Salmos 111 - Tayta Diosninchi Isquirbichishan

Ima-aycatapis rurashanpita Diosta alabashan

¹ ¡Aleluya! ¡Tayta Diosga alabasha cachun! Llapan shongöpami Tayta Diosta alabashaj alli runacuna shuntacasha caycashancho, llapan runacunapa ñaupancho.

Álef Bet Guímel

Guímel

² Tayta Dios rurashancunaga fiyupa almiraypämi. Rurashancunata ricaycur almirajcunaga fiyupami cushicun.

Dálet He

He

³ Pay rurashancunaga llapanpis cuyayllapämi. Payga imaypis allillatami ruranga.

Vav Zayin

Zayin

⁴ Fiyupa almiraypajcunata rurashantaga manami pipis gongangachu. Tayta Diosga alli shongumi y cuyapäcojmi.

Jet Tet

Tet

⁵ Payta rispitajcunataga micuyta tarichinmi. Conträtuta rurar alli parlacushanta payga imaypis yarparaycanmi.

Yod Caf

Caf

⁶ Acrashan runacunataga ricachiran quiquin Tayta Dios munayninwan rurashantami. Payta mana rispitaj runacunapa chacranta guechurcur acrashan runacunata goycuran.

Lámed Mem

Mem

⁷ Dios rurashanga llapanpis allimi, rasun cajmi. Paypa mandamintuncunaga rasunpa yäracuypämi.

Nun Sámej

Sámej

⁸ Chaycunaga imaycamapis mana ushacajmi caycan. Chay mandamintuncunaga alli cajta ruranapämi rasun cajta cumlinapämi.

Ayin Pe

Pe

⁹ Acrashan runacunatami ñacaycajta jorgusha libri cananpaj. Alli parlacushanga para-simrimi canga. Tayta Diosga juchaynajmi, fiyupa rispitaypämi.

Tsade Qof Resh

Resh

¹⁰ Rasunpa yachaj canapäga rimëru Tayta Diostami rispitaypaj. Tayta Diosta rispitajcunaga alli yarpayniyojmi. ¡Tayta Diosga imaypis alabashami canga!