الإنجيل زي ما كتبه مَتَّى 17 - Qatifi New Arabic Version / الترجمة العربية القطيفية الجديدة

التجلي

¹ و بعد ستة أيام، أخد يسوع بطرس ويعقوب ويوحنا أخوه، وركب وياهم على أنفراد على جبل مرتفع،

² وتجلى قدامهم، وشع وجهه نور زي الشمس، وصارت ثيابه بيضة زي النور.

³ وماشافوا إلا موسى وإيليا طلعوا ليهم، قاعدين يتكلموا ويا يسوع.

⁴ و قام بطرس يقول ليسوع: "يا سيد، مو أحسن لينا ننصب الخيام ونظل هني. و إدا بغيت، بنصب هني ثلاث خيمات: وحدة لك، ووحدة لموسى، ووحدة لإيليا!"

⁵ و هو بعدهو يتكلم، ماشافوا إلا غيمة مضوية ظللتهم، وجا صوت من الغيمة يقول: "هدا هو ولدي الحبيب إلا فرحت به أعظم فرحة. أسمعوا كلامه!"

⁶ و لما سمعوا التلاميد الصوت، خافوا حدهم، و طاحوا على وجوهم.

⁷ وقرب منهم يسوع ولمسهم و قال: "قوموا لاتخافوا!"

⁸ و قاموا رفعوا راسهم، و بس شافوا يسوع بروحه.

⁹ و هم نازلين من الجبل، وصاهم يسوع و قال ليهم: "لا تقولوا لأحد باللي شفتوه اليوم إلى غاية ما يقوم إبن الإنسان من بين الميتين."

¹⁰ وسألوا تلاميده: " إلاويه عجل يقولوا الكتبة إن لازم بيجي إيليا أول؟"

¹¹ و رد عليهم و قال: "أي، إيليا جي و على إيده بيتجدد كل شي.

¹² و أمبى أقول ليكم: إيليا جا، و لكنهم ما عرفوه، وسوّوا فيه إلا يمبوه. ونفس الشي بعد إبن الإنسان بيتعدب على إيدهم."

¹³ ووقتها فهموا التلاميد إنه كان يتكلم وياهم عن يوحنا المعمدان.

صبي فيه شيطان يتشافى

¹⁴ و لما وصلوا إلى جماعة الناس، جا رجال ليسوع، وركع قدامه،

¹⁵ و قال له: "يا سيد، أرحم ولدي لأنه مريض فيه صرع، و قاعد يتعدب عداب ما بعده عداب. و أحيانا يطيح في النار وأحيانا يطيح في الماي.

¹⁶ و وديته لتلاميدك، و ما قدروا يشفوه."

¹⁷ و رد عليه يسوع و قال: "يا الجيل الأعوج ومو المؤمن، إلى متى أنا بقعد وياكم؟ إلى متى بتحملكم؟ جيبوه ليي هني!"

¹⁸ وانتهر يسوع الجني، وطلع من الولد، وآنشفى الولد على طول.

¹⁹ وبعدين جو التلاميد ليسوع على أنفراد و سألوه: " إلاويه أحنا عجزنا إن نطّلع الجني؟"

²⁰ و قال ليهم: " بسبب قلة إيمانكم. بأمانة أقول ليكم: لو كان عندكم إيمان قد حبة الخردل، كان قدرتوا تقولوا لهالجبل: تحرك من هني إلى هناك، وبيتحرك، ولافي شيء بصير مستحيل عليكم.

²¹ أما هالنوع من الشياطين، فماينطرد إلا بالصلاة و الصوم."

يسوع يتنبأ مرة ثانية بموتته

²² و يوم كانوا متجمعين في الجليل، قال يسوع لتلاميده: " قريب بيتسلم إبن الإنسان إلى أيادي الناس،

²³ وبيقتلوه. و في اليوم الثالث بيقوم!" وتضايقوا مره.

ضريبة الهيكل

²⁴ و لما وصلوا إلى قرية كفرناحوم، جا إلا يشتغل في مكتب الضرايب حق الهيكل و قال إلى بطرس: "عاده معلمكم يدفع الضرايب إلا عليه للهيكل؟"

²⁵ و رد عليهم و قال : "إي يدفع!"، و لما دخل بطرس البيت، على طول يسوع سأله: "وش رايك يا سمعان: من من ياخد ملوك الأرض الجزية والضريبة؟ من عند أولادهم، لو ياخدوهم من عند الأجانب؟"

²⁶ و قال له بطرس: "من عند الأجانب." و قال له يسوع: "يعني أولادهم أحرار،

²⁷ شوف - عشان ما تصير مشكلة وياهم، روح بحيرة الجليل، و أرمي السنارة هناك، وصيد أول سمجة تطلع لك، و أفتح بوزها و بتحصل فيها قطعة نقد بقيمة أربعة دنانير، خدها وأدفع الضريبة عني وعنك!"