إنجيل مرقس 12 - Qatifi New Arabic Version / الترجمة العربية القطيفية الجديدة

مَثَل الفلاحين

¹ و قام يكلمهم بالأمثال، و قال: «في إنسان غرس عنب، وحاوطه بسور، وحفر فيه حوض عشان يعصر فيه العنب، وبنى فيه برج حراسة. و بعدين سلم مزارع العنب إلى الفلاحين، وسافر.

² و في موسمه، رسل إلى الفلاحين عبد عشان يستلم منهم حصته من ثمر العنب.

³ لكنهم مسكوه و طاحوا فيه ضرب ورجعوه و أياديه فاضية.

⁴ ورجع ورسل ليهم عبد ثاني، و ضربوه على راسه و وشقو راسة ورجعوه مذلول.

⁵ و بعدين رد رسل ليهم واحد ثاني و قاموا قتلوه. و بعدين رسل ناس واجد، بعضهم ضربوهم وبعضهم قتلوهم.

⁶ و وقتها كان عنده ولد وحيد و كان يحبه واجد، و قام آخر شي رسله ليهم، و قال: أكيد هالمره بيخافوا من ولدي!

⁷ و لكن الفلاحين قالوا لبعض: دا هو الوريث جا، تعالوا خلونا نقتله وناخد الورث!

⁸ فمسكوه وقتلوه ورموه برا مزرعة العنب.

⁹ فويش بيسوي صاحب مزرعة العنب؟ بيجي ويهلك الفلاحين، وبيعطي زراعة العنب لأحد غيرهم.

¹⁰ چى ما قريتوا هدي الآية المكتوبة: الحجر إلا رفضوه البنايين، هو نفسه صار حجر الزاوية.

¹¹ هدا الشي من الرب، و هو في نظرنا شي عجيب!»

¹² و قاموا يحاولوا يمسكوه، ولكنهم خافوا من الناس، لأنهم عرفوا إن كان يقصدهم بهدا المثل. وبعدين تركوه وراحوا.

دفع الجزية للقيصر

¹³ بعدين رسلوا له جماعة من الفريسيين وأعضاء حزب هيرودُس، عشان يمسكو عليه كلمة يقولها.

¹⁴ و جوا له و قالوا: «يا معلم، أحنا ندري إنك صادق، و ما تخاف من أحد، لأنك ما تهتم بمقامات الناس، لكن تعلِّم طريق الله بالحق: هل يجوز لينا ندفع الجزية للقيصر أو لا؟ ندفعها أو ما ندفعها؟»

¹⁵ و لأنه كان يعرف إن هدا نفاق منهم و قال ليهم: «إلاوية قاعدين تختبروني؟ جيبوا ليي دينار عشان أشوفه!»

¹⁶ وجابوا له دينار، و سألهم: « لمن هدي الصورة وهدا الكلام المحفور؟» و قالوا له: «للقيصر».

¹⁷ و رد عليهم و قال: «أعطوا إلا لقيصر لقيصر، و إلا إلى الله لله!» وأستغربوا من كلامه.

الزواج في القيامة

¹⁸ و جوا له بعض الصدوقيين إلا ما يؤمنوا بيوم القيامة، وسألوه و قالوا:

¹⁹ «يا معلم، كتب لينا موسى: إدا مات لواحد أخو وترك زوجته من بعده و ما كان عنده أولاد، فمن الواجب على أخوه يتزوج بأرملت أخوه ويقيم نسل على إسم أخوه.

²⁰ و كان في سبعة إخوة، تزوجها واحد منهم ومات و ما جاب منها أولاد،

²¹ وأخدها الثاني و بعدين مات و هو بعد ما جاب منها أولاد، و بعدين سوى الثالث نفس الشي.

²² و على هالحاله تزوجوها السبعة الأخوه و ما جابوا منها أولاد. و بعدين ماتت المرة بعد ما كلهم ماتوا.

²³ ف في يوم القيامة، لما يقوموا من بين الأموات، هالمره تصير زوجة من، لأنها كانت زوجة ليهم كلهم السبعة؟»

²⁴ و رد عليهم يسوع و قال: «أنتون في ضلال لأنكم ما تفهموا الكتاب ولا قدرة الله؟

²⁵ و لما يقوموا الناس من بين الأموات، ما بيتزوجوا، لكن بيصيروا زي الملائكة إلا في السماوات.

²⁶ وعن موضوع قيامة الأموات، چى ما قريتوا في كتاب موسى، في الحديث عن العليقة، كيف كلمه الله و قال: أنا إله إبراهيم وإله إسحاق وإله يعقوب؟

²⁷ فهو مو إله أموات، لكن هو إله حيين. معناتها أنتون في ضلال عظيم!»

الوصية العظمى

²⁸ وجا له واحد من الكتبة لأن سمعهم يتجادلوا، وشاف إن رد عليهم رد قوي، و قام سأله: «أي وصية أهم وحدة بين الوصايا؟»

²⁹ و قال له يسوع: «أهم الوصايا كلها هي: أسمع يا إسرائيل، الرب إلهنا هو رب واحد،

³⁰ حب الرب إلهك من كل قلبك و من كل نفسك و من كل فكرك و من كل قوتك.

³¹ و في وصية ثانية زيها، وهي إنك تحب الناس إلا حواليك زي ماتحب نفسك. و ما في وصايا أعظم من هدولين الوصيتين».

³² و قال له الكاتب: «صحيح، يا معلم! تكلمت حسب الحق. الله واحد و ما في غيره أحد.

³³ والمفروض نحبه من كل قلوبنا و من كل فكرنا و من كل قوتنا، ونحب الناس إلا حوالينا زي ما نحب أنفسنا، و كل هدا بالنسبه للرب أحسن من كل المحرقات والدبايح!»

³⁴ و لما شافه يسوع جاوب بحكمة، قال له: «أنت مو بعيد من ملكوت الله!» و بعدين ماحد تجرأ يوجه له أي سؤال.

المسيح وداوُد

³⁵ و لما كان يسوع في الهيكل يعلم، قال: «كيف يقولوا الكتبة إن المسيح هو إبن داوُد؟

³⁶ حتى داوُد نفسه قال بقيادة الروح القدس: "قال الرب لربي: أقعد على يميني عشان أخلي أعدائك مداس لرجايلك!"

³⁷ مدام داوُد نفسه يدعوه الرب فكيف يكون أبنه؟» وكانت الجماعة كبيرة وتسمعه بكل فرح وسرور.

التحدير من الكتبة

³⁸ و قال ليهم في تعليمه: «أحدروا من الكتبة إلا يحبوا الدوارة بالثياب الفضفاضة، والناس تسلم عليهم وتحييهم في الساحات العامة،

³⁹ و دايما يقعدوا في بداية المعابد، وأماكن الصدارة في العزايم.

⁴⁰ يبوقوا ويلهفوا بيوت الأرامل، ويتفاخروا بالتطويل في الصلوات. هدولين الناس بتنزل عليهم أقسى اللعنات!»

تقدمة الأرملة

⁴¹ و لما قعد يسوع قبال صندوق الصدقات إلا في الهيكل، شاف كيف الناس يحطوا الفلوس في صندوق الصدقات و العطايا. وناس واجد من الأغنياء حطوا فلوس واجد.

⁴² و بعدين جت أرملة فقيرة ورمت فلسين يساووا ربع دينار.

⁴³ وعيط على تلاميده و قال ليهم: «بأمانة أقول ليكم: إن هدي الأرملة الفقيرة حطت فلوس أكثر من كل إلا حطوا في هالصندوق:

⁴⁴ لأن كلهم حطوا من الفايض عن حاجتهم، لكن هي حطت كل إلا عندها و من حاجتها، أصلا حطت معاشها كلها!»