Salmos 14 - Tayta Diosninchi Isquirbichishan

Jucha rurayllacho runa cashan

David llaquicur isquirbishan.

¹ Mana tantiyacoj fiyu runacunaga «Dios manami canchu» nirmi yarpan. Pasaypa pirdicashanami. Melanaypajcunatami rurasha. ¡Paycunaga mayganpis mananami allitaga rurannachu!

² Tayta Diosga syëlupita-pachami ricaraycämun pillapis tantiyaj caycashanta ricananpaj, pillapis payman yäracuycashantaraj musyananpaj.

³ Nishanga llapanpis mana allillatanami rurarcaycan. Llapanpis llutan cajllatanami rurarcaycan. ¡Pipis mananami cannachu allita ruräga! ¡Allita ruräga ni jucnayllapis manami cannachu!

⁴ Fiyu runacunaga manami imatapis tantiyannachu. Cuyashä runacunataga tantata micojnömi ushacarcärin. Tayta Diostaga manami manchacunnachu.

⁵ Paycunaga fiyupami mancharenga. Tayta Diosga payta wiyacojcunatami yanapan.

⁶ Alli runacuna yarpashanta fiyucunaga manacajmanmi churan. Chaypis alli runacunataga Tayta Dios chapanmi.

⁷ ¡Ima alliraj canman Sionpita Israelcunata salbananpaj chayaycamuptin! Acrashan runacunata Tayta Dios alliman churaptin Jacobpita mirar aywaj Israelcunaga llapanmi cushiconga.