الإنجيل زي ما كتبه مَتَّى 4 - Qatifi New Arabic Version / الترجمة العربية القطيفية الجديدة

إختبار يسوع في البرية

¹ و بعدين الروح ودّىَ يسوع للبر، عشان يختبره الشيطان

² و بعد ما صام يسوع أربعين يوم وليلة، أخر شي جاع،

³ وجا له إبليس و قال له: "لو كنت صحيح إبن الله، قول لهالحجارة تتحول إلى خبز!"

⁴ وجاوبه و قال: "مكتوب: مو بالخبز وحده يعيش الإنسان، و لكن بكل كلمة تطلع من بوز الله!"

⁵ بعدين أخده إبليس للمدينة المقدسة، وخلاه يوقف على حافة سطح الهيكل،

⁶ و قال له: "إدا كنت إبن الله، فارمي روحك تحت، لأنه مكتوب: يوصي ملائكته بك، ويحملوك بأياديهم عشان لا تصدم رجولك الحجر!"

⁷ و قال له يسوع: "ومكتوب بعد: لا تجرب الرب إلهك!"

⁸ بعدين أخده إبليس إلى قمة جبل مرتفع واجد، و راواه كل ممالك العالم بعظمتها،

⁹ و قال له: "بعطيك هدي كلها، إدا ركعت وسجدت ليي!"

¹⁰ و قال له يسوع: "روح عني يا شيطان! لأنه مكتوب: إلى الرب إلهك تسجد، و تعبده وحدة!"

¹¹ و راح عنه إبليس، و إلا شويه من الملائكة جو له يخدموه.

يسوع يبدي في التبشير

¹² و لما سمع يسوع أن أعتقلوا يوحنا، قام رجع إلى منطقة الجليل.

¹³ وترك الناصرة، و مشى و سكن في قرية كفرناحوم إلا تصير على ساحل البحر داخل حدود زبولون ونفتاليم، وسكن فيها،

¹⁴ و تحقق إلي أندكر على لسان النبي إشعياء يوم قال:

¹⁵ " أرض زبولون وأرض نفتاليم، على طريق البحيره إلا ورا نهر الأردن، بلد الجليل إلا يسكنوها شعب ماهم يهود

¹⁶ الشعب إلا قاعد في الظلام، بيشوف نور عظيم، و إلا قاعدين في أرض ظلال الموت، بيشرق عليهم نور!"

¹⁷ و من داك الوقت بدا يسوع يبشر ويقول: "توبوا، ملكوت السماوات قرب!"

دعوة التلاميد الأوليين

¹⁸ و لما كان يسوع يمشي على ساحل بحر الجليل، شاف أثنين أخوه، إلا هم سمعان - و ألا يسموه بطرس - وأخوه أندراوس و هم بحارين - صيادين سمچ، قاعدين يرموا الشبك في البحر.

¹⁹ قال ليهم يسوع: "يلا أتبعوني، عشان أخليكم تصيروا صيادين للناس!"

²⁰ قاموا و تركوا الشبك و تبعوه على طول.

²¹ ومشى من هناك وشاف أخوه أثنين غيرهم، إلا هم يعقوب و أخوه يوحنا أولاد زبدي، في السفينة ويا أبوهم يصلحوا شبكهم، نادى عليهم عشان يصيروا من أتباعه.

²² وتركوا السفينة وتركوا أبوهم، وتبعوه على طول.

يسوع يشفي المرضى

²³ و كان يسوع يتنقل من مكان لمكان في منطقة الجليل كلها، يعلم في معابد اليهود، وينادي ببشارة الملكوت، ويشفي الناس من الأمراض و العلل،

²⁴ وأنتشرت أخبار عنه و أشتهر وصار معروف في كل سوريا. و الناس جابوا له مرضاهم العليلين بأمراض وأوجاع مختلفة، والمسكونين بالشياطين، و ألا فيهم صرع، والمشلولين، وشفاهم كلهم.

²⁵ ولحقوه ناس واجد من مناطق الجليل، و المدن العشر، وأورشليم واليهودية و من المناطق إلا ورا نهر الأردن.