الإنجيل زي ما كتبه مَتَّى 16 - Qatifi New Arabic Version / الترجمة العربية القطيفية الجديدة

الفريسيين يطلبوا آية

¹ و جوا الفريسيين والصدوقيين إلى يسوع عشان يطيحوه في مشكلة، و قاموا طلبوا منه أن يراويهم دليل من السما.

² و قام قال ليهم: "إدا كانت السما حمرة صافية وقت الغروب، تقولوا: بيكون الجو حليو!

³ و إدا كانت السما حمرة متروسة غيوم في الصبح، تقولوا: اليوم بتمطر! فهدا أنتون تعرفوا حالة الطقس من منظر السما. و لكن علامات الأزمنة، منتون قادرين تعرفوها!

⁴ جيل شرير خاين يطلب آية، ما ببتنعطوا آية، غير آية النبي يونان." و بعدين مشى عنهم و راح في حال سبيلة.

خمير الفريسيين والصدوقيين

⁵ و لما وصل تلاميد يسوع الجهة الثانية من الساحل، كانوا ناسين إنهم يجيبوا وياهم خبز.

⁶ و قال ليهم يسوع: "أنتبهوا! خلوا بالكم من خمير الفريسيين والصدوقيين!."

⁷ و قاموا يقولوا لبعض: "يووو ما جبنا ويانا خبز!"

⁸ ودرى يسوع بإلا يفكروا فيه، و قال ليهم: "يا قليلين الإيمان، إلاويه تقولوا لبعض "يووو ما جبنا ويانا خبز!"؟

⁹ للحين مافهمتوا له، لحقتوا تنسوا أقراص الخبز الخمسة إلا شبّعت خمسة آلاف شخص، كم قفة جمعتوا من إلا بقّى منها؟

¹⁰ لو بعد نسيتوا أقراص الخبز السبعة إلا شبعّت أربعة آلاف شخص، كم قفة جمعتوا من إلا بقّى منها؟

¹¹ هدا چيفه للحين ما تفهموا إني ما كنت أقصد الخبز لما قلت ليكم: "خلوا بالكم من خمير الفريسيين والصدوقيين؟."

¹² وقتها فهموا التلاميد إنه ما كان يحذرهم من خمير الخبز، لكن كان يحذرهم من تعليم الفريسيين والصدوقيين.

أعتراف بطرس بالمسيح

¹³ و لما وصل يسوع نواحي قيصرية فيلبس، سألوه تلاميده: "وش يقولوا الناس عني من أكون، إبن الإنسان إه؟"

¹⁴ وجاوبوه: " في ناس يقولوا إنك يوحنا المعمدان، في ناس يقولوا إنك النبي إيليا، وناس ثانين يقولوا إنك إرميا، لو واحد من الأنبياء."

¹⁵ و قام سألهم: "وانتون، وش تقولوا عني؟ من أكون؟"

¹⁶ وجاوبه سمعان بطرس و قال: "أنت هو المسيح إبن الله الحي!"

¹⁷ و قال له يسوع: "هنيئا لك يا سمعان ولد يونا. مو من لحم ودم إلا أعلن لك هالشي، لكن أبويي إلا في السماوات.

¹⁸ و أنا بعد أقول لك: أنت بطرس - معنى أسمه "صخر." و على هدي الصخرة ببني كنيستي وأبواب الجحيم ما بتقدر عليها!

¹⁹ وبعطيك مفاتيح ملكوت السماوات: و كل إلا تربطه على الأرض، يكون أنربط في السما، و إلا تحله على الأرض، يكون أنحل في السما!"

²⁰ بعدين حدر تلاميده إنهم ما يقولوا لأحد إنه هو المسيح.

المسيح يخبر عن موته وقيامته

²¹ و من داك الوقت، صار يسوع يقول تلاميده أنه لازم يروح إلى أورشليم، وبيتعدب على إيد القادة ورؤساء الكهنة والكتبة، وينقتل، و في اليوم الثالث بقوم.

²² فقام أخده بطرس على جنب، و قام يلومه، ويقول له: "حاشاك يا سيد أن هالشي يصير لك! "

²³ وطلّع يسوع في بطرس و قال له: " روح عن وجهي يا شيطان! أنت عقبة قدامي، لأن تفكريك مو في أمور الله، لكن في أمور الناس!"

²⁴ و بعدين قال لتلاميده: "إلا يمبى يصير من أتباعي، ينكر نفسه، ويحمل صليبه، ويتبعني.

²⁵ و ألا يمبى يخلص نفسه، يخسرها؛ و لكن إلا يخسر نفسه بسببي، فهو بيحصلها.

²⁶ وش بيسفيد الإنسان لو ربح العالم كله وخسر نفسه؟ أو وش يقدر يقدم الإنسان فداء عن نفسه؟

²⁷ إبن الإنسان بيرجع في مجد أبوه ويا ملائكته، ويجازي كل واحد حسب عمله.

²⁸ بأمانة أقول ليكم: إن بعض الواقفين هني ما بيضوقوا طعم الموت، قبل ما يشوفوا إبن الإنسان جاي في ملكوته."