الإنجيل زي ما كتبه مَتَّى 7 - Qatifi New Arabic Version / الترجمة العربية القطيفية الجديدة

الحكم على الغير

¹ لا تدينوا عشان لا أحد يدينكم،

² لأنكم بنفس الدينونة إلا تدينوا بها بتندانوا، وبالكيل إلا تكيلوا به بينكال ليكم.

³ ليش تشوف الشظية في عيون أخوك، و ما تشوف الحطبة الكبيرة إلا في عيونك؟

⁴ و ليش تقول لأخوك: خلني أشيل الشظية من عيونك، و هاديها حطبة وش قدها في عيونك!

⁵ يالمنافق، أول شي طلع الحطبة من عيونك، و بعدين إدا قدرت تشوف عدل شيل الشظية من عيون أخوك.

⁶ لا ترموا أشيائكم المقدسة للچلاب، ولا ترموا دُرركم عند الخنازير، عشان ما يدوسوها برجايلهم و ينقلبوا عليكم و ينهشوكم.

أسألوا، أطلبوا، دقوا

⁷ أسألوا، تنعطوا. أطلبوا، تحصلوا. دقوا الباب، وبينفتح ليكم.

⁸ كل من يسأل، ينال، و ألا يطلب يحصل، و ألا يدق الباب، ينفتح له.

⁹ و إلا، أي واحد فيكم لو طلب منه ولده خبزة، يعطيه حجرة؟

¹⁰ أو إدا طلب سمجة، يقوم يعطيه حية؟

¹¹ إدا أنتون الشرانيين، تعرفوا كيف تعطوا أولادكم هدايا عدلة، فمو من الأولى أن أبوكم السماوي يعطي إلا يطلبوا منه بعد هدايا عدلة؟

¹² عاملوا الناس زي ماتبغوهم يعاملوكم. هدي هي زبدة تعاليم التوراة والأنبياء.

الباب الضيق والباب الواسع

¹³ أدخلوا من الباب الضيق! لأن الباب إلا يودي للهلاك واسع وطريقة فسيح، و ناس واجد يدخلوا منه.

¹⁴ و ما أضيق الباب و ما أصعب الطريق إلي يوصل إلى الحياة! وقليلين إلا يهتدوا له.

الشجرة وثمرها

¹⁵ أحدروا من الأنبياء الدجالين إلا يجوا لكم لابسين ثياب الحملان، ولكنهم من الداخل ديابة مفترسة!

¹⁶ من ثمرهم تعرفوهم. فهل نقدر نجني من الشوك عنب، أو من نبتة السِّلة تين؟

¹⁷ و چدي كل شجرة زينة تنتج ثمر زين. وال الشجرة إلا موزينة، بتنتج ثمر مو زين.

¹⁸ مستحيل أن الشجرة الزينة تنتج ثمر ردي، ولا الشجرة الرديه تنتج ثمر زين.

¹⁹ و كل شجرة ماتنتج ثمر زين، بتنقطع وبتنرمى في النار.

²⁰ وبالهطريقة من ثمرهم تعرفوهم.

التلاميد الحقيقيين و التلاميد المزيفين

²¹ مو كل من قال ليي: يا رب، يا رب بيدخل ملكوت السماوات، لكن بس ألا يسوي إرادة أبويي إلا في السماوات.

²² في داك اليوم ناس واجد بيقولوا ليي: يا رب، يا رب، مو أحنا تنبأنا بإسمك، وبإسمك طردنا الشياطين، و سوينا بإسمك معاجز واجد؟

²³ لكن في يومها أقول ليهم: أنا ما عمري عرفتكم! تباعدوا عني يا إلشرانيين!

البناي الحكيم والبناي الجاهل

²⁴ كل من يسمع كلامي ويطبقه، يصير زي الرجال الحكيم إلا بنى بيته على الصخر،

²⁵ و لما نزل المطر، وجرت السيول، وهبت العواصف، وضربت داك البيت، بس ما طاح لأنه مأسس عدل على الصخر.

²⁶ و إلا يسمع كلامي ولا يطبقة، فهو زي الرجال الغبي إلا بنى بيته على الرمل،

²⁷ و نزل المطر، وجرت السيول، وهبت العواصف، وضربت داك البيت، وطاح طيحة، وكانت طيحته قوية."

²⁸ و لما خلص يسوع هالكلام، أستغربوا الناس المتجمعين من تعليمه،

²⁹ لأنه كان يعلمهم زي واحد صاحب سلطان، مو زي كتبتهم.