Salmos 28 - Tayta Diosninchi Isquirbichishan

Mañacushanchïta Tayta Dios wiyan

David isquirbishan alabansa.

¹ Tayta Dios, gamllami canqui gaganöpis chapämaj. Gamllatami ruwacur mañacaycämö. Ama caychu mana wiyaj-tucuypaga. Mana yanapämaptiquega wañusha japuynami ricacushaj.

² Mañacamuptë yanapaycamay ari. Rispitädu tiyanayquiman maquëta jogarir mañacamuptë wiyaycamay ari.

³ Fiyucunatawan iwalga ama castigamaychu. Paycunaga janan shongullami alli parlaj-tucun. Ichanga jucha rurayllapämi yarparcaycan.

⁴ Paycunataga castigay ari mana allita rurashanman-tupu. Juchata rurashanman-tupu ayñita cutichiy.

⁵ Chay fiyucunataga Tayta Dios ushajpämi illgächenga Tayta Dios imata rurashantapis mana riguishanpita.

⁶ Tayta Dios alabasha caycuchun. Llapan mañacushäta wiyamashanpita alabasha caycuchun.

⁷ Tayta Diosmi fiyupa munayniyoj chapämäga. Paymanmi llapan shongöpa yäracö. Paymi yanapäman. Chaypitami fiyupa cushisha goyä. Chaymi Tayta Diosta agradësicur alabashaj.

⁸ Tayta Diosmi acrashan runacunata imapitapis chapäga. Paymi acrashan raytapis yanapan, imapitapis chapan.

⁹ Acrashayqui runacunata salbay Tayta Dios. Gam acrashayqui cajcunataga bindisyunta goycullay. Uyshërunöpis sumaj ricaycullay. Margashalla apaycuy imaycamapis munayniquicho goyänanpaj.