الإنجيل زي ما كتبه مَتَّى 9 - Qatifi New Arabic Version / الترجمة العربية القطيفية الجديدة

يسوع يشفي واحد مشلول

¹ و بعدين ركب يسوع السفينة، وعبر البحر راجع إلى قريته (كفرناحوم)،

² و جوا له ناس حاملين واحد مشلول و منبطح على منامة. و لما شاف يسوع إيمانهم، قال للمشلول: "أتطمن يا ولدي! أنغفرت لك خطاياك"

³ فقالوا بعض الكتبة بينهم وبين نفسهم: "هدا كفر"

⁴ وعرف يسوع إلا كانوا يفكروا فيه، قام سألهم: "ليش تفكروا بالشر في قلوبكم؟

⁵ أيهو أسهل: إن ينقال له: أنغفرت لك خطاياك، لو ينقال له: قوم و أمشي؟

⁶ ولكني قلت هالشي عشان تعرفوا إن إبن الإنسان عنده سلطة لغفران الخطايا على الأرض. وقتها قال للمشلول: "قوم وأحمل منامك، وروح بيتك"

⁷ و قام و راح بيته.

⁸ فلما شافوا جماعة الناس إلا صار، ماتوا من الخوف، ومجدوا الله أن أعطى الناس هالسلطان.

دعوة مَتَّى

⁹ و لما كان يسوع مار قريب من مكتب إلا يشتغلوا في الضرايب، شاف واحد يشتغل في الضرايب أسمه مَتَّى قاعد هناك. و قام قال له: "أتبعني و قام وتبعه.

¹⁰ و لما كان يسوع متكي في بيت مَتَّى، جو ناس واجد من إلا يشتغلوا في الضرايب و الناس العاصين، وقعدو وايا يسوع وتلاميده.

¹¹ و لما سمعوا الفريسيين هالشي، قالوا لتلاميده، " إلاويه ياكل معلمكم ويا إلا يشتغلو في الضرايب و الناس الخاطين؟"

¹² و لما سمع يسوع كلامهم، قال ليهم: " الناس السليمة ما يحتاجوا لدكتور، لكن المرضى هم إلا يحتاجوا لدكتور!

¹³ روحوا وتعلموا معنى هالكلام: أنا طالب رحمة مو دبيحة، أنا ما جيت عشان أدعي الصالحين لكن جيت عشان أدعي الخاطئين!"

الكلام عن الصوم

¹⁴ بعدين جو تلاميد يوحنا إلى يسوع يسألوه: "ليش أحنا و الفريسيين نصوم، و تلاميدك ما يصوموا؟"

¹⁵ و رد عليهم يسوع: "چى بعد يقدروا أهل المعرس يحزنوا ما دام المعرس وياهم؟ لكن، بتجي أيام يكون فيها المعرس أنرفع من بينهم، فديك الحزة بيقوموا يصوموا

¹⁶ ما أحد يرقع ثوب قديم برقعة من خَلَق جديد، و إلا بعدين الرقعة الجديدة تنكمش وبتاكل من الثوب القديم، ويصير الخرق أعظم من قبل!

¹⁷ والناس ما تحط الخمر الجديد في قربة الجلد القديمة، و إلا قربة الجلد بتنفجر، وبينكت الخمر وبتخترب القربة، لكن ينحط الخمر الجديد في قربة جلد جديدة، فبيسلم الخمر وبتسلم القربة."

بنية ميتة ومرة مريضة

¹⁸ و لما كان يقول هدا الشي، و إلا رئيس المعبد قرب منه وسجد له و قال:" بتي توها ماتت. و لكن عاد تعال الحين والمسها بإيدك عشان تعيش."

¹⁹ فقام يسوع راح وياه و راحوا وياه تلاميده.

²⁰ و إلا بجيه مره مريضة بنزيف دم من إطنعشر سنة، قربت منه من ورا، ولمست طرف ثوبه،

²¹ لأنها قالت في نفسها: "يكفي لو المس ثيابه عشان أتشافى!"

²² والتفت يسوع و شافها، و قال: "أطمني يا بتي. إيمانش شفاش!" فتشافت المره من ديك اللحظة.

²³ و لما دخل يسوع بيت رئيس المعبد، وشاف الناس تعزف بالمزمار والناس هايجين،

²⁴ قال ليهم: "أطلعوا بره! البنية ما ماتت، ولكنها نايمة!" فقاموا يضحكوا عليه.

²⁵ ويوم طلعوا الجماعة، دخل يسوع و مسك إيد البنية، وقامت.

²⁶ وأنتشر هدا الخبر في كل البلد.

يسوع يشفي أثنين عميان وأغتم

²⁷ و لما طلع يسوع طالع من هناك، لحقوه أثنين عميان يصرخوا ويقولوا: "أرحمنا يا إبن داوُد!"

²⁸ و لما دخل يسوع البيت قربوا منه. وسألهم : " أنتون تآمنوا بأني أقدر أسوي هالشي؟" وجاوبوه: "إي نعم يا سيد!"

²⁹ ولمس عيونهم و قال: "بصير ليكم إلا تبغوه حسب إيمانكم!"

³⁰ و أنفتحت عيونهم. وحذرهم يسوع و قال: "أنتبهوا! لا تقولوا لأحد بإلا صار!"

³¹ ولكنهم سووا العكس و راحوا ونشروا الخبر في كل البلد.

³² ويوم جا يسوع يطلع، جوه ناس بواحد أغتم ساكننه جني.

³³ و لما طرد الجني منه، تكلم الأغتم. وأستغروا جماعة الناس، و قالوا : "ما عمرنا شفنا شي زي چدي في إسرائيل."

³⁴ لكن الفريسيين قالوا: "هدا قاعد يطرد الجن برئيس الجن!."

العمال قليلين

³⁵ و قام يسوع يتنقل في كل المدن والقرى، يعلّم في معابد اليهود و يبشر بالملكوت، ويشفي كل مرض وعلة.

³⁶ و لما شاف جماعة ناس، حن قلبه وعطف عليهم، لأنهم كانوا هلكانين و مغلوب على أمرهم زي الغنم إلا بدون راعي.

³⁷ ووقتها قال لتلاميده: " الحصاد واجد، والعمال قليلين.

³⁸ أطلبوا من رب الحصاد أنه يرسل عمال إلى حصاده!"