Ezequiel 15 - Tayta Diosninchi Isquirbichishan

Israelta manacajlla übasman tincuchishan

¹ Tayta Dios nimaran:

² «Runa, ¿übas yörapa tullun imallapäga allichuraj? ¿Waquin guerucunapita mas allichuraj caycan?

³ Tullonga manami imapäpis allichu. ¡Manami allichu waguicuna istägata ruranallapäpis!

⁴ Yantallapämi alli. Garancunata nina rupar ushacurcuptin shongonga carbunyashanami caycan. Chaura imapäpis manami allinachu.

⁵ Manaraj rupachisha caycällar imapäpis mana alli caycarga piyurnachari rupasha carnaga imapäpis mana bälejna canga.

⁶ «Chaypitami, noga Tayta Dios cayno në: Imanömi übas yörapa tulluntapis ninaman rupachin, chaynömi Jerusalén runacunatapis ninaman gaycushaj.

⁷ Nogami paycunapa contran ricacushaj. Juc ninapita gueshpiptinpis juc ninanami rupacurconga. Paycunapa contran ricacuptërämi gamcunaga musyanquipaj noga Tayta Dios cashäta.

⁸ Nogata mana sirbimashanpitami nasyunnintaga ticrarachishaj pasaypa chunyajman. Noga Tayta Diosmi chayno në.»