Cantares 1 - Tayta Diosninchi Isquirbichishan

¹ Salomonpa cantanancunapita mas cuyayllapaj alli caj cantana.

Gallaycunan caj cantana Warmin

² ¡Ay, mucharcamanquiman ichanga! Cuyacuyniquega bïnupitapis mas allimi.

³ Perfümiquipa asyaynin maysi musquicuyllami. Quiquiquimi chay perfüminöga caycanqui. ¡Chaymi jipashcunapis cuyashunqui!

⁴ ¡Pushacamay ari! ¡Raynillä, wasiquiman pushacamay ari! Gamwanga cushishami goyäshunpaj. Chaychönami yarpäshun cuyacuyniqui bïnupita mas alli cashanta. ¡Rasuntachari jipashcunaga cuyashunqui!

Yanasancuna Warmin

⁵ Jerusalén jipashcuna yanalla carpis cuyayllapämi cä. Cedar runacunapa tolduncunano oguimi cä. Salomonpa cuartuncho chaparaj tëlacunano cuyayllapämi cä.

⁶ Ama ricapämaychu yanalla cashätaga, ni shanaywan yanayasha cashätapis. Turëcunami nogapaj rabyacarcäriran. Chaymi übas chacracunata täpachimaran. ¡Quiquëpa übas chacräta ichanga mana täpashcächu!

⁷ Cuyaynë willamay ari, ¿maypataj uyshayquicunata michinqui? Las-dösi inti fiyupa shanashan öraga ¿maymantaj llantucachej gatinqui? ¿Imanir-räshi puriycäman amïguyquicuna uywancunata michicushan guepanpa guella puricachaj warminöga?

Yanasancuna

⁸ Cuyayllapaj warmicunapitapis mas cuyayllapaj warmi, mana musyashpayquega uyshacunapa yupillanpa ayway. Michicojcunapa chucllancuna caycashan lädullanpa cabrayquicunata michicuy.

Runan

⁹ Cuyaynë, gamga adurnuyquicunawan canqui faraonpa carrëtanta garchaj cuyayllapaj fïna yëwannömi.

¹⁰ Cärayquega arëtiquicunawan cuyayllapaj achicyayparaj-achicyaycan. Cuncayquipis perlas wallgacunawan cuyayllapaj camaraycan.

¹¹ Gori adurnucunatami rurapäshayqui. Yuraj guellaycunatami churapäshayqui.

Warmin

¹² Ray jamarashanmanpis perfümiwan cupacushäpa asyaynenga mayacaycanmi.

¹³ Nogapäga cuyaynë caycan shuti-mallwawan mïrra perfümita imaypis wallgarashänömi.

¹⁴ Cuyaynë nogapäga caycan cuyayllapaj alli asyaj wayta En-gadi particho caycajnömi.

Runan

¹⁵ Cuyaynë, fiyupa cuyayllapämi canqui. Rasunpa cuyayllapämi canqui. Ñawiquicunaga caycan ishcay palumanömi.

Warmin

¹⁶ Cuyaynë, fiyupa cuyayllapämi canqui. Rasunpa cuyayllapaj camaraj runami canqui. Cämanchëga caycan berdiraycaj tajta pampami.

Runan

¹⁷ Wasinchïpa gueruncunanami sedru guerucuna. Jananchïpa chapämajninchïnami caycan siprescuna.