Salmos 10 - Tayta Diosninchi Isquirbichishan

Yanapänanpaj Diosta mañacushan Lámed

Lámed

¹ Tayta Dios ¿imanirtaj carullacho cacunqui? ¿Imanirtaj pacacunqui llaquicuycuna cashan öra?

² Fiyu runacunaga alli-tucushpanmi umildicunata achäquita ashipan. Chaypis fiyucunaga quiquincunami rurashan togllallacho watacäconga.

³ Fiyu runacunaga quiquincuna alli cashanta yarparmi alabacun. Yargajcunaga Tayta Diosta manacajman churarmi disprisyan.

⁴ Chay runacunaga alli-tucur nin: «Diosga manami canchu. Piräshi nogata jusgamanman imata rurashätapis» nir. Chayllatami imay örapis yarparaycan.

⁵ Imata rurashanchöpis allimi llojshipacun. Paycunaga jusgacänanpaj cashanta manami yarpanchu. Chiquinacushantaga manacajmanmi churan.

⁶ Paycunaga yarpaycan pipis mana alliman mana chayachinantami, imaypis inrïduman mana chayaytami.

Pe

Pe

⁷ Paycunaga manacajcunatami llullacun, engañacunmi, ashllicunmi. Shimi puncullanchömi caycan pitapis imatapis ninanpaj.

⁸ Marca llojshinacho, yaycunacho pacacuycur shuyarpan. Nircur juchaynajcunataga wañuchin. Pipis washänanpaj mana cajcunataga watgarcaycan.

Ayin

Ayin

⁹ Liyun machaypita ricchacojnörämi, pacarashanpita pobritaga watgarcaycan. Chariycärerga garchacarcärir apacun.

¹⁰ Umpurcur, ñuquircur, shuyarpaycaptillannami pipis washänanpaj mana cajcunaga maquinman chayan.

¹¹ Fiyucunaga yarpan «Diosga pobricunata gongaycushami. Cäranta chapacurcur imaypis mana ricanchu» nir.

Qof

Qof

¹² ¡Tayta Dios apuray ari! ¡Ama wiyaräcuychu! ¡Pobricunataga ama gongaychu!

¹³ ¿Imanirtaj fiyucunaga manacajman churashunqui Tayta Dios? Paycunaga yarpan «imaypis Diosga manami jusgamangachu» nir.

Resh

Resh

¹⁴ Gamga quiquiquimi ricashcanqui fiyupa mana allita rurashanta. ¡Ricasha carmi, castiganquipaj imano rurashanpitapis! Gammanmi yäracamun pïninpis mana cajcunaga. Gamllami wacchacunata yanapanqui.

Shin

Shin

¹⁵ ¡Fiyucunataga maquintapis paquirgäriy! ¡Llapan mana allita rurashancunapita jusgay!

¹⁶ Cay pachachöga Tayta Diosllami imaycamapis ray. ¡Payta mana rispitajcunataga gargongami!

Tav

Tav

¹⁷ Tayta Dios, umildicuna mañacamushushayquitaga wiyashcanquimi. Chaymi shacyächir yanapanqui.

¹⁸ Wacchacunata, ñacaycajcunataga washar yanapaycuy ari. Chaura fiyu runacunaga manacaj caycar mananami paycunata mancharachenganachu.