-aycanpis pishengachu.

Lámed

Lámed

¹¹ Wamräcuna, shamuy wiyamänayquipaj. Tayta Diosta rispitaytami yachachishayqui.

Mem

Mem

¹² Gamga ¿unaycama cawaytachu munanqui? ¿Cushisha goyaytachu munanqui?

Nun

Nun

¹³ Chauraga llutancunata ama rimaynachu, ama llullacuynachu.

Sámej

Sámej

¹⁴ Mana allita ama ruraynachu. Allillatana ruray. Piwanpis allilla goyay.

Ayin

Ayin

¹⁵ Alli runacunataga Tayta Dios allimi rican. Mañacushancunatapis wiyanmi.

Pe

Pe

¹⁶ Mana allita rurajcunapami ichanga Tayta Dios contran caycan. Paycunataga ushajpämi cay pachapita illgächenga.

Tsade

Tsade

¹⁷ Allillata ruraj runacunataga Tayta Dios yanapanmi. Ima llaquicuycho caycashanpitapis jorgunmi.

Qof

Qof

¹⁸ Jucha rurashanpita llaquicuycajcunapa ñaupanchömi caycan Tayta Diosga. Llaquicuycajcunatapis salbanmi.

Resh

Resh

¹⁹ Allillata ruraj runacunataga imapis mana allicunarämi chayan. Chaycunapitaga llapanpitapis Tayta Diosmi salban.

Shin

Shin

²⁰ Tayta Diosmi tulluncunatapis rican. Chaymi juc tullullanpis mana paquengachu.

Tav

Tav

²¹ Fiyu runacunamanga quiquin mana allita rurashallanmi chayan. Allita ruraj runacunata chiquëga castigashami canga.

²² Tayta Diosga salbanmi payman yäracojcunata. Manami castigangachu.