Jonás 2 - Tayta Diosninchi Isquirbichishan

Diosta Jonás mañacushan

¹ Chaymi Jonasga pescädupa pachancho caycashpan Tayta Diosta mañacuran.

² Mañacur cayno niran: «Fiyupa llaquisha caycashpämi gamman mañacamurä, Tayta Dios. Gamnami yanapämarayqui. Wañushanöna caycashpämi gamman mañacamurä. Gamnami wiyamarayqui.

³ Lamarmanga mas jundunninmanmi garpumashcanqui. Intëröpa yacullatami ricaycashcä. Yacuga ruyrucarcur-ruyrucarcur janäpa päsasha.

⁴ Chayrämi yarpärishcä läduyquipita jitarishana caycashäta; rispitädu Templuyquitapis manana ricanäpaj cashanta.

⁵ Yacuwan tallucashami puriycashcä. Aypalla yacumi intëru janäpa ñiticarcamaran. Yacu rurincho caycaj jachacunapis pitucarcamaran.

⁶ Pacha rurincamami chayashcä. Chaychöga caycashcä imaypis mana llojshimojpäno chapacashana. Gammi ichanga Tayta Diosnë, jatun uchcupita jorgamashpayqui salbamashcanqui cawaycajllata.

⁷ Wañunäpaj caycashächönami gampaj yarpärirä Tayta Dios. Chayno mañacamushätami gamga wiyarayqui. Chaynömi rispitädu Templuyquichöpis wiyamurayqui.

⁸ Mana bälej ïdulucunata adurajcunaga gamta gongaycushurayquimi.

⁹ Nogami ichanga charashäcunata gampaj churashpä alli shimëpa alabashayqui. Aunishätaga llapantami cumlishaj. ¡Tayta Diosllami salbacöga!»

¹⁰ Chayno nir ruwacuptin Tayta Diosga camacächiran Jonasta allpaman pescädu gumitaramunanpaj.