Salmos 25 - Tayta Diosninchi Isquirbichishan

Yanapänanpaj Tayta Diosta mañacushan Álef

David isquirbishan alabansa.
Álef

¹ Tayta Dios, gammanmi mañacamö.

Bet

Bet

² Tayta Dios gammanmi yäracamö. Pengaycho canätaga ama camacächiychu. Chiquimajcunapis ama cushipämächunchu.

Guímel

Guímel

³ Gamman yäracamoj cäga ama pipis pengaychöga cachunchu. Pengaychöga cachun mana ashipaycaptiqui contrayqui jatarejcuna.

Dálet

Dálet

⁴ Tayta Dios, näniquita ricachimay. Ruranäta munashayquino yachachimay.

He

He

⁵ Yachachimay ricachimay rasun cajta. Gamllami canqui Salbamaj Tayta Diosnëga. Imay örapis gamllamanmi yäracaycämö.

Vav Zayin

Zayin

⁶ Tayta Dios, para-simri cuyapäcoj cashayquita, alli cashayquita yarpaycuy ari.

Jet

Jet

⁷ Jucha rurashäcunata ichanga ama yarpaycuychu. Mösu car mana allita rurashäta gongaycuyna. Tayta Dios, fiyupa cuyapäcoj alli car yarpaycamay ari.

Tet

Tet

⁸ Tayta Diosga allimi y juchaynajmi. Chaymi juchayojcunataga alli nänita ricachenga.

Yod

Yod

⁹ Umildicunataga tantiyachinmi. Allillata rurananpämi yachachin.

Caf

Caf

¹⁰ Tayta Diosga mandamintuncunata cumlejcunata cuyapanmi, aunishantapis cumlinmi.

Lámed

Lámed

¹¹ Tayta Dios nogapa juchäga aypallami. Gam alli cashayquita parlananpaj perdunaycamay ari.

Mem

Mem

¹² Tayta Diosga payta rispitaj runata quiquinmi yachachin imano cawananpäpis.

Nun

Nun

¹³ Chaura cay bïdachöpis juc bïdachöpis allillami goyanga. Wamrancunanami chacranwanpis quëdanga.

Sámej

Sámej

¹⁴ Tayta Diosga rispitajcunapa amïgunmi. Parlacur aunishantapis musyachinmi.

Ayin

Ayin

¹⁵ Imay örapis Tayta Diosllamanmi yäracuycä ima mana allicunapitapis chapämaj captin.

Pe

Pe

¹⁶ Tayta Dios, cuyapaycamay ari. Japallämi y llaquishami caycä.

Tsade

Tsade

¹⁷ Shongöga masta mastami ushaycan. Mana llaquicunäpaj yanapämay ari.

¹⁸ Masqui ricäramaypis. Fiyupa llaquishami caycä. Juchäcunapita perdunaycamay ari.

Resh

Resh

¹⁹ Masqui ricäriypis, imano aypallashi carcaycan chiquimajcunaga. Fiyupa chiquimarmi wañuchimayta yarparcaycan.

Shin

Shin

²⁰ Paycunapitaga salbaycamay ari. Ama camacaycachiychu pengaycho canätaga. Gamman yäracaycämuptëga ama camacaycachiychu wañuchimänanta.

Tav

Tav

²¹ Nogaga gamllamanmi yäracamö. Allillata ruranäpaj tantiyaycachimay ari.

²² Tayta Dios, Israelcunataga llapan llaquicuycashanpita salbaycuy ari.