Amós 3 - Tayta Diosninchi Isquirbichishan

Castïgu chayananpaj wallcallana pishiycashanta willacushan

¹ ¡Wiyay Israelcuna! Egiptupita jorgamushoj Tayta Diosmi cayno nishunqui:

² «Munducho aypalla runacuna caycajpitami gamcunallata acrashcä. Acrasha caycaptë mana allita rurashayquipita gamcunataga castigashayquimi.»

³ ¿Manaraj alli parlacusha carga ishcaj runacuna purinmanchuraj?

⁴ ¿Manaraj cäsata charisha carga munticho liyun gaparämunmanchuraj? ¿Manaraj machaynincho cäsata charar manta liyunpis gaparämunmanchuraj?

⁵ ¿Mana ima micuytapis churapashaga pichiusa trampaman yaycunmanchuraj? ¿Mana imapis yaycuptenga chiclla churashan juchunmanchuraj?

⁶ ¿Manaraj pipis wañuptin wañushapänöna marcacho campanata tucanmanchuraj? ¿Tayta Dios mana camacächiptenga ima disigrasyallapis siudäman chayamunmanchuraj?

⁷ Tayta Diosga manami imaypis imatapis ruranchu sirbej profëtancunata manaraj musyacherga.

⁸ Liyun wagamuptenga ¿piraj manchariyllawan mana sicsicyanmanchu? Willacunanpaj pitapis Tayta Dios niptenga ¿piraj mana willacunmanchu?

Samaria illgänanpaj willacushan

⁹ Willacojcuna, gamcuna willacuy Asdod runacunapa palasyuncunacho, Egiptucho caycaj palasyucunachöpis. Cayno niy: «Samaria jircacunaman shamuy-llapa, fiyupa mana allicunata Samariacho ruraycajta ricanayquipaj, alli runacunata ñacaycächejtapis ricanayquipaj.

¹⁰ «Paycunaga alli cajta rurayta manami yachanchu. Guechushancunallatami palasyuncunachöpis chararaycan.»

¹¹ Chayno cashanpitami Tayta Diosga cayno nin: «Chiquishojcunami nasyunniquita curalapaycärengapaj. Pacacunayqui caycajcunatapis juchurgärachengapämi. Palasyuyquipitanami ima-aycatapis apaconga.»

¹² Tayta Diosga caynömi nin: «Uywayoj runa imanömi liyunpa shiminpita guechun uywanpa ishcay macshullanta u rinrincunallatapis, chaynöllami Samariacho tiyaj Israelcunapis, Damascupita rantimushan alli jamacunacho wegurpajcunapis wallca cösallanwan gueshpenga.»

¹³ Munayniyoj Tayta Diosga willacojcunata caynömi nin: «Gamcuna wiyay-llapa. Jacobpita mirar aywaj Israel runacunapa contran willacuy.

¹⁴ Juchanpita Israelcunata jusganä junäga Betelcho caycaj altarcunata ushajpämi illgächej-aywä. Altarpa isquïnancho caj wagrancunapis paquicarmi pampaman shicwanga.

¹⁵ Jatusaj palasyucunatapis illgächishämi. Achicyaypa achicyaycaj wasincunatapis illgarachishämi. Llapan jatun wasincunatapis juchurgärachishämi.» Tayta Diosmi chayno nisha.