Salmos 20 - Tayta Diosninchi Isquirbichishan

Binsinanpaj mañacushan

David isquirbishan alabansa.

¹ Tayta Dios, yanapaycushunqui ari ñacaycashayqui öra. Jacob rispitashan Dios washaycushunqui ari.

² Sioncho caycaj Wasinpita washäshushpayqui yanapaycushunqui.

³ Tayta Dios yarpaycuchun ofrenda garashayquicunata. Rupachishayqui uywacunapa aychantapis alli chasquiycuchun. Selah

⁴ Munashayquicunata Tayta Dios tariycachishunqui. Llapan yarpashayquicunata camacaycachichun.

⁵ Chauraga binsishayquipita cushicushunmi. Bandëracunatapis ichichishaj Tayta Diospa jutincho. Mañacushayquitaga Tayta Dios llapanta camacaycachichun.

⁶ Nogaga musyämi acrashan rayta Tayta Dios yanapänanpaj cashanta, tiyashan rispitädu syëlupita-pacha wiyamunanpaj cashanta, munayninwan salbananpaj cashantapis.

⁷ Waquenga yäracun pillyapaj caj carrëtancunaman. Waquenga yäracun pillyapaj caj cawalluncunaman. Noganchïmi ichanga yäracunchi Tayta Diosnillanchïman.

⁸ Paycunaga tunengami. Noganchïmi ichanga jatarcur ichirpaycäshun.

⁹ Tayta Dios, rayta yanapaycuy binsinanpaj. ¡Mañacamuptëcunapis yanapaycamay ari!