Cantares 5 - Tayta Diosninchi Isquirbichishan

Runan

¹ Cuyaynë, majallä, wertächönami caycä. Maynami shuntashcäna mïrra perfümita, cuyayllapaj asyajcunatapis. Sërallanchöraj caycaj mishquitapis maynami yawashcäna. Lëchitawan bïnutapis maynami upushcä. Amïgöcuna, micuy, upuy. Gamcunaga, aycatapis gustashayquita upuy.

Yanasancuna Chuscu caj cantana Warmin

² Puñurpis mayaj mayajllami puñuycarä. Chayno puñuycashächömi wiyarcurä puncupita cuyaynë gayacaycämushanta: ¡Puncuta quichapaycallämay ari, cuyaynillä, majallä, cuyayllapaj paluma-mallwa! ¡Umäpis shullaypashami caycan! ¡Chacay shullay yacumi umäpitapis jutuycan!

Runan Warmin

³ Maynami röpätapis lojticushcä. ¿Yapayrächari jaticushaj? Maynami chaquëcunatapis mayllacushcä. ¿Yapayrächi chaquëcunapis ganranga?

⁴ Cuyaynëga maquinta jatircamuran puncupa uchcun caycajpa. Chaura shongöpis tic-ticyaranrämi.

⁵ Chaymi jinan öra jatarirä cuyaynëta quichapänäpaj. Maquëpitapis mïrra perfümi juturcuranraj. Dëdöcunapitapis mïrraga juturcuranraj. Puncuta rancarajmanpis juturcuranraj.

⁶ Cuyaynëta puncuta quichapariptë payga manami cashanachu. Aywacushana caran. Gayacamushanta yarpärir fiyupa llaquicurä. Ashirpis manami tariränachu. Gayacuptëpis manami mayacarannachu.

⁷ Chayno ashir puriycajtami tarimaran siudäta täpar tumaycaj runacunapis. Magamashpan rachiy-rachiylla ruramasha. Jacötapis firsapitami guechuramaran.

⁸ Jerusalén jipashcuna, gamcunatami ruwacö: cuyaynëta ricashpayquega willaycapamay ari «gampaj llaquicuyllawan gueshyaycan» nir.

Yanasancuna

⁹ Cuyayllapaj warmicunapitapis mas cuyayllapaj warmi, ¿ima cuyayllapätaj caycan cuyashayqui runaga chayno nimashayquita nogacuna willanäpäga? ¿Imanirajtaj chay cuyashayqui runaga?

Warmin

¹⁰ Cuyaynëga camarajlla puca cärami. Paytaga rejsinquimanmi chunca waranga runacuna goturaycashanchöpis.

¹¹ Uma ajchanga achicyaycachaycanmi. Yana cayninpis päbupanörämi achic-achicyaycan, jinachöpis goshpumi.

¹² Ñawinpis ishcay paluma lëchiwan bäñacushanörämi. Ishtanqui läduncho ratarpaycajnömi achicyaycachaycan.

¹³ Cärancunaga shanshaypa-shanshaycan wertacunacho alli asyaj waytacuna caycajnömi. Shimi wirpancunapis caycan rösa wayta pashtaraycajnömi, chay jananpa mïrra perfümi jutuycajnöraj.

¹⁴ Maquincunapis caycan gori surtïjapa ñawinman perlascunata churapashanömi. Cuerpunpis caycan camaraj llushway.

¹⁵ Chancancunapis achicyaypa achicyaycachaycaj rumipita rurasha pilancucunanömi. Goripita rurasha jamacunacho ichiraycajno caycan. Paytaga ricärillarnami rejsinchi Libanupita caj sedru guerucunatanöpis.

¹⁶ Rimacuyninpis maysi wiyacuyllami. Payga maysi cuyacuyllami. Jerusalén jipashcuna, chaynömi cuyashä runaga, chaynömi yanasäga.