إنجيل مرقس 4 - Qatifi New Arabic Version / الترجمة العربية القطيفية الجديدة

مَثَل الفلاح

¹ بعدين قام يعلمهم مرة ثانية عند ساحل البحر، وتجمعوا حوله جماعة كبيرة من الناس، و من كثرهم قام راح ركب السفينة وقعد فيها و هو صار قاعد على السفينه فوق الماي، والجماعة كانوا كلهم قاعدين على رمل ساحل البحر.

² و علمهم حاجات واجد وضرب ليهم أمثال، و من الأشياء إلا قالها ليهم في تعليمه:

³ «أسمعوا! كان في مزارع و هالمزَّراع طلع عشان يزرع البدور.

⁴ و هو قاعد يزرع، طاحت شوية بدور على الممرات، و جت، الطيور وأكلتهم.

⁵ وشي منَّهم طاح على أرض صخرية تربتها رقيقة، و كبروا بسرعة لأن تربته ديك الأرض ما كانت غزيرة.

⁶ و لما طلعت الشمس، النبته أحترقت ويبست لأنها كانت مو متاصله عدل في التربة.

⁷ و طاحت بعد شويه بدور بين الأشواك، و نبت الشوك وخنق النبته إلا طلعت، و ما أثمرت.

⁸ و طاحوا بعد شوية حبوب على تربة خصبة، وطلعت النبته وكبرت وأثمرت، وبعضها جابت ثلاثين ضعف، وبعضها ستينن ضعف، وبعضها مية ضعف»

⁹ و بعدين قال: «إلا فيه أداين للسمع، خله يسمع!»

¹⁰ و لما كان يسوع قاعد لحاله، سألوه الناس إلا حواليه و من ضمنهم تلاميده الإطنعشر، عن معنى المثل.

¹¹ و قال ليهم: «أنتون يا أتباعي يحق ليكم أنكم تعرفوا سر ملكوت الله. و لكن الناس إلا بره الملكوت، فكل شي بينعطى ليهم بالأمثال زي الألغاز.

¹² لأنهم: نظر ينظروا ولا يشوفوا، وسمع يسمعوا ولا يفهموا، عشان لا يتوبوا وتنغفر ليهم خطاياهم!»

¹³ و قال ليهم: « إدا ما فهمتوا هالمثل؟ فچيفه أجل بتفهموا الأمثال الثانية؟

¹⁴ الفلاح هو إلا يزرع كلمة الله.

¹⁵ و الناس إلا على الممرات وين ما تنزرع الكلمة، هم الناس إلا توهم بس سمعوا الكلمة، والشيطان بيجي وبيخطف الكلمة إلا أنزرعت فيهم.

¹⁶ ونفس الشي الناس إلا بتنزرع فيهم الكلمة على أرض صخرية، هم الناس إلا أول ما يسمعوا الكلمة يقبلوها بفرح،

¹⁷ و لكن ما بتثيت لأن ما بتكون اليها أصل في ذواتهم، و بتظل مزروعة بس لوقت قصير، وبمجرد ما تحصل مضايقات أو أظهإدات بسبب الكلمة، بيتعثروا.

¹⁸ والبقية هم الناس إلا بتنزرع فيهم الكلمة بين الأشواك، و هذولا هم الناس إلا سمعوا الكلمة،

¹⁹ و لكن هموم الزمن الحاضر والغنى و الخداع والشهوات، بتدخل قلوبهم وأفكارهم وبتخنق الكلمة، وبتصير بلا ثمر.

²⁰ و لكن الناس لا بتنزرع فيهم الكلمة في أرض خصبة، فهدولين هم إلا بيسمعوا الكلمة وبيقبلوها و بيصيروا مثمرين، بعضهم بيجيب ثلاثين ضعف، وبعضهم ستين ضعف، وبعضهم مية ضعف».

فانوس على منارة

²¹ و بعدين قال ليهم: «الحين في أحد يجيب فانوس ويحطه تحت الطاولة أو تحت السرير؟ مو بحطه فوق المنارة له؟

²² ترا ما في شي مخفي إلا و راح ينكشف، و ما في شي مخشوش إلا و راح يصير في العلن!

²³ و إلا فيه أداين للسمع، خله يسمع!»

²⁴ و قال ليهم: «أتنبهوا للكلام إلا تسمعوه. ف بالكيل إلا تكيلوا به، بينكال ليكم وبينزاد ليكم بعد.

²⁵ و إلا عنده واجد، بينعطى أكثر، و إلا ما عنده شويه، حتى إلا عنده بينأخد منَّه».

مَثَل الزرع إلا تنمو

²⁶ و قال ليهم بعد: «ملكوت الله يشبه الإنسان إلا يرمي بدور على الأرض،

²⁷ و بعدين ينام في الليل ويقوم في النهار والبدور تنموا وتطلع النبته وتكبر، و هو ما يدري چيفه هالشي صار!

²⁸ والأرض هي من نفسها تعطي ثمر، وتطلع أول شي النبتة، و بعدين السنبلة، و بعدين قمح يترس السنبلة.

²⁹ و لكن وقت ما ينضج الثمر، بينقطف بالمنجل لأن وقت الحصاد جا».

مَثَل حبة الخردل

³⁰ و قال: «بويش نشبه ملكوت الله، وب ويش نمثله؟

³¹ نشبهه بحبة الخردل، بدرتها أصغر من أي بدور ثانية في الأرض،

³² و لكن لما تنزرع، تنبت وتطلع ليها أغصان كبيرة أطول من كل نباتات ألبستان، عشان طيور السما تقدر تبيت في ظلها».

³³ و يسوع كان يتكلم وياهم و يضرب للجماعة أمثله واجد زي الأمثال إلا قالها، ويقعد يسولف وياهم على قد إلا يقدروا يسمعوه.

³⁴ و ما كان يكلمهم إلا بالأمثال. ولكنه كان يشرح كل شي بس لتلاميده لما يصير لوحده وياهم.

يسوع يْهَدي العاصفة

³⁵ و في داك اليوم، لما جا الليل، قال لتلاميده: «خلونا نعبر ل الجهة الثانية من البحر!»

³⁶ و لما مشوا الجماعة، قاموا التلاميد أخدوه وياهم في السفينة إلا كان قاعد عليها. و كان في بعد سفن ثانية.

³⁷ و هبت ريح قوية، والأمواج قامت تضرب السفينة لدرجة إن دخلها الماي و أتعبت ماي.

³⁸ و كان هو نايم في آخر السفينة على المخدة. وقعدوه من النوم و قالوا له: «يا مْعَلِّم، ما تشوفنا قاعدين ننهلك له؟»

³⁹ و قام أنتهر الريح، و قال للبحر: «أسكت، أنطم!» و سكتت الريح وصار المكان هدوء تام.

⁴⁰ و بعدين قال ليهم: « إلاويه أنتون خايفين چدي؟ چى ما عندكم إيمان؟»

⁴¹ و خافوا ماتوا خوف، و قالوا لبعض: «شمن هو دا، إلا حتى الريح والبحر يطاوعوه؟».