إنجيل مرقس 16 - Qatifi New Arabic Version / الترجمة العربية القطيفية الجديدة

القيامة

¹ و لما خلَّص يوم السبت، أشترت مريم المجدلية ومريم أم يعقوب و سالومة عطور عشان يروحوا ليسوع ويمسحوا جسمه عشان يدفنوه.

² و في اليوم الأول من الأسبوع، راحوا القبر بدري وقت شروق الشمس.

³ وكانوا يقولوا لبعض: «هدا منهو بيدحلب لينا هالحجرة من على باب القبر؟»

⁴ لكنهم طالعوا و ما شافوا إلا الحجرة منزاحة من مكانها مع أنها كانها كانت كبيرة واجد.

⁵ و لما دخلوا القبر، شافوا في الجهة اليمين واحد قاعد، لابس ثوب أبيض، وخافوا.

⁶ و قال ليهم: «لا تخافوا. أنتون جيتوا تدوروا يسوع الناصري إلا أنصلب. دكوها قام! ماهو هني. هدا هو المكان إلا كان محطوط فيه.

⁷ روحوا وقولوا لتلاميده، ولبطرس، إنه بيسبقكم إلى منطقة الجليل، وهناك بتشوفوه زي ما قال ليكم».

⁸ وقاموا هربوا من القبر، من الخوف و من الخلعة القوية إلا صابتهم. و ما قالوا شي لأحد، لأنهم كانوا خايفين.

يسوع يطلع لمريم المجدلية

⁹ و بعد ما قام يسوع في أول النهار في أول يوم من الأسبوع - يعني يوم الأحد- ظهر أول شي لمريم المجدلية -المره إلا طرد منها سبعة شياطين.

¹⁰ وراحت وبشرت إلا كانوا وياه، وهم كانوا ينوحوا ويصيحوا.

¹¹ و لما سمعوا بأنه حي وأنها شافته، ما صدقوا.

يسوع يظهر لتلميدين

¹² وبعدين ظهر بشكل ثاني لاثنين منهم و هم كانوا يمشوا رايحين لوحده من القرى.

¹³ وراحوا وبشروا الباقين، و ما صدقوهم بعد.

يسوع يظهر لتلاميده

¹⁴ آخر شي ظهر للحدعشر تلميد لما كانوا قاعدين على الطاولة ياكلوا، ووبخهم على قلة إيمانهم وقساوة قلوبهم، لأنهم ما صدقوا إلا شافوه بعد قيامته.

¹⁵ و قال ليهم: «روحوا إلى العالم كله، وبشروا الخلق كلهم بالإنجيل:

¹⁶ إلا يآمن ويتعمد، ينجو، و ألا ما يآمن بيندان.

¹⁷ إلا آمنوا، بتلازمهم هدي المعاجز: بإسمي بيطردوا الشياطين وبيتكلموا بلغات جديدة عليهم،

¹⁸ وبيصيدوا حيات، و إدا شربوا شراب مسموم ما بيصير فيهم شي، وبيحطوا أياديهم على المرضى وبيتشافوا».

صعود الرب يسوع إلى السما

¹⁹ و بعد ما كلمهم الرب يسوع، أنرفع للسما، وقعد على يمين الله.

²⁰ و هم، وراحوا يبشروا في كل مكان، والرب شغال وياهم ويأيد الكلمة إلا يبشروا بها بالمعجزات إلا تصير.