Salmos 3 - Tayta Diosninchi Isquirbichishan

Yanapänanpaj Tayta Diosta mañacushan

Wamran Absalonpita gueshpir aywacur David rimashan.

¹ Tayta Dios, chiquimajcunaga achcajmi. Aypallajmi conträga ricacusha.

² ¡Nogapäga achcajmi nircaycan «Diosga manami salbangachu» nir! Selah

³ Chayno niptinpis Tayta Dios, gammi imapitapis chapämanqui. Gammi shacyächimanqui. Gammi cushicachimanqui.

⁴ Gaparayparämi Tayta Diostaga mañacö yanapämänanpaj. Chaura rispitädu Sionpita wiyamushpanmi yanapäman. Selah

⁵ Tayta Dios yanapämaptinmi jauca puñucö, jauca ricchamö.

⁶ Manami manchachimanchu chay aypalla suldärucuna intërupa curalaparaycämashanpis.

⁷ ¡Aywashun, Tayta Dios! ¡Salbaycamay ari! Chiquimajcunataga gammi cärachu lagyanquipaj. ¡Juchasapacunataga quiruncunatapis jorgupanquipaj!

⁸ Tayta Dios, gammi pitapis salbanqui. ¡Acrashayqui runacunataga bindisyunta goycullay ari! Selah