Lamentaciones 3 - Tayta Diosninchi Isquirbichishan

Quimsa caj llaquicuy Álef

Álef

¹ Nogaga fiyupami ñacashcä. Tayta Dios rabyacurcur castigamaptinmi ñacashcä.

² Paymi yanauyaycajman pushamaran. Achqui mana cashancho purichir ñacachimaran.

³ Yaparir-yaparirmi imay örapis nogataga castigaycäman.

Bet

Bet

⁴ Garätapis aychätapis pasaypanami auquisyächisha. Tullöcunatapis pasaypami paquir-ushasha.

⁵ Intëröpa curralta rurajnömi fiyupa ñacachimashpan llaquicaycächiman.

⁶ Wañojcuna pamparaycashan chacaychöno cawanäpämi cachaycamasha.

Guímel

Guímel

⁷ Maypapis mana llojshinäpämi curralman wichgarcamasha. Fiyupa lasaj cadinacunawanmi watarcamasha.

⁸ Yanapämänanpaj mañacur gaparaycaptëpis ruwacushätaga manami wiyamashachu.

⁹ Puricunätaga rumicunawanmi pergacurcusha. Caminötaga juc-läpana jitarisha.

Dálet

Dálet

¹⁰ Nogapäga Tayta Dios casha pacaraycaj ucumaryanömi; pintipaycamänanpaj caycaj liyunnömi.

¹¹ Allipa aywaycajtami pantacächimasha. Tariparcur rachiramasha. Fiyupa mancharishatami cachaycamasha.

¹² Lëchanta sumaj chutarcurmi nogataga lëchanwan chayachimänanpaj apuntamasha.

He

He

¹³ Tayta Dios jitamushan lëchacunaga cuerpöman fiyupa ruricamami jaticasha.

¹⁴ Llapanmi marca-masëcunapis nogataga asipäman. Imay örapis nogapaj parlar asircaycanmi.

¹⁵ Tayta Diosga fiyupa llaquicuyllamanmi churamasha. Ashgaj berbënatami upuchimashapis.

Vav

Vav

¹⁶ Guechga rumiwanmi quirötapis jorgusha. Uchpachömi gochpachimasha.

¹⁷ Nogapäga manami cannachu alli goyayga. Cushisha goyay cashantapis gongaycushcänami.

¹⁸ Chayno cashpämi nishcä: «Alli goyayta manami yarpänachu. Tayta Diosmanpis imapänataj yäracushaj» nir.

Zayin

Zayin

¹⁹ Yarpämi llaquicushäta, ñacashäta, japallä goyashätapis.

²⁰ Chaycuna imano päsamashantapis yarpachacömi. Chauraga alli shacyaycashäpitapis guellanacäcönami.

²¹ Ichanga imaypis shongöcho yarpaycäshämi. Y chay yarpaycashämanga yäracuycäshämi:

Jet

Jet

²² Tayta Dios cuyacoj cashanga manami imaypis ushacanchu. Cuyapäcoj cayninpis manami ushacanchu.

²³ Alli caynenga waran-waranmi mushojyaycan. Aunishantaga imaypis cumlinmi.

²⁴ Shongullächöga në: «Nogapäga Tayta Diosllami llapanpitapis mas alli. Chaymi payllaman yäracö.»

Tet

Tet

²⁵ Tayta Diosga fiyupa allimi payman yäracojcunapäga llapan shongunpa payman yäracuyta ashejcunapäga.

²⁶ Tayta Dios salbamänanchïpäga upällalla shuyaraymi mas alli.

²⁷ Runapäga mas alli caycan mösu cashanpita-pacha ñacaycunata awantaymi.

Yod

Yod

²⁸ Tayta Dios ñacachishan öra runaga upällalla japallan cacunman.

²⁹ Wiyacushpan pampaman uysuräcunman. Chayno ruraptenga capaschari allimanpis churanman.

³⁰ Pipis magaptenga cäranta witichipanman. Imata gayapaptinpis upällalla chasquicunman.

Caf

Caf

³¹ Tayta Diosga pitapis manami para-simriga gongaycunchu.

³² Ñacachishpanpis cuyapanmi. Chaynöga ruran fiyupa cuyacoj cashpanmi.

³³ Rasunpaga pay manami munanchu runacunata ñacachiyta, ni nanächiytapis.

Lámed

Lámed

³⁴ Tayta Diosga manami munanchu prësu caycaj jäpacunata ñacachinanta.

³⁵ Tayta Diosga manami munanchu pï runatapis manacajman churananta.

³⁶ Tayta Diosga manami munanchu dimanducho juchayoj cajpa faburnin pipis cananta.

Mem

Mem

³⁷ Tayta Dios mana camacächiptenga imapis manami cay pachacho canmanchu.

³⁸ Allipis mana allipis chayamun janajcho caycaj Tayta Dios «chayno cachun» niptinmi.

³⁹ Juchasapa cashanpita castigasha caycarga runa ¿imapitataj quijacunman?

Nun

Nun

⁴⁰ Imano goyaycashanchïtapis sumaj yarpachacushun. Tayta Dios munashannöna cawashun.

⁴¹ Syëlucho caycaj Tayta Diostaga llapan shongunchïwan, maquinchïta chojpacur mañacushun.

⁴² Nogacunaga gam nishayquita mana rurarmi juchata rurashcä. Chaymi gamga mana perdunamashcanquichu.

Sámej

Sámej

⁴³ Fiyupa rabyashpayquimi gaticachämashcanqui. Intëröpa chapacaycamashcanqui. Mana cuyapaypami nogapa castacunataga wañuchishcanqui.

⁴⁴ Nogacuna ruwacur mañacamushäta mana wiyanayquipämi pucutayman yagacuycurayqui.

⁴⁵ Llapan runacunapa ñaupanchömi nogacunataga ganratano ricamashcanqui.

Pe

Pe

⁴⁶ Llapan chiquimajcunapis nogacunapa contrallämi rimarcaycan.

⁴⁷ Nogacunaga goyashcäpis mancharishallami. Mana allicunallami chayamashapis.

⁴⁸ Cuyashä siudäta illgaycächejta ricaptë weguëpis mayunörämi aywaycan.

Ayin

Ayin

⁴⁹ Mana chawaypami wagaycä. Cushicuyta manami tarishächu

⁵⁰ syëlucho caycaj Tayta Dios manaraj yanapämashancamaga.

⁵¹ Siudänëcho tiyaj jipashcuna ñacajta ricaptëmi shongöcamaraj nanäman.

Tsade

Tsade

⁵² Achäquita mana ashipaycaptillämi chiquimajcunaga äbita charejnöpis prësu charimasha.

⁵³ Cawaycajtami pösuman cacharpamasha. Nircur uchcupa shimintana jatun läjawan chaparcamusha.

⁵⁴ Chaura yacuga ushajpämi ultacarcamaran. Chaymi yarparä «wañushänachari» nir.

Qof

Qof

⁵⁵ Tayta Dios, pösupa rurincho caycashpämi gamta mañacamurä.

⁵⁶ Mañacamushäta gamga wiyamashcanquimi.

⁵⁷ Gayacamushäta wiyamashpayquimi yanapämarayqui. Nircur «ama manchacuychu» nimarayqui.

Resh

Resh

⁵⁸ Tayta Dios, gammi ima mana allipitapis chapämashcanqui. Wañunäpitapis gammi salbamashcanqui.

⁵⁹ Gamga ricaycanquimi imano mana alli ruramashantapis. Gampaj alli cashanno arriglaycamay.

⁶⁰ Gamga ricaycanquimi imata rurayta munaycämashantapis, nogapa conträ imano rurananpaj yarpaycashantapis.

Shin

Shin

⁶¹ Tayta Dios, masqui wiyaycuy conträ imano rimarcaycashantapis, imata ruramänanpaj yarpaycashantapis.

⁶² Chiquimajcunaga nogapa contrallämi imay örapis rimarcaycan.

⁶³ Masqui sumaj ricay. Ima rurashancunachöpis nogapäga shimincayllarämi riman.

Tav

Tav

⁶⁴ Tayta Dios, paycunataga rurashanmanno castigaycuy.

⁶⁵ Paycuna mana tantiyananpaj camacaycachiy. Nircorga paycunata castigaycuy.

⁶⁶ Tayta Dios fiyupa rabyasha gaticachaycuy. Cay pachapita paycuna illgänanpaj camacaycachiy ari.