الإنجيل زي ما كتبه مَتَّى 26 - Qatifi New Arabic Version / الترجمة العربية القطيفية الجديدة

المؤامرة لقتل يسوع

¹ و لما خلص يسوع كلامه، قال لتلاميده:

² " أنتون عارفين أن بعد يومين بيجي عيد العبور، وبيتسلم إبن الإنسان عشان ينصلب."

³ و وقتها بيجتمعوا رؤساء الكهنة وقادة الشعب في بيت رئيس الكهنة وإسمه قيافا،

⁴ وتآمروا عشان يمسكوا يسوع بالسكته ويقتلوه.

⁵ و قالوا: " عشان لا يصير هالشي في يوم العيد، و ما تصير فوضى وبلبلة بين الشعب!"

مسح المسيح بالعطر

⁶ و لما كان يسوع في قرية بيت عنيا عند سمعان الأبرص،

⁷ جت له مره حامله غرشة عطر غالي، ويسوع كان قاعد، و راحت له وصبت العطر على راسه.

⁸ واتضايقوا التلاميد لما شافوا إلا صار، و قالوا : "وش هالتبدير؟

⁹ كان يمكن أن هالعطر ينباع بفلوس واجد، و ينعطى ثمنه للفقرا!"

¹⁰ و لما عرف يسوع إلا قالوه، قال ليهم: "إلاويه قاعدين تضايقوا المره، إلا سوته لي شيء جميل، وقصدته للخير."

¹¹ هدوهم الفقرا عندكم طول الوقت، لكن أنا ما بكون وياكم دايما.

¹² وهي يوم صبت العطر على كل جسمي، قصدت أنها تجهزني لدفني.

¹³ وبأمانه أقول ليكم: لما قصص هدا الإنجيل يتبشر بها في كل مكان في العالم، بيندكر إلا سوته هدي المره، إحياء لذكرها!"

يهودا يتفق على تسليم يسوع

¹⁴ ووقتها راح واحد من التلاميد الإطنعشر - و أسمه يهودا الإسخريوطي، إلى رؤساء الكهنة،

¹⁵ و قال ليهم: "كم بتعطوني عشان أسلمه ليكم؟" و وزنوا له ثلاثين قطعة فضة.

¹⁶ و من هداك الوقت، يهودا كان ينتظر الفرصة عشان يسلمه.

عشى الرب

¹⁷ و في اليوم الأول من أيام عيد الفطير، جو التلاميد إلى يسوع عشان يسألوه: "وين تمبى نجهز لك عشى عيد العبور عشان تاكل؟"

¹⁸ و رد عليهم يسوع، و قال : "أدخلوا المدينة، وروحوا إلى فلان وقولوا له: "المعلم يقول إن ساعتي قربت، وبسوي عيد العبور عندك ويا تلاميدي."

¹⁹ فسووا التلاميد إلا أمرهم به يسوع، وجهزوا عشى عيد العبور هناك.

²⁰ و في المغرب قعد يسوع ويا التلاميد الإطنعشر.

²¹ و هم قاعدين ياكلوا، قال ليهم: "بأمانة أقول ليكم: إن واحد منكم بيسلمني."

²² وحزنوا مره، و قام كل واحد منهم يسأله: "أنا هو إلا بسلمك يا رب؟"

²³ و رد عليهم و قال: "إلا بيغمس إيده ويايي في الصحن هو إلا بيسلمني."

²⁴ إبن الإنسان لازم بيروح زي ما هو مكتوب عليه، و لكن الويل لداك الرجال إلا على إيده بيتسلم إبن الإنسان. كان أحسن له لو ما نولد!"

²⁵ وسأله يهودا إلا بيسلمه: " تقصدني أنا يا معلم؟" و قال له: "أنت إلا قلت!"

²⁶ و هم قاعدين ياكلوا، أخد يسوع قرص خبز، وباركه وقطّع القرص وعطى التلاميد و قال ليهم: "خدوا كلوا، هدا هو جسمي."

²⁷ و بعدين أخد الكاس و شكر الله، وعطاهم و قال: "أشربوا منه كلكم."

²⁸ "هدا هوعهد دمي، عهد الدم إلا بيني وبينكم و إلا بينسفك لناس واجد بتنغفر خطاياهم."

²⁹ بس أنا أمبى أقول ليكم: إني ما بشرب من بعد هاليوم من ثمرة هالعنب إلين يجي اليوم إلا أشربه وياكم مره ثانية في ملكوت أبويي."

³⁰ و بعدين قاموا يرنموا ويسبحوا الله ويا بعض، و بعدين طلعوا وراحوا جبل الزيتون.

يسوع يتنبأ بإنكار بطرس له

³¹ و وقتها قال يسوع: " الليلة كلكم بتشكوا فيي وبتتركوني. لأنه مكتوب: "بضرب الراعي، وبتتشتت الخرفان."

³² و لكن بعد قيامتي، بسبقكم إلى منطقة الجليل."

³³ و رد عليه بطرس و قال: "وحتى لو الكل شك فيك، أنا ما باشك فيك!"

³⁴ و رد عليه يسوع و قال: "بأمانة أقول لك: الليلة، قبل ما يصيح الديج، بتكون نكرتني ثلاث مرات."

³⁵ و قال له بطرس: "حتى لو أضطريت أموت وياك، مستحيل أنكرك أبد!" و التلاميد كلهم قالوا نفس الكلام.

بستان جثسيماني

³⁶ و بعدين راح يسوع و التلاميد بستان، أسمه جَثْسَيْمَانِي، و قال ليهم: "أنتون أقعدوا هني، و أنا باروح هناك عشان أصلي."

³⁷ وأخد وياه بطرس وأولاد زبدي، وبدا يحس بالحزن والكآبة.

³⁸ و قال ليهم: "نفسي حزينة حدي حتى الموت. خليكم وياي هني و أسهروا ويايي!"

³⁹ وتباعد عنهم شوي، ورمى وجهه على الأرض و قام يصلي ويقول: "يا أبويي، إدا أمكن، طوّف عني هالكاس: و لكن ما أمبى مشيئتي تصير و لكن أمبى مشيئتك"

⁴⁰ ورجع إلى التلاميد و شافهم نايمين، و قال لبطرس: " لهدرجة ما قدرتوا حتى تسهروا وياي ولو ساعة وحدة؟

⁴¹ أسهروا وصلوا عشان ما تدخلوا في تجربه. الروح نشيطة، لكن الجسد ضعيف."

⁴² و راح مرة ثانية يصلي، و قال: "أبويي، إدا ما يصير أنك أتطوّف عني هالكاس، و كان لازم أشربه، خل تكون مشيئتك"

⁴³ ورجع للتلاميد، و شافهم نايمين بعد لأن النعسة ثقلت على عيونهم.

⁴⁴ فتركهم ورجع يصلي مرة ثالثة، و ردد نفس الكلام.

⁴⁵ و بعدين رجع إلى تلاميده و قال ليهم: "ناموا الحين وأستريحوا! جت الساعة، و راح يتسلم إبن الإنسان إلى إيد المدنبين.

⁴⁶ قوموا خل نروح. هاكوها قرب إلا بيسلمني!"

أعتقال يسوع

⁴⁷ و على طول، لما كان يتكلم، وصل يهودا، واحد من التلاميد الإطنعشر و وياه جماعة كبيرة رسلوهم رؤساء الكهنة وقادة الشعب حاملين سيوف وعصي.

⁴⁸ و إلا سلمه عطاهم علامة و قال: "إلا بابوسه، فهو هو؛ أقبضوا عليه!"

⁴⁹ وقرب من يسوع على طول و قال: "سلام يا معلمي!" وباسه.

⁵⁰ و قال له يسوع: " ياصديقي،يلا سوي إلا جيت عشان تسويه؟" فهجموا عليه الجماعة على يسوع و أعتقلوه.

⁵¹ و واحد من إلا كانوا ويا يسوع مد إيده وسحب سيفه، وضرب عبد رئيس الكهنة، وقص أدونه.

⁵² و قال له يسوع : "رجع سيفك مكانه! إلا يلجأ للسيف، بالسيف بيهلك

⁵³ أنت تفكر أني ما أقدر الحين أن أطلب من أبويي ويرسل ليي أكثر من إطنعشر جيش من الملائكة؟

⁵⁴ وهدا چيفه بعد بتم النبؤه إلا أندكرت في الكتاب و هو مكتوب إن إلا قاعد يصير الحين لازم بيصير؟"

⁵⁵ و بعدين يسوع قال للجماعة: "طلعتوا بالسيوف والعصي عشان تمسكوني كاني حرامي. هداني كنت وياكم كل يوم أعلم في الهيكل، و ما مسكتوني!

⁵⁶ و لكن كل هدا صار عشان أتم النبؤة إلا أندكرت في كتب الأنبياء" و وقتها كل التلاميد تركوه لحاله وهربوا!

المحكمة قدام المجلس اليهودي

⁵⁷ و ألا أعتقلوا يسوع، ودوه إلى رئيس الكهنة و كان أسمه قيافا، وهناك تجمعوا عنده الكتبة والقادة.

⁵⁸ ولحقه بطرس من بعيد إلى بيت رئيس الكهنة، و بعدين دخل داخل وقعد بين الحراس عشان يشوف وش نهاية هالموضوع.

⁵⁹ وانعقد المجلس من رؤساء الكهنة والقادة كلهم، و حاولوا يدوروا على يسوع شهادة زور عشان يحكموا عليه بالموت،

⁶⁰ ولكنهم ما قدروا يحصلوا شي، مع أنه حضروا شهود زور واجد. وآخر شي جو أشخاص أثنين

⁶¹ و قالوا: "هدا الرجال قال: أنا أقدر أهدم هيكل الله وأبنيه في ثلاثة أيام."

⁶² و وقف رئيس الكهنة وسأله: " لا تجاوب على إلا يشهدوا عليك بس جاوب هدولا الإثنين؟»

⁶³ و لكن يسوع ظل ساكت ورجع رئيس الكهنة يسأله: و قال: "حلفّتك بالله الحي أنك تقول لينا: هل أنت المسيح إبن الله؟"

⁶⁴ و رد عليه يسوع،و قال: "هدا أنت قلتها! وأقول ليكم بعد إنكم من الحين ورايح بتشوفوا إبن الإنسان جالس عن يمين القدرة و بعدين بجي على غيوم السما!"

⁶⁵ و قام شقق رئيس الكهنة ثيابه و قام يصرخ: "هدا قاعد يقول كلام كفر! بعد ما لينا حاجة شهود. وهداكم سمعتوا كلامه.

⁶⁶ وش رايكم؟" وردوا الجماعة: "الموت هي العقوبة إلا يستاهلها!"

⁶⁷ وتفلوا في وجهه، وضربوه، وفي ناس لطموه

⁶⁸ و قالوا: "تنبأ لينا، يا المسيح، منهو إلا ضربك!"

بطرس ينكر يسوع

⁶⁹ و في دالك الوقت كان بطرس قاعد في القاعة إلي برا، وجت له وحدة من الخدم وقالت له: "أنت كنت ويا يسوع الجليلي."

⁷⁰ وأنكر بطرس قدام الجميع و قال: "ما أدري عن وش تتكلمي أنتين!"

⁷¹ بعدين طلع و راح عند مدخل البيت، و عرفته خدامة ثانية، وقالت للحاضرين إلا هناك: "هدا كان ويا يسوع الناصري!"

⁷² وأنكر بطرس كلامها مرة ثانية وحلف و قال : "أنا ما أعرف منهو هالرجال!"

⁷³ و بعد شوي قربوا الواقفين هناك من بطرس و قالوا له: "إلا صحيح أنت واحد منهم، لهجتك واضحه!"

⁷⁴ و بعدين صار بطرس يلعن نفسه ويحلف ويقول: "أنا ما أعرف داك الرجال!" و على طول صاح الديج،

⁷⁵ وتذكر بطرس كلمة يسوع يوم قال له: "قبل ما يصيح الديج بتكون نكرتني ثلاث مرات." وطلع برا، و قام يصيح بمرارة وحسرة.