Salmos 1 - Tayta Diosninchi Isquirbichishan

LIBRO 1 (SALMOS 1–41) Juchaynajcunapaj juchayojcunapaj rimashan

¹ Cushishami goyanga fiyu runacuna willapashanta mana rurajcunaga, juchasapacunata mana gatirajcunaga, Tayta Diosta mana rispitajcunawan mana goturajcunaga.

² Cushishami goyanga Tayta Diospa laynincunata cushisha cumlejcunaga, chacaypa junajpapis cumlinallanpaj yarparajcunaga.

³ Chay runaga caycan juc yöra mayu cantuncho alli caycajnömi, wayunan timpu chayamuptin alli wayojnömi, öjancunapis mana garwashtajnömi. ¡Chay runataga llapanpis allimi llojshipan!

⁴ Fiyu runacunapäga manami chaynöchu. Paycunaga carcaycan wayra apashan chaqui panganömi.

⁵ Chaymi juchasapacunataga Tayta Dios castiganga. Juchaynajcunawan iwalga mana goturangachu.

⁶ Juchaynajcunataga alli nänipa pushar Tayta Diosmi alli cawayman chayachin. Fiyu runacunatami ichanga quiquin purishan nänicho usharenga.