Job 25 - Tayta Diosninchi Isquirbichishan

Tayta Diospäga pipis juchaynaj mana cashanta Bildad nishan

¹ Chaura Shúa jutiyoj parti runa Bildad niran:

² «Diosga fiyupa munayniyojmi, manchacunami. Paymi camacächin syëluchöpis allilla cananpaj.

³ Paypa suldäruncunaga yupaytapis mana atipaypämi. Achicyayninpis llapanmanmi achicyan.

⁴ Runaga ¿imanöpataj Tayta Diospa ñaupancho juchaynaj canga? Warmipa wawanga ¿imanöpataj limyu canga?

⁵ Tayta Diospa achicyayninmanga quillapa achicyayninpis manami tincunchu. Pay limyu cashanmanga goyllar limyu cashanpis manami tincunchu.

⁶ Piyur-rächari ¡runa aycha curunölla caycarga! ¡Runa cuycanölla caycarga!»