Isaías 12 - Tayta Diosninchi Isquirbichishan

Diosta agradësicur alabashan

¹ Chay wichanga ninquipaj: «Gamta agradësicömi Tayta Dios. Nogapaj fiyupa rabyashami caycarayqui. Cananga rabyashayquipita allchacashcanquinami. Allinami goyaycächimanqui.

² Tayta Diosmi salbaman. Payman yäracurmi imapitapis mana manchacöchu. Tayta Diosmi callpata goman, imapitapis pacaman. Paymi salbamajnë.»

³ Gamcunapis cushicushpayqui aywanquipaj salbasyunta tarichicoj pashtaj yacuta upoj.

⁴ Chayrämi ninquipaj: «Tayta Diosta agradësicuy. Paypaj willacuy. Imata rurashantapis intëru marcacunaman willacuy. Tantiyachiy Tayta Dioslla llapanpita mas munayniyoj cashanta.

⁵ Tayta Diosta alabar cantay-llapa. Payga fiyupa almiraypajcunatami rurasha. Chaytaga cay pachacho caj runacuna intërucho musyanman.

⁶ Sioncho tiyajcuna, cushicuypita gaparpay, cantay. Chayno ruranqui Israelpa Santo Tayta Diosnin gamcunacho fiyupa munayninwan captinmi.»