الإنجيل زي ما كتبه مَتَّى 6 - Qatifi New Arabic Version / الترجمة العربية القطيفية الجديدة

الصدقة

¹ أنتبهوا من إنكم تتقصدوا تسووا الخير قدام الناس بس عشان يشوفوكم: و إلا ترا أبوكم إلا في السماوات ما بيكافئكم خير.

² إدا تصدقت على أحد، لا تقعد تنفخ في البوق وتنشر الخبر، زي ما يسووا المنافقين في المعابد والشوارع عشان يمدحوهم الناس. بأمانة أقول ليكم: هم حصلوا جزاهم.

³ لكن أنت، لما تتصدق على أحد، لا تخلي حتى الإيد اليسار تعرف وش تسوي الإيد اليمين.

⁴ تصدق في السر، وأبوك السماوي إلا يشوف في السر، هو بيجازيك.

الصلاة

⁵ و لما تصلوا، لا تصيروا زي المنافقين إلا يحبوا أنهم يصلوا و هم واقفين في المعابد و في زوايا الشوارع عشان الناس تشوفهم. بأمانة أقول ليكم: چدي هم حصلوا على جزاهم.

⁶ لكن أنت لما تصلي، أدخل غرفتك، سكر عليك الباب، وصلي لأبوك إلا في السر. وأبوك إلا يشوف ألا صار في السر، هو إلا بيجازيك.

⁷ و لما تصلوا، لا تكرروا كلام فاضي زي ما يسووا الوثنيين، مفكرين إنهم بكثرة الكلام، بيستجاب ليهم.

⁸ لا تصيروا زيهم، لأن أبوكم يعرف أحتياجاتكم قبل ما تسألوه.

⁹ فصلوا زي هالصلاة: أبونا إلا في السماوات، يارب أسمك دايما يتقدس بين الناس.

¹⁰ و يارب يجي ملكوتك، و يارب تصير مشيئتك علي الأرض زي ما هي في السما.

¹¹ أعطينا الخبز ألا يكفينا اليوم،

¹² وأغفر لينا خطايانا زي ما أحنا نغفر عن إلي يغلطوا علينا.

¹³ ولا تسمح لينا ندخل في تجربة تغوينا، لكن نجينا من الشرير، لأن لك الملك و القوة و المجد الى الأبد. آمين.

¹⁴ و بعدين قال : إدا غفرتوا للناس زلاتهم، أبوكم السماوي يغفر ليكم زلاتكم.

¹⁵ و إدا ما غفرتوا للناس زلاتهم، ما بيغفر ليكم أبوكم السماوي زلاتكم.

الصوم

¹⁶ و لما تصوموا، لا تخلوا وجوهكم معفوسة، المنافقين بس هم إلا يغيروا وجوههم عشان يراووا الناس إنهم صايمين. بأمانة أقول ليكم إنهم حصلوا على جزاهم.

¹⁷ لكن أنت، لما تصوم، أغسل وجهك، ودهن راسك،

¹⁸ عشان ما تبين للناس إنك صايم، لكن بس لأبوك إلا في السر. وأبوك إلا يشوف في السر، هو إلا بيجازيك.

الكنوز في السما

¹⁹ لا تكنزوا ليكم كنوز على الأرض، مكان إلا يفسدها السوس والصدا، ويدوروا عنها الحرامية عشان يبوقوها.

²⁰ لكن أكنزوا ليكم كنوز في السما، مكان مايقدر السوس والصدا يوصل ليها، ولا يدروا عنها الحرامية عشان يبوقوها.

²¹ المكان إلي فيه كنزك، هناك بعد يكون قلبك!

²² العيون مصباح الجسد و إدا كانت عيونك سليمة، بيصير جسدك كله منور.

²³ و إدا ما كانت عيونك سليمة، بيكون جسمك كله مظلم. و إدا كان النور إلا فيك مظلّم، ف وش أشد من هالظلام!

²⁴ ما يقدر أحد يصير عبد لسيدين: لأنه يا إما يبغض واحد منهم ويحب الثاني، أو إنه يكرس حياته لواحد ويحقر الثاني. ما تقدروا تصيروا عبيد لله والفلوس في نفس الوقت.

لا تهتموا

²⁵ ولهدا الشي أقول ليكم: لا تشيلوا هم معيشتكم، وش تاكلوا وويش تشربوا، ولا لأجسامكم وش تلبسوا. مو الحياة أكثر من الأكل بس، والجسم أكثر من اللبس؟

²⁶ فكروا وتأملوا في طيور السما: لا تزرع ولا تحصد ولا تجمع أكلها في مخازن، وأبوكم السماوي هو إلا يعيلها. مو أنتون قيمتكم أحسن منها بواجد؟

²⁷ منهو فيكم إدا حمل كل هالهموم يقدر أن يطول في عمره حتى لو ساعة وحدة؟

²⁸ وليش تحملوا هم اللبس؟ فكروا وتأملوا في ورد ألبساتين و كيف ينمو مايتعب ولا يحرث

²⁹ ولكني أقول ليكم: حتى سليمان في قمة مجده ما لبس شي يعادل وحدة منها في جمالها!

³⁰ إدا كان الله يتكفل أنه يكسي الحشايش البرية، مع أنها اليوم موجودة وبكرا بتنرمى في النار- في الفرن، أنتون يا إلا إيمانكم ضعيف مو أولى من أن هو يوفر ليكم ملابس؟

³¹ لا تشيلوا هم وتقولوا: وش ناكل؟ أو: وش نشرب؟ أو: وش نلبس؟

³² هدي أمور يسعوا ليها أهل الدنيا. وأبوكم السماوي يعرف حاجتكم إلى كل هالأشياء.

³³ لكن أنتون، أطلبوا أول شي ملكوت الله وبره، كل هالأمور بتنعطى ليكم.

³⁴ لا تهتموا بأمور بكرا، لأن بكرا له نصيبه من الإهتمام. كل يوم يكفيه باللي فيه من مصايب!