Salmos 118 - Tayta Diosninchi Isquirbichishan

Tayta Dios cuyacoj cashan

¹ Tayta Diosta agradësicuy-llapa fiyupa alli cashanpita. Pay cuyacoj cashanga imaycamapis chaynöllami.

² Israelcuna nichun: «Tayta Dios cuyacoj cashanga imaycamapis chaynöllami» nir.

³ Aarón casta cüracuna nichun: «Tayta Dios cuyacoj cashanga imaycamapis chaynöllami» nir.

⁴ Tayta Diosta rispitajcuna nichun: «Pay cuyacoj cashanga imaycamapis chaynöllami» nir.

⁵ Llaquicuycashä örami Tayta Diosta mañacurä. Paynami wiyamashpan ñacaycho caycajta jorgamaran.

⁶ Tayta Diosga ricaycämanmi. Chaymi imatapis mana manchacöchu. ¿Imataräshi ruramanman runa-masëga?

⁷ Nogaga Tayta Dioswanmi caycä. Chaymi pay yanapäman. Chiquimajcunata binsishatami ricashaj.

⁸ Runaman yäracunanchïpa ruquenga Tayta Diosman yäracushun.

⁹ Munayniyoj runacunaman yäracunanchïpa ruquenga Tayta Diosninchïman yäracushun.

¹⁰ Llapan nasyunpita shamojcunami tumaparaycämaran. Chaypis nogaga Tayta Dios yanapämaptinmi paycunata binsirä.

¹¹ Intërupa curalarmi tumaparaycämaran. Chaypis nogaga Tayta Dios yanapämaptinmi paycunata binsirä.

¹² Abëja juntapajnömi juntapaycäramaran. Chaypis chapsacho nina ratariycashancho upejnömi rabyasha tumapaycämashanpita illgacäcuran. Nogaga Tayta Dios yanapämaptinmi paycunata binsirä.

¹³ Paycunaga mana alliman chayanäpämi firsapita mana allita rurachimayta munarcaycaran. Chaypitapis quiquin Tayta Diosmi salbamaran.

¹⁴ Callpä cananpaj Tayta Diosmi yanapäman. Chaymi payta alabä. ¡Paymi salbamajnëpis!

¹⁵ Tayta Diospa laynincunata cumlejcunapa wasincunachöga binsishanpita cushicurmi cantarcaycan cayno nir: «Tayta Diosmi munayninwan llapanta binsisha.

¹⁶ Tayta Dios munayniyoj cashanga fiyupa almiraypämi. Tayta Diosmi munayninwan llapanta binsisha.»

¹⁷ Manami wañushärächu. Cawashärämi Tayta Dios rurashancunata willacunäpaj.

¹⁸ Tayta Diosga fiyupami castigamasha; ichanga manami wañunäcamachu.

¹⁹ Templupa puncunta quichapämay-llapa. Tayta Diosta alabar agradësicunäpämi yaycuyta munä.

²⁰ Chay puncumi caycan Tayta Dios cajman yaycuna. Chaypami yayconga payta wiyacojcunaga.

²¹ Tayta Dios, gamtami agradësicö mañacushäta wiyamashayquipita, salbamashayquipita.

²² Wasi pergajcuna «mana allichu» nishan rumiga puntu rumipaj isquïnaman churasharämi canga llapanta tucnananpaj.

²³ Chayno cananpäga Tayta Diosmi camacächisha. Chaypitami fiyupa almirasha carcaycanchi.

²⁴ Chay junajmi Tayta Diosga allita ruraran. ¡Cananga cushicur allimi goyäshun!

²⁵ Tayta Dios, salbaycäramay ari. Tayta Dios, nogacuna alliman chayanäpaj camacaycachiy ari.

²⁶ ¡Tayta Diospa munaynincho shamoj rayga alabasha cachun! Paytaga alabashun Tayta Diospa Wasinpita-pachami.

²⁷ Tayta Diosllami rasunpa Diosga. Paymi achquipämanchi. Rämacunata apamuy fistata gallaycunayquipaj. Nircur altar caycashan cajcama rämacunata apay.

²⁸ Tayta Dios, gammi Diosnë canqui. Chaymi gamta alabashayqui. Tayta Diosnë gamtami agradësicushayqui.

²⁹ Tayta Diosta agradësicuy-llapa amatar alli cashanpita. Pay cuyacoj cashanga imaycamapis chaynöllami.