Salmos 16 - Tayta Diosninchi Isquirbichishan

Tayta Diosmi cawachimanchi

David isquirbishan.

¹ Tayta Dios, gammanmi yäracamö. ¡Chapaycamay ari!

² Nogaga gamta nishcä: «Gammi canqui nogapa Tayta Diosnë. Gampita mas jucga manami nogapaj ima allipis canchu.»

³ Cay nasyuncho caycaj dioscunaga munayniyojshi. Chaynömi nin chayman yäracojcuna,

⁴ ïduluta rurajcuna, fiyupa rispitar yäracojcunapis. ¡Nogami ichanga ïdulucunata imaypis mana adurashächu! ¡Jutincunatapis manami ni rimayllapis rimarcushächu!

⁵ Tayta Dios, gammi erensyä canqui; sumaj bindisyunta gomanqui. Nogaga gampa munayniquichömi caycä.

⁶ Nogataga mas alli cajmi töcamasha. ¡Nogapa partisyunnëga casha fiyupa alli cajmi!

⁷ Tayta Diostaga alabashämi imano goyänäpäpis pay tantiyachimashanpita. Shongullächo yarpashäcunatapis chacaycunapami tantiyachiman.

⁸ Imaypis Tayta Diostaga yarparaycämi. Pay lädöcho captenga imapis manami chayamangachu.

⁹ Chaymi, fiyupa cushisha caycä. Tayta gam yanapämaptiqui jaucami goyäshaj.

¹⁰ Wañojcuna pamparashanchöga ama cachaycamanquichu. ¡Sepultürachöpis ama cachaycunquichu acrashayquitaga!

¹¹ Mana ushacaj cawayta tarinäpämi ricachimanqui. Gampa ñaupayquichöga amatar cushicuyllami, imaycamapis alli goyayllami.