Salmos 138 - Tayta Diosninchi Isquirbichishan

Tayta Diosta agradësicushan

David isquirbishan alabansa.

¹ Tayta Dios, llapan shongöpami agradësicushayqui. Alabansacunawanmi dioscunapa ñaupancho alabashayqui.

² Rispitädu Templuyqui caj-läman ricärirmi gongurpacushaj rasun cajta ruraj cashayquipita, cuyacoj cashayquipita agradësicunäpaj. Gamga llapanpita mas munayniyoj cashayquitami musyachishcanqui. Aunishayquitapis cumlishcanquimi.

³ Gamta mañacamuptë yanapämarayquimi. Mañacamuptë callpäta yurichirayquimi.

⁴ Cay munducho caj raycunaga aunishayquicunata wiyarmi gamta alabashunquipaj.

⁵ Chay raycunami Tayta Diostaga alabanga imano cananpäpis camacächishanpita. Chaynöga Tayta Diosta alabanga fiyupa munayniyoj captinmi.

⁶ May janaj pachacho cashpanpis Tayta Diosga yanapanmi umildi runacunata. Alli-tucojcunataga carullapitanami rejsin.

⁷ Ima mana allimanpis chayaptë Tayta Dios gammi yanapämanqui. Munayniyoj cashayquita musyachishpayquimi chiquimajcunapitaga salbamanqui.

⁸ Tayta Dios gamga cumlinquipämi nogapaj yarpashayquita. Tayta Dios, cuyacoj cayniquega imay-yajpis chaynöllami. Chaymi camashayqui caycaptëga ama cachaycamaychu ari.