الإنجيل زي ما كتبه مَتَّى 21 - Qatifi New Arabic Version / الترجمة العربية القطيفية الجديدة

الدخول الانتصاري

¹ و لما قربوا يوصلوا أورشليم، وقفوا عند قرية "بيت فاجي"، عند جبل الزيتون، و قام رسل يسوع أثنين من تلاميده،

² و قال ليهم: "أدخلوا القرية المقابلة ليكم، وبتحصلوا حمار مربوط ووياه جحش، فلوا الربطة وجيبوهم ليي.

³ و إدا أعترض عليكم أحد، قولوا: الرب محتاجنهم. و على طول راحوا ."

⁴ وهدا الشي صار عشان يتم إلا جا دكره على لسان النبي يوم قال:

⁵ "بشروا بنت صهيون: هدوها ملكش جاي لش متواضع ووديع وراكب على حمار وجحش إبن أتان!"

⁶ و راح التلاميد ثنينهم، وسووا إلا أمرهم به يسوع،

⁷ وجابوا الحمار والجحش، وحطوا عليهم ثيابهم، وركب يسوع على الحمار وقعد على الثياب.

⁸ و قاموا ناس واجد يفرشوا الطريق بثيابهم، وناس يقطعوا أغصان الشجر، ويفرشوا بها الطريق.

⁹ و الناس إلا في المقدمة و إلا مشوا ورا يسوع ينادوا ويقولوا: "أوصنا لابن داوُد! مبارك الجاي بإسم الرب! أوصنا في الأعالي"

¹⁰ و لما دخل يسوع أورشليم، ضجت المدينة كلها، و قاموا يسألوا أهلها: "من هو هدا؟"

¹¹ وجاوبوهم الجماعة: "هدا هو يسوع النبي إلا من مدينة الناصرة إلا في منطقة الجليل."

يسوع في الهيكل

¹² و بعدين دخل يسوع الهيكل، وطرّد كل إلا كانوا يبيعوا ويشتروا، وقلّب طاولات إلا يصرفو العملات، وقلّب كراسي بياعين الحمام.

¹³ و قال ليهم: "مكتوب: إن بيتي بيت صلاة لكن أنتون سويتوه مغارة حرامية!"

¹⁴ و جوا له العميان والعرجان، وشفاهم.

¹⁵ و تضايقوا رؤساء الكهنة والكتبة لما شافوا المعاجز إلا سواها، والأولاد في الهيكل ينادوا: "أوصنا لابن داود!"

¹⁶ و قاموا سألوه: "أنت سامع وش قاعدين يقولوا ديلين؟" وجاوبهم يسوع: "إي نعم! ما عمركم قريتوا هالاية؟ : "من بوز الأطفال والرضع جهزت لنفسك تسبيحات "

¹⁷ و بعدين تركهم وطلع برا المدينة و راح قرية بيت عنيا، وبات فيها.

شجرة التين يبست

¹⁸ وفي اليوم إلا بعده، في نهار و هو راجع إلى المدينة، جاع.

¹⁹ و شاف شجرة تين وحيدة في الطريق، و قام توجه ليها، و لكن ما شاف فيه شيء غيرالورق، و قال ليها: "ما بيطلع منش ثمر للابد!" و يبست شجرة التين على طول.

²⁰ و لما شافوا التلاميد إلا صار، أستغربوا و قالوا: "هدا چيفه يبست شجرة التين بهالسرعة!"

²¹ و رد عليهم يسوع و قال: "بأمانة أقول ليكم: إدا صار عندكم إيمان و ما تشكوا، فانتون مو بس بتسوا إلا أنا سويته في شجرة التين بس، لكن حتى إدا قلتوا لهدا الجبل: أنقلع من مكانك وانرمي في البحر، بصير كل إلا تقولوه.

²² و كل إلا تطلبوه بالصلاة بإيمان، بتحصلوه."

سؤال عن سلطة يسوع

²³ و لما وصل الهيكل و قام يعلمهم، و جوا له رؤساء الكهنة وقادة الشعب، وسألوه: "بأي حق وأي سلطة تسوي إلا تسويه؟ و من عطاك هالسلطة؟"

²⁴ و رد عليهم يسوع و قال ليهم: "و أنا بعد أمبى أسألكم سؤال واحد، و إدا جاوبتوني بعدين بأقول ليكم بأي سلطة أسوي إلا أسويه:

²⁵ من وين جت معمودية يوحنا؟ من السما لو من الناس؟" فقاموا تشاوروا بينهم وبين بعض و قالوا: "إن قلنا له من السما، بيقول لينا: عجل ليش ما صدقتوه

²⁶ و إدا قلنا: من الناس نخاف يثوروا علينا الشعب، لأنهم كلهم مؤمنين أن يوحنا نبي."

²⁷ وردوا عليه و قالوا: "ما ندري!" و هو بعد رد عليهم و قال: "ولا أنا قايل ليكم بأي سلطة أسوي إلا أسويه."

زي الولدين

²⁸ " وش قولكم؟ كان في واحد عنده ولدين. و راح للأول و قال له: يا ولدي روح اليوم واشتغل في مزرعة العنب حقي!

²⁹ و رد عليه و قال: مانا رايح. و لكن بعدين ندم و راح.

³⁰ و بعدين راح الرجال إلى ولده الثاني و قال له نفس الكلام إلا قاله لولده الأول. وجاوبه: على أمرك يا سيدي! و لكن ما راح.

³¹ فأي واحد منهم سوا مشيئة الأبو؟" قالوا له: "الأول!" و قال ليهم يسوع: "بأمانة أقول ليكم: إن إلا يشتغلوا في مكتب الضرايب والزانيات بيسبقوكم في دخلتهم إلى ملكوت الله.

³² يوحنا جا لكم و هو ماشي في طريق الحق، و ما صدقتوه. لكن إلا يشتغلوا في مكتب الضرايب والزانيات صدقوه. و لما شفتوا إيمانهم، ما صار في تغير في قلوبكم وصدقتوه!

مثال الزارعين

³³ أسمعوا مَثَل ثاني: كان في صاحب مزرعة عنب، وحط حوالي المزرعة سور، وحفر فيها معصرة، وبنى فيها برج للحراسة. و بعدين سلم زراعة العنب إلى الفلاحين وسافر.

³⁴ و لما جا وقت الحصاد، رسل عبيده إلى الفلاحين عشان يستلموا الثمر

³⁵ و قاموا المزاراعين ضربوا واحد من العبيد، وقتلوا الثاني، ورجموا الثالث بالحجارة.

³⁶ بعدين رسل صاحب المزرعة مرة ثانية عدد أكبر من العبيد غير الأوليين. وسوى المزاراعين فيهم نفس الشي إلا سووه بالأولين.

³⁷ وآخر شي رسل ليهم ولده و قال هدا أكيد الحين بيخافوا من ولدي!

³⁸ و من شافوا المزاراعين الولد قاموا قالوا لبعض: هدا هو الوريث! تعالوا خل نقتله عشان ناخد ورثه.

³⁹ و قاموا مسكوه، ورموه برا مزرعة العنب وقتلوه!

⁴⁰ و لما يرجع ليهم صاحب مزرعة العنب، وش بيسوي فيهم؟"

⁴¹ وجاوبوه: "هالشرانيين، لازم يهلكهم شر الهلاك. و بعدين تتسلم مزرعة العنب إلى فلاحين ثانين يعطوه الثمر في أوانه."

⁴² و قال ليهم يسوع: "ما قريتوا في الكتاب: "الحجر إلا رفضه البنايين، هو نفسه صار حجر الأساس. هالشئ كان من الرب، و هو شي عجيب في نظرنا!"

⁴³ ولهدا السبب أقول ليكم: " إن ملكوت الله بينأخد من أياديكم وينعطى إلى شعب بينتج له ثمره.

⁴⁴ فأي واحد يطيح على هالحجر بيتكسر، و ألا يطيح عليه الحجر بكسره تكسير!"

⁴⁵ و لما سمع الكهنة و الفريسيين المثلين إلا ضربهم يسوع فهموا إنه يقصدهم.

⁴⁶ ومع إنهم كانوا يمبوا يعتقلوه، لكنهم كانوا خايفين من الجماعة لأنهم كانوا يعتبروه نبي.