إنجيل مرقس 14 - Qatifi New Arabic Version / الترجمة العربية القطيفية الجديدة

صب العطر على يسوع في بيت عنيا

¹ وكانوا أعياد عيد العبور وعيد الفطير بيجوا بعد يومين، وللحين رؤساء الكهنة والكتبة يحاولوا إنهم يمكسوا عليه حاجة بمكر عشان يقتلوه.

² و قالوا: «لا يصير هالشي في العيد، عشان ما تصير بلبلة بين الشعب!»

³ و لما كان يسوع في بيت عنيا، متكي في بيت سمعان الأبرص، جت مرة حامله غرشة عطر ناردين الخالص و سعره واجد غالي، و قامت كسرت الغرشة و صبت العطر على راسه.

⁴ و تضايقوا بعض القاعدين في قلوبهم و قالوا: «ليش هالتبدير في العطر؟

⁵ لأنه يمكن ينباع هالعطر بأكثر من ثلاث مية دينار، وينعطى ثمنة للفقرا». و قاموا يلوموا المرة.

⁶ لكن يسوع قال: «أتركوها! ليش تضايقوها، هي سوت فيي عمل خير.

⁷ الفقرا وياكم كل وقت، ومتى ما بغيتوا، تقدروا تحسنوا ليهم. أما أنا فما باكون وياكم في كل الوقت.

⁸ وهي سوت إلا تقدر عليه، و قامت عطرت جسمي وجهزته حق الدفن.

⁹ بأمانة أقول ليكم: في كل مكان في العالم بيصير فيه التبشير بالإنجيل، بيندكر إلا سوته هدي المرة، إحياء لذكرها!»

¹⁰ و بعدين راح يهودا الإسخريوطي، واحد من الإطنعشر تلميد، إلى رؤساء الكهنة عشان يسلم يسوع ليهم.

¹¹ و لما سمعوا بهالشي، فرحوا، ووعدوه إنهم يعطوه فلوس واجد. و قام يفكر كيف يسلمه، لما تجيه الفرصة المناسبة.

عشاء الرب

¹² و في اليوم الأول من أيام عيد الفطير، وفيه كان يذبحوا حمل عيد العبور، سألوه التلاميده: «وين تمبى تروح ونجهز لك أكل عيد العبور عشان تاكل؟»

¹³ وقام أرسل أثنين من تلاميده، و قال ليهم: «روحوا المدينة، و راح يلاقيكم هناك رجال يحمل جرة ماي، روحوا وياه.

¹⁴ و في المكان إلا يدخله، قولوا لراعي البيت. المعلم يقول: وين غرفتي إلا فيها بتعشى فيها عشى عيد العبور ويا تلاميدي؟

¹⁵ و بيراويكم غرفة كبيرة في الطابق الفوقي، مفروشة ومجهزة. وهناك جهزوا لينا العشاء!»

¹⁶ وراحوا التلاميد ودخلوا المدينة، وشافوا كل شيء زي إلا قال ليهم. وهناك جهزوا أكل عيد العبور.

¹⁷ و لما جا الليل، جا يسوع ويا الإطنعشر تلميد.

¹⁸ و هم كانوا متكيين ياكلوا، قام قال يسوع: «بأمانة أقول ليكم: إن واحد منكم بيسلمني، و هو الحين قاعد ياكل وياي».

¹⁹ ونزل عليهم هم وحزنوا، و قاموا يسألوه الواحد بعد الثاني: «هل هو أنا؟»

²⁰ ويسوع جاوبهم و قال: «هو واحد من التلاميد الإطنعشر، و هو إلا يغمس وياي في الصحن.

²¹ إبن الإنسان لازم يروح زي ما هو مكتوب عليه، و لكن الويل لذاك الرجال إلا على إيده بيتسلم إبن الإنسان. كان أحسن لذاك الرجال لو أنه ما نولد!»

²² و لما كانوا ياكلوا، أخد يسوع قرص خبز، وباركه، وقطعه وعطاهم منه و قال: «إخدوا: هدا هو جسمي».

²³ و بعدين أخد الكاس، وشكر، وعطاهم، وشربوا منه كلهم،

²⁴ و قال ليهم: «هدا هو دمي للعهد الجديد، إلا بينسفك عشان ناس واجد.

²⁵ بأمانة أقول ليكم: ما بشرب من نتاج كَرمة العنب أبد، إلى داك اليوم إلا أشرب فيه كأس جديد في ملكوت الله».

²⁶ و بعدين رتلوا وسبحوا الله، وراحوا طلعوا برا لجبل الزيتون.

يسوع يخبر عن إنكار بطرس له

²⁷ و قال ليهم يسوع: «كلكم بتشكوا، لأنه مكتوب: بضرب الراعي، وبتتشتت الخرفان.

²⁸ و لكن بعد قيامتي، بسبقكم إلى منطقة الجليل».

²⁹ و لكن بطرس قال له: «لو الكل يشك، أنا مستحيل باشك».

³⁰ ورد عليه يسوع وقال : «بأمانة أقول لك: إنك اليوم، و في هدي الليلة، قبل ما يصيح الديج مرتين، بتكون أنكرتني ثلاث مرات».

³¹ لكن بطرس قام يأكد له أكثر ويقول: «حتى لو يموتوني وياك، ما بنكرك أبد!» و التلاميد كلهم قالوا له زي كلام بطرس.

جثسيماني

³² ووصلوا إلى بستان، أسمه جثسيماني، و قال يسوع لتلاميده: «قعدوا هني عشان أصلي».

³³ و كان ماخد وياه بطرس ويعقوب ويوحنا، وبدا يحس بالرهبة وبالكآبة.

³⁴ و قال ليهم: «نفسيتي حزينة حدي، باموت. ظلوا هني و أسهروا وياي».

³⁵ و بعدين أبتعد عنهم شوي، وطاح على الأرض، و قام يصلي عشان يمر الوقت بسرعة إدا هالشي كان ممكن.

³⁶ و قال «أبا، يا أبويي، كل شي ممكن ومستطاع عندك. باعد عني هالكاس، وخلي يصير مو إلا أنا أمباه، لكن إلا أنت تمباه!»

³⁷ و بعدين رجع و شاف تلاميده نايمين، و قال لبطرس: «أنت نايم يا سمعان؟ ما قدرت تسهر حتى لو ساعة وحدة؟

³⁸ أسهروا وصلوا عشان ما تدخلوا في تجربة. لأن الروح مصحصحة، لكن الجسد ضعيف».

³⁹ و بعدين راح وصلى مرة ثانية، وردد نفس الكلام.

⁴⁰ و لما رجع، شافهم بعد نايمين لأن النعسة ثقلت على عيونهم، و ما عرفوا كيف يجاوبوه.

⁴¹ و بعدين رجع للمرة الثالثة و قال ليهم: «ناموا الحين وأستريحوا. بس! جا الوقت المحدد. هدا هو إبن الإنسان بيتسلم لإيد الخاطئين.

⁴² قوموا خلينا نروح. دكوا قرب إلا بيسلمني!»

أعتقال يسوع

⁴³ و على طول، و لما كان يتكلم، وصل يهودا، واحد من التلاميد الإطنعشر، و وياه حشد حاملين السيوف والعصي، و ألا أرسلوهم رؤساء الكهنة والكتبة والقادة.

⁴⁴ و كان إلا سلمه عطاهم علامة و قال: «إلا أبوسه، فهدا هو. و مسكوه وحطوا عليه حارس وأخدوه ».

⁴⁵ و لما وصل يهودا، تقرب منه، و قال: «يا معلم!» وباسه بحرارة.

⁴⁶ ومسكوه.

⁴⁷ لكن واحد من الواقفين هناك، سحب سيفه وضرب عبد رئيس الكهنة وقص أدونه.

⁴⁸ و قال ليهم يسوع : «چى طالعين عشان تمسكوني بالسيوف والعصي زي ما تمسكوا الحرامي؟

⁴⁹ كنت كل يوم وياكم أعلم في الهيكل، و ما جيتوا مسكتوني. و لكن هدا قاعد يصير عشان أتم الكلمة إلا مكتوبة في الكتاب».

⁵⁰ و وقتها تركوه الكل وهربوا.

⁵¹ وتبعه شاب مو لابس إلا وزار مصنوع من الكتان على جسمه العاري، و مسكوه.

⁵² و ترك الوزار وهرب منهم مفصخ.

يسوع قدام مجلس اليهود

⁵³ وجرجروا يسوع لرئيس الكهنة. وتجمعوا عنده كل رؤساء الكهنة والقادة والكهنة.

⁵⁴ و لحقه بطرس من بعيد لداخل قاعة رئيس الكهنة، و كان قاعد ويا الحراس يتدفى عند النار.

⁵⁵ و قاموا رؤساء الكهنة والمجلس الأعلى كلهم يتصيّدوا شهادة على يسوع عشان يقتلوه، و ما حصلوا.

⁵⁶ لأن واجد شهدوا عليه زور، و لكن شهاداتهم كانت متناقضة.

⁵⁷ و بعدين قاموا بعضهم وشهدوا عليه زور و قالوا:

⁵⁸ «سمعناه يقول: بأهدم هدا الهيكل إلا صنعته الأيادي، و في ثلاثة أيام ببني هيكل ثاني ما صنعت زيه الأيادي».

⁵⁹ و لكن حتى في هدا الكلام؛ كانت شهادتهم متناقصة.

⁶⁰ و وقف رئيس الكهنة في وسط المجلس وسأل يسوع: «ما عندك شي ترد عليهم به؟ هديلا بويش يشهدوا عليك؟»

⁶¹ ولكنه ظل ساكت و ما جاوب بشي. ورجع رئيس الكهنة يسأله، و قال: «هل أنت المسيح، إبن الله المبارك؟»

⁶² و قال يسوع: «أنا هو. و راح تشوفوا إبن الإنسان قاعد على يمين القوة، و بعدين جاي على سحاب السما!»

⁶³ وقام رئيس الكهنة و شقق ثيابه، و قال: «بعد ما لينا حاجة بشهود.

⁶⁴ سمعتوا كلام الكفر والإفتراء: وش رايكم؟» وقام حكم الكل عليه، بالموت.

⁶⁵ و قاموا بعضهم يتفلوا عليه، ويغطوا وجهه ويلطموه ويقولوا له: «تنبأ!» و قاموا الحراس يصفعوه على وجهه.

بطرس ينكر يسوع

⁶⁶ و لما كان بطرس تحت في القاعة، جت وحدة من خدامات رئيس الكهنة،

⁶⁷ و لما شافت بطرس يتدفى، طالعت فيه وقالت: «أنت كنت ويا يسوع الناصري!»

⁶⁸ لكنه چدب و قال: «لا أنا عارف ولا أنا فاهم وش تقولي!» و بعدين طلع برا عند المدخل. و صاح الديج

⁶⁹ و لما شافته الخدامة مرة ثانية، قامت تقول للواقفين هناك: «هدا واحد منهم!»

⁷⁰ و أنكر مرة ثانية. و بعد شوي، قالوا الواقفين هناك لبطرس: «مبين أنت واحد منهم، لأنك جليلي».

⁷¹ و هو قام يلعن ويحلف: «أنا ما أعرف هدا الرجال إلا تتكلموا عنه».

⁷² وصاح الديج مرة ثانية و تذكر بطرس إلا قال له يسوع : «قبل ما يصيح الديج مرتين، بتكون أنكرتني ثلاث مرات». ويوم فكر في كلام يسوع قام يصيح.