Isaías 62 - Tayta Diosninchi Isquirbichishan

Jerusalenpaj Tayta Diosta mañacushan

¹ Sión, gamta cuyashpämi upällallaga mana cacushächu. Jerusalén, gamta cuyashpämi jamaytapis mana tarishächu intërupa manaraj alli goyay cashancamaga; Tayta Dios manaraj salbashushayquicamaga.

² Intëru nasyun runacunami ricanga allilla goyaycashayquita. Llapan raycunami ricashunquipaj munayniyoj caycajta. Chauraga quiquin Tayta Diosmi juc jutitana churapäshunquipaj.

³ Tayta Diospa maquinchöga canquipaj ray jaticunanpaj caycaj corönanömi.

⁴ Runacuna mananami yapayga «Cacharisha» nishunquipänachu. Chaypa ruquenga «Tayta Dios fiyupa cuyashan» nishunquipänami. Tiyashayqui partitapis mananami «Illgächisha» nenganachu. Chaypa ruquenga «Tayta Diospa majan» nenganami.

⁵ Imanömi juc mösu majachacan jipashwan, chaynömi Diosga paypana canayquipaj shuntashunquipaj. Tayta Diosga cushishami caycangapaj warminwan runan cushisha goyashanno.

⁶ Jerusalén, curalaraj pergayquicunamanmi ricachacojcunata churashcä. Paycunaga chacaypa junajpapis mana chawaypami nircaycanga: «Tayta Diosta sirbejcunaga ama upällacaycäriychu.

⁷ Jerusalenta allchachiyta ushanancama; intëru nasyun runacuna rispitanancama Tayta Dios jamaycunanta ama dëjaychu.»

⁸ Tayta Diosga munayniyoj cashpanmi juraran. Jurar niran: «Mananami imaypis camacächishänachu rïguyquita chiquishojcuna apacunantaga, ni ñacar rurashayqui bïnuyquita juc-lä runacuna upucurcunantapis.

⁹ Chaypa ruquenga quiquiquicunanami micuyniquita shuntar micunquipaj. Übasniquicunatapis pallar shuntanquipaj. Bïnuta rurashayquitapis quiquiquicunami upunquipaj. Chayno rurashpayqui nogata alabamanquipaj rispitädu Templöpa sawan ruricho.»

¹⁰ ¡Siudäpa sawan puncucunapa llojshiy-llapa! ¡Runacuna purinanpaj nänita aruy! Jatun nänita aruy-llapa. Nänicho rumicuna caycajtapis jitariy-llapa. Llapan nasyun runacuna musyananpaj señalta jawiy.

¹¹ Cay pachacho juc cuchupita juc cuchucamami Tayta Diosga Sión siudäta willachisha: «Salbashojniquega chayamushanami. Juccunapa munaynincho caycajta guechurcurmi Tayta Diosga acrashancunata shuntaycämun» nir.

¹² Israelcunapa jutintaga «Santo runacuna», «Tayta Dios salbashan runacuna» nengami. Jerusalentanami «Fiyupa cuyay siudä», «Mana cachaycushan siudä» nenga.