Salmos 11 - Tayta Diosninchi Isquirbichishan

Tayta Diosta rasunpa yäracushan

David isquirbishan alabansa.

¹ Nogaga Tayta Diosllamanmi yäracö. Ama nimächunchu: «Pichiusacuna gueshpishanno jircacunaman gueshpicuy.

² Masqui fiyucunata ricäriy: Lëchancunata camaricurcaycan. Nircur lëchanta illapacunanman camacaycächin. Chutaycan pacaraycashallanpita alli runacunata illapaycunanpaj.

³ Llapanpis mana allillana captenga ¿imatanaraj ruranga juchaynaj runaga? nir.»

⁴ Tayta Diosga caycan rispitädu Templunchömi. Jamacunanpis syëluchömi caycan. Runacuna imata rurashallantapis llapantami ricapaycan.

⁵ Tayta Diosga ricaycanmi juchaynajtapis juchasapatapis. Fiyupami chiquin fiyu runacunatawan wañuchicojcunataga.

⁶ Tayta Diosga fiyu runacunaman tamyachimonga shanshata, nina rataycajta, asufrita. Chaynömi acaj fiyu wayratapis wayrächimonga ruparinanpaj. ¡Tayta Diosmi castiganga!

⁷ Tayta Diosga juchaynajmi. Chaymi allita ruraj runacunataga cuyan. ¡Allillata rurajcunaga Tayta Diostami ricanga!