Salmos 142 - Tayta Diosninchi Isquirbichishan

Gammi canqui pacacunä

David yachachishan alabansa. Machaycho caycashpanmi mañacuran.

¹ Sinchi gayacuypami Tayta Diosta mañacushcä. Callpaypa gayacurmi cuyapämänanpaj ruwacushcä.

² Paymanmi quijacuycä. Paytami musyaycächë imapita llaquicuycashätapis.

³ Paytami willapä fiyupa llaquisha caycashätapis. Tayta Dios, gamga musyanquimi imano goyaycashätapis. Mana alliman chayanäpämi togllacunata churapämasha.

⁴ Derëchu caj-lädöpami ricachacö. Pitapis manami ricächu yanapämaj shamojta. Pipis manami canchu washämaj. Nogapäga manami pipis yarpärinchu.

⁵ Gamtami mañacamö Tayta Dios. Mañacamushpämi cayno në: «Gammi canqui pacacunä. Gamllami cay bïdachöga cawachimanqui» nir.

⁶ Wiyaycamay ari gaparaypa mañacamushäta. Balurnë manami cannachu. Gaticachämajcunapitaga pacaycamay ari. Paycunaga nogapita mas callpayojmi.

⁷ Carsilcho caycajno caycashäpita jorgaycamay. Cayno llaquicuycashäpita jorgaycamay gamta alabanäpaj. Chaypitaga alli runacuna cushicushpanmi nogawan goturpanga.