الإنجيل زي ما كتبه مَتَّى 3 - Qatifi New Arabic Version / الترجمة العربية القطيفية الجديدة

يوحنا المعمدان يجهز الطريق

¹ و في داك الوقت، ظهر يوحنا المعمدان في برية اليهودية، يبشر

² ويقول: "توبوا، هكو قرَّب ملكوت الله!"

³ ويوحنا هدا هو إلا جا دكره على لسان النبي إشعياء يوم قال: "صوت ينادي في البرية: جهزوا طريق الرب، وخلوا سبيله مستقيم!"

⁴ و كان يوحنا يلبس ثوب من وبر الجمال، ويلبس حزام من جلد، وياكل جراد وعسل بري.

⁵ فقاموا طلعوا له أهل أورشليم ومنطقة اليهودية كلها و كل القرى القريبة من نهر الأردن؛

⁶ كانوا يتعمدوا على إيده في نهر الأردن ويعترفوا بخطاياهم.

⁷ و لما شافوا الفريسيين و الصدوقيين ناس واجد يجوا ليوحنا عشان يعمدهم، قال ليهم: "يا أولاد الحيات، من حدركم عشان تهربوا من الغضب الجاي؟

⁸ أثمروا ثمر يستاهل التوبة.

⁹ ولا تفكروا بينكم وبين نفسكم وتقولوا: إبراهيم أبونا! لأني أقول ليكم: إن الله يقدر أن يطلع من هدي الحجارة أولاد لإبراهيم.

¹⁰ وهدكوا الفاس أنرمى على أصل الشجر، فكل شجرة ما تثمر ثمر زين لازم تنقطع وتنرمى في النار.

¹¹ باعمدكم بالماي عشان أتوبوا، و لكن إلا جاي بعدي هو أقدر مني، و أنا ما أستاهل حتى أحمل نعاله. هو بيعمدكم بالروح القدس، وبالنار.

¹² هو يحمل المذرى بيده، و راح ينقي عدل كل إلا حصده: فبيجمع قمحه في المخزن، لكن التبن بيحرقه بنار ما تنطفي!"

معمودية يسوع

¹³ و بعدين يسوع طلع من منطقة الجليل إلى نهر الأردن، و راح إلى يوحنا عشان يتعمد على إيده.

¹⁴ لكن يوحنا حاول يمنعه و قال له: "أنا إلا محتاج أني أتعمد على إيدك، وأنت جاي ليي!"

¹⁵ و يسوع رد عليه و قال: "أسمح ليي الحين بهالشي! بهالطريقة لازم نكمل كل تقوى وصلاح." و بعدين سمح له.

¹⁶ و لما تعمد يسوع، طلع من الماي و على طول السماوات أنفتحت له وشاف روح الله جاي مستقر عليه كأنه حمامة.

¹⁷ و إلا صوت من السماوات يقول: "هدا هو أبني الحبيب، إلا فرحتي به فرحة عظيمة!"