إنجيل مرقس 7 - Qatifi New Arabic Version / الترجمة العربية القطيفية الجديدة

الطاهر والنجس

¹ وتجمعوا حواليه الفريسيين وناس من الكتبة، كانوا جايين له من أورشليم.

² وشافوا شويه من تلاميده ياكلوا أكلهم بأيادي مو طاهرة، يعني مو مغسولة.

³ لأن الفريسيين و هم -اليهود المتعصبين-، واليهود بشكل عام، ما ياكلوا أكلهم قبل ما يغسلوا أياديهم كم مرة، لأنهم متمسكين بعادة قادة المعبد.

⁴ و إدا رجعوا من السوق، ما ياكلوا إلا إدا أغتسلوا. و فيه عادات واجد غير توارثوها ومتمسكين بها، زي غسل الكاسات والأباريق ومواعين النحاس.

⁵ و وقتها سألوه الفريسيين والكتبة: «إلاويه تلاميدك ما يتبعوا عادات القادة، و ياكلوا بأيادي مو طاهرة؟»

⁶ و رد عليهم و قال: «صدق أشعياء يوم تنبأ عنكم يا منافقين، زي ما جا في الكتاب: هالشعب يكرمني بكلامه، لكن قلبه أبعد ما يكون.

⁷ عبادتكم ليي باطلة لأنكم تدرسوا تعاليم ما هي إلا وصايا الناس!

⁸ لأنكم أهملتوا وصية الله وتمسكتوا بتقاليد الناس!»

⁹ و قال ليهم: «أنتون رفضتوا وصية الله عشان تحافظوا على عاداتكم!

¹⁰ فإدا موسى قال: أكرم أبوك وأمك! و بعد: إلا يهين أبوه و أمه، عقابه من الله الموت!

¹¹ و لكن أنتون تقولوا: إدا قال أحد لأبوه أو أمه: إلا كنت أعيلكم به عطيته قربان - يعني تقدمة للهيكل-،

¹² فمعناتها خلاص ما سوا شي ينفع فيه أبوه وامه!

¹³ وبچدي أبطلتوا كلمة الله بتعليمكم التقليدي إلا تتناقلوه. وأمور واجد زي چدي تسوها!»

¹⁴ و لما عيط على الجماعة مرة ثانية، قال ليهم: «أسمعوني كلكم وافهموا!

¹⁵ ما في شي برا الإنسان، إدا دخله ينجسه. لكن الأشياء إلا تطلع من الإنسان، فهي إلا تنجسه.

¹⁶ إلا فيه أداين للسمع، خله يسمع!».

¹⁷ و لما راح عن الجماعة ودخل البيت، سألوه التلاميد عن مغزى المثل،

¹⁸ و قال ليهم: « أنتون بعد مو فاهمين؟ ما تستوعبوا إن كل شي من بره يدخل الإنسان ما يقدر ينجسه،

¹⁹ لأنه ما يدخل لقلبه لكن يدخل لبطنه، و بعدين يطلع إلى المجاري؟» و هدا الإ يخلي كل أنواع الأكل طاهرة.

²⁰ بعدين قال: «إلا يطلع من الإنسان، هو إلا ينجس الإنسان.

²¹ لأنه من داخل قلوب الناس، تنبع الأفكار الشريرة، الفسق، البوق، القتل،

²² الزنى، الطمع، الخبث، الخديعة، الدعارة، الحسد، التجديف، التكبر، والحماقة

²³ وهدي الأمور الشريرة كلها تنبع من داخل الإنسان وتنجسه».

إيمان المَرَة الكنعانية

²⁴ بعدين مشى يسوع من ديك المنطقة و راح منطقة صور. ودخل بيت و ماكان يمبى أحد يدري إنه دخله. و مع هدا ما قدر أن يظل متخفي.

²⁵ و في مرة سمعت عنه، و كان في بتها الصغيره روح نجسة، وجت له تركض ورمت نفسها على رجوله،

²⁶ و هي كانت مرة يونانية، من أصل سوري فينيقي، وتوسلت له إن يطرد الجني من بتها.

²⁷ و لكن هو قال ليها: «خلي الأولاد ياكلوا أول و يشبعوا!» لأن مو عدل إن ناخد خبز الأولاد ونعطيه للچلاب».

²⁸ وردت عليه: «كلامك صحيح يا سيد! و لكن الچلاب تحت الطاولة تاكل من فتات الأولاد!»

²⁹ و قال ليها: «بسبب كلمة الحق إلا قلتها روحي، لأن الجني طلع من بتش!»

³⁰ و لما رجعت بيتها، شافت بتها على السرير والجني طلع منها.

تشافي أصمخ و أطرم

³¹ بعدين طلع يسوع من نواحي صور ورجع إلى بحر الجليل، ومر على صيدا وعبر حدود المدن العشر.

³² و جابوا له واحد أصمخ و أغتم - لسانه مربوط، وتوسلوا له إن يحط إيده عليه.

³³ وأنفرد به بعيد عن الناس. وحط أصابعة في أداين الرجال، و بعدين تفل ولمس لسانه،

³⁴ ورفع عيونه للسما، وتنهد و قال له: «افَّاتَا!» يعني أنفتح.

³⁵ و على طول أنفتحت أداينه وأنحلت ربطة لسانه، وتكلم بفصاحة.

³⁶ و وصاهم إن ما يقولوا لأحد بإلا صار. و لكن كل ما وصاهم ما يقولوا، كانوا ينشروا الأخبار أكثر.

³⁷ وأستغربوا واجد، و قالوا: «وش عجب العجاب كل هدا إلا يسويه. هو يخلي الصمخان يسمعوا و الطرمان يتكلموا».