إنجيل مرقس 8 - Qatifi New Arabic Version / الترجمة العربية القطيفية الجديدةيسوع يأكل أربعة آلاف نفر 1 في ديك الأيام، تجمعوا جماعة ناس كبيرة، و ما كان عندهم شيء ياكلوه، و قام عيط يسوع على تلاميده و قال ليهم: 2 كاسرين خاطري الجماعة لأن صار ليهم ثلاثة أيام وياي، و ما عندهم شيء ياكلوه. 3 وإن خليتهم يروحوا بيوتهم صايمين، يمكن تخلص طاقتهم في الطريق، لأن بعضهم جو من أماكن بعيدة». 4 و قالوا له التلاميد: «من وين الواحد يقدر يجيب أكل وخلي كل هالناس يشبعوا ويعطيهم خبز في هدا المكان القحط؟» 5 وسألهم: «كم قرص خبز عندكم؟» و جاوبوا: «سبعة!» 6 وأمر الجماعة أنهم يقعدوا على الأرض. و بعدين أخد سبعة أقراص الخبز، وشكر الله، وعطا تلاميده الخبز عشان يعطوا الجماعة، وسووا إلا قاله ليهم. 7 و كان عندهم بعد سمچ صغار، بارك الأكل و أمر أنها تنعطى إلى الجماعة. 8 و أكلوا الجماعة إلين شعبوا. و بعدين جمعوا التلاميد سبعة سلال ترسوها بالفضيل الخبز إلا بقى. 9 و كان عدد إلا أكلوا حوالي أربعة آلاف. و بعدين خلاهم يروحوا، 10 و على طول ركب السفينة ويا تلاميده، و راح ناحية دَلْمَانُوثَةَ. 11 فجو الفرسيين و قاموا يجادلوه، وطلبوا منه معجزة من السما عشان يمتحنوه. 12 وتنهد متضايق، و قال: «ليش هالجيل بس يطلب معجزة؟ بأمانة أقول ليكم: هالجيل ما بينعطى آية!» 13 بعدين تركهم ورجع وركب السفينة وعبر و راح الجهة الثانية. خمير الفريسيين وهيرودُس 14 وكانوا ناسين ياخدوا وياهم خبز، و ما كان عندهم في السفينة إلا قرص خبز واحد. 15 ووصاهم يسوع و قال ليهم: «أنتبهوا! خلوا بالكم من خمير الفريسيين وخمير هيرودُس». 16 و قاموا يسولفوا ويتحاججوا ويا بعض، و يقولوا: «هدا لأن ما عندنا خبز» 17 وعرف يسوع بالي قالوه و قال ليهم: «إلاويه تتحاججوا ويا بعض لأن ما عندكم خبز؟ للحين مو قادرين تستوعبوا وتفهموا؟ للحين قلوبكم قاسية؟ 18 فيكم عواين، ما تشوفوا؟ وفيكم أداين ما تسمعوا؟ چى ما تذكروا؟ 19 يوم كسَّرت أقراص الخبز الخمسة لخمسة آلاف نفر، كم سله متروسة بكسر الخبز جمعتوا؟» قالوا له: «إطنعشر سلة ». 20 «ويوم كسروا أقراص الخبز السبعة لأربعة آلاف نفر، كم سلة متروسة بالخبز المقطع صار عندكم؟» قالوا: «سبعة!» 21 و قال ليهم: «و بعدكم للحين مو فاهمين؟» أعمى تشافى في بيت صيدا 22 وبعدين راحوا قرية بيت صيدا، و مجموعة من الناس جابوا له أعمى وتوسلوا له أن يحط إيده عليه. 23 و مسك أيد الأعمى وأخده وياه برا القرية و بعد ما تفل في عيونه، وحط إيده عليه وسأله: «تشوف شي؟» 24 و طالع، و قال: «أشوف ناس، كأنهم أشجار، يمشوا». 25 و حط إيديه مرة ثانية على عيونه، و طالع وهو منتبه، ورجع نظره سليم يشوف كل شي واضح. 26 و رسله بيتهم و قال له: «لا تروح القرية ولا تقول لأحد شيء في القرية!» بطرس يشهد بحق المسيح 27 و بعدين راح يسوع وتلاميده إلى قرى قَيْصَرِيَّةِ فِيلِبُّسَ. و في الطريق، يسوع سأل تلاميده: «وش تقول الناس عن من أكون أنا؟» 28 و جاوبوه: « في ناس تقول إنك يوحنا المعمدان، وغيرهم يقولوا إنك إيليا، وغيرهم إنك واحد من الأنبياء». 29 و قام سألهم: « و أنتون، وش تقولوا من أنا؟ » و رد عليه بطرس و قال: «أنت المسيح!» 30 وحدرهم إن يقولوا لأي أحد هالكلام. يسوع يخبر عن موته وقيامته 31 و قام يعلمهم إن إبن الإنسان لازم يتألم واجد، ويرفضه القادة ورؤساء الكهنة والكتبة، وينقتل، و بعد ثلاثة أيام يقوم. 32 و هو قاعد يتكلم عن هالموضوع بكل صراحة، قام أخداه بطرس على جنب وعصَّب عليه. 33 ويسوع قام طلع في تلاميده وانتهر بطرس و قال له: «روح عني يا شيطان، لأنك ما تفكر في أمور الله، لكن تفكر بأمور الناس!» طريق الصليب 34 و بعدين دعا الجماعة ويا تلاميده، و قال ليهم: «إلا يمبى يصير من أتباعي، ينكر نفسه، ويحمل صليبه، و يتبعني. 35 و إلا يمبى يخلص نفسه، يخسرها. و لكن كل من يخسر نفسه بسببي و بسبب الإنجيل، فهو يخلصها. 36 ويش بينفع الإنسان لو ربح العالم كله وخسر نفسه؟ 37 و ويش يقدر يقدم الإنسان فدا عن نفسه؟ 38 و إلا يتفشل مني و من كلامي في هالجيل الخاين العاصي، إبن الإنسان بيتفشل منه يوم إلا يرجع في مجد أبوه ويا الملائكة المقدسين». |
Qatifi New Arabic Version © 2024 Strategic Resource Group
Strategic Resource Group