إنجيل مرقس 6 - Qatifi New Arabic Version / الترجمة العربية القطيفية الجديدة

نبي بلا كرامة

¹ وطلع يسوع من داك المكان ورجع بلدته، وتلاميده راحوا وياه.

² و لما جا يوم السبت، قام يعلّم في المعبد، و ناس واجد أستغربوا لما سمعوه، و قالوا: «من وين له هدا كله؟ وش هالحكمة الموهوبة له، وهالمعجزات الحاصلة على إيده؟

³ مو هدا ولد النجار وولد مريم، وأخو يعقوب ويوسي ويهودا وسِمعان؟ مو هو نفسه إلا خواته هني؟» چدي كانوا يشكوا فيه.

⁴ و لكن يسوع قال ليهم: «النبي ما يصير بلا كرامة إلا في بلدته، وبين قرايبه، و في بيته!»

⁵ و ما قدر أنه يسوي هناك أي معاجز، غير أنه لمسوا إيده عدد قليل من المرضى وشفاهم.

⁶ وتعجب من ضعف إيمانهم. و بعدين قام يروح القرى القريبة منهم و قام يعلمهم.

يسوع يرسل التلاميد الإطنعش

⁷ و بعدين نادى التلاميد الإطنعشر، و قام يرسلهم ثنين ثنين، وعطاهم سلطة على الأرواح النجسة،

⁸ ووصاهم أنهم ما يحملوا وياهم في الطريق شي إلا عصاية، و ما ياخدوا وياهم لا خبز ولا شنطة ولا فلوس في حزامهم،

⁹ و يلبسوا نعله و ياخدوا وياهم بس فسخه وحدة.

¹⁰ و قال ليهم: «أي بيت تدخلوه، أسكنوا فيه لحد ما تمشوا من هناك.

¹¹ و إدا ما كان في أحد يمبى يستقبلكم أو يسمعكم في مكان، لما تمشوا من داك المكان، أنفضوا التراب عن رجولكم شهادة عليهم».

¹² وراحوا يبشروا ويدعوا للتوبة،

¹³ وطردوا شياطين واجد، ومسحوا ناس واجد مرضى بزيت، وشفوهم.

قتل يوحنا المعمدان

¹⁴ وسمع الملك هِيرُودُسُ عن يسوع، لأن صار أسمه مشهور، و قالوا له ناس: «هدا شكله يوحنا المعمدان قام من بين الأموات، عشان چدي تصير على إيده هالمعجزات!»

¹⁵ وناس غيرهم قالوا: «هدا إيليا» وغيرهم قالوا: «هدا نبي زي باقي الأنبياء!»

¹⁶ و لكن هِيرُودُسُ، لما سمع كلامهم قال: «هدا هو يوحنا ماغيره!. إلا قطعت راسه، قام! »

¹⁷ و إلا صار أن هِيرُودُسُ أرسل ناس عشان يمسكوا يوحنا و يكلبچوه ويودوه السجن. لأن هِيِرُودُسُ تزوج هِيرُودِيَّا وهي كانت مَرْت أخوه فِيلِبُّسَ.

¹⁸ و يوحنا كان قايل له: «مايصر أنك تتزوج مرت أخوك!»

¹⁹ ولهالسبب كانت هِيرُودِيَّا حاقدة على يوحنا، وتتمنى أنها تقتله، و لكن ما قدرت.

²⁰ لأن هِيرُودُسُ كان يخاف ويهاب يوحنا لأنه كان يعرف إن رجال طيب وقديس، فكان محافظ على سلامته. ومع أنه كان متحير واجد من كلامه، لكن كان يحب يسمع له.

²¹ و بعدين جت فرصة يوم سوى هِيرُودُسُ عزيمة بمناسبة عيد ميلاده ودعى الكبارية المسؤولين ورؤساء الجيش - الألف جيش وكبار الناس في منطقة الجليل.

²² و داك اليوم دخلت بنت هِيرُودِيَّا وقامت ترقص، و أستانس هِيرُودُسَ والقاعدين وياه. و قال الملك للبنية: «أطلبي إلا تبغيه مني، وبعطيش وياه!»

²³ وحلف لها و قال: «بعطيش أي شي لو وش تطلبي مني، حتى لو نص مملكتي!»

²⁴ و قامت طلعت وسألت أمها: «وش أطلب؟» وقالت اليها أمها: «راس يوحنا المعمدان!»

²⁵ ورجعت على طول داخل وطلبت من الملك وقالت: «أمبى تعطيني الحين راس يوحنا المعمدان على صحن!»

²⁶ و حزن الملك واجد. ولكنه عشان يسوي إلا حلف ليها عليه، و عشان ما يكسر كلمته قدام الحضور المجودين وياه.

²⁷ على طول رسل الملك سياف وأمره إن يجيب راس يوحنا و راح السياف و قطع راس يوحنا في السجن،

²⁸ و بعدين جا بالراس على صحن وعطاه البنية و ودته لأمها.

²⁹ و لما سمعوا تلاميد يوحنا بإلا صار، جو وأخدوا جثته، ودفنوه في قبر.

يسوع يْأَكِّلْ خمسة آلاف

³⁰ وتجمعوا الرسل عند يسوع، و قالوا له بكل شي سووه و وش علَّموا.

³¹ و قال ليهم: «تعالوا أنتون لوحدكم في مكان هادئ، وأستريحوا شوي». لأن الرايحين والجايين كانوا واجد و ما تركوا ليهم فرصة حتى ياكلوا.

³² وراحوا التلاميد في السفينة إلى مكان فاضي لوحدهم.

³³ لكن ناس واجد أنتبهوا ليهم رايحين، وعرفوا وين كانوا راحين، وراحوا سبقوهم طالعين من كل المدن يركضوا ويا بعض هناك على رجايلهم.

³⁴ و لما نزل يسوع من السفينة، شاف الجماعة وش كثرها وتحنن عليهم، لأنهم كانوا زي الغنم بدون راعي. و قام يعلمهم أشياء واجد.

³⁵ و لما فات وقت واجد من النهار، جو له تلاميده، و قالوا له: «المكان خالي، والنهار باقي شوي وينتهي.

³⁶ فخلي الجماعة يمشوا ويروحوا القرى والمزارع القريبة عشان يشتروا ليهم شي ياكلوه».

³⁷ و رد عليهم و قال: «أعطوهم أنتون شي ياكلوا!» و قالوا له: «تمبى نروح نشتري بميتين دينار خبز ونعطيهم ياكلوا؟»

³⁸ و قام سألهم: «كم قرص خبز عندكم؟ روحوا وشوفوا». و لما تأكدوا كم عندهم، قالوا: «خمسة و سمچتين!»

³⁹ وأمرهم أن يخلوا الجماعة يقعدوا في جماعات متفرقة على الحشيش الأخضر.

⁴⁰ وقعدوا في مجموعات و كل مجموعة فيها مية أو خمسين شخص.

⁴¹ وبعدين أخد يسوع أقراص الخبز الخمسة والسمجتين، وطالع في السما وبارك الاكل، وكسَّر الأقراص، وعطاهم تلاميده عشان يوزعوهم على الجماعة و قسمهم السمجتين بعد على الجميع.

⁴² و أكلوا كلهم وشبعوا.

⁴³ و بعدين جمعوا إطنعشر سله متروسة من بقايا الخبز وفضيل السمچ.

⁴⁴ وبالنسبة لعدد إلا أكلوا الخبز، فكانوا خمسة آلاف رجال.

يسوع يمشي على الماي

⁴⁵ و على طول أكد على لتلاميده أنهم يركبوا السفينة ويسبقوه إلى الجهة الثانية، إلى قرية بيت صيدا، عشان يمشِّوا الجماعة.

⁴⁶ و بعد ما مشاهم راح الجبل عشان يصلي.

⁴⁷ و لما جا الليل، كانت السفينة في وسط البحر، ويسوع وحدة على الساحل في البر.

⁴⁸ و لما شافهم متعدبين و هم يجدفوا، لأن الريح كانت عكسهم، جا ليهم يمشي على ماي البحر، تقريبًا الوقت كان في الهزيع الرابع ( يعني الربع الأخير) من الليل، و شوي و كان بمر جنبهم وبيتجاوزهم.

⁴⁹ لما شافوه يمشي على الماي، فكروه شبح و قاموا يصرخوا.

⁵⁰ لأنهم كلهم شافوه وختلعوا. لكن هو تكلم وياهم على طول و قال ليهم: «تشجعوا، أنا هو، لا تخافوا!»

⁵¹ وركب وياهم في السفينة وسكنت الريح. وأستغربوا مره!

⁵² و ما فهموا شي من معجزة أقراص الخبز، وقلوبهم صارت قاسية.

⁵³ و لما عبروا إلى الجهة الثانية، جو إلى أرض جَنِّيسَارَتَ، ورسَّوا السفينة.

⁵⁴ و لما نزلوا من السفينة، عرفوه الناس،

⁵⁵ ومروا في كل المناطق القريبة، و قاموا الناس يحملوا كل المرضى على منمتهم إلى أي مكان يسمعوا إن يسوع كان فيه.

⁵⁶ و كل ما دخل القرى أو المدن أو المزارع، صارو الناس يحطوا المرضى في وسط الساحات العامة ويخلوهم هناك، و قاموا المرضى يتوسلوا له إنهم يلمسوا ولو حتى طرف ثوبه. فكان كل من يلمسه يتشافى.