Salmos 24 - Tayta Diosninchi Isquirbichishan

Llapanpaj munayniyoj Tayta Dios cashan

David isquirbishan alabansa.

¹ Tayta Diosllapami cay munduga, chaycho caycajcunapis llapan cawaycajcunapis.

² Tayta Diosmi cay pachata camacächisha lamar jananman. Y sumaj tacyachisha mayucuna jananman.

³ ¿Piraj chayanman Tayta Dios acrashan jircaman? ¿Piraj yaycunman Tayta Diospa wasinman adurananpaj?

⁴ Chayangaga juchata mana ruraj cajllami, alli shongu cajllami, ïdulucunata mana aduraj cajllami, llullacuypa mana juraj cajllami.

⁵ Paycunataga salbacoj Tayta Dios bindisyuntami gonga, allimi ricangapis.

⁶ Chayno alli car-rämi cawanan Tayta Diosta sirbiyta munajcunaga, Jacobpa Diosninpa ñaupancho goyayta munajcunaga. Selah

⁷ Munayniyoj Ray päsananpaj, ¡quichay puncucunata! ¡Unay puncucunataga ushajpaj quichay!

⁸ ¿Pitaj munayniyoj Rayga? ¡Jinyu fiyupa callpayoj Tayta Diosmi! ¡Guërracho binsej Tayta Diosmi!

⁹ ¡Munayniyoj ray päsananpaj quichay puncucunata! ¡Unay puncucunataga ushajpaj quichay!

¹⁰ ¿Pitaj munayniyoj Rayga? ¡Munayniyoj Tayta Diosllami! ¡Payga Munayniyoj Raymi! Selah