الإنجيل زي ما كتبه مَتَّى 13 - Qatifi New Arabic Version / الترجمة العربية القطيفية الجديدة

مَثَل الفلاح

¹ و في داك اليوم طلع يسوع من البيت وقعد عند البحر.

² وتجمعوا حواليه ناس واجد، و قام ركب السفينة وقعد عليها، والجماعة كانوا كلهم واقفين على الساحل.

³ وكلمهم في أمور واجد بأمثال، و قال: "في مُزارِع طلع عشان يزرع.

⁴ و لما كان يزرع، طاح شوية حب على الممرات، فجت الطيور وأكلته.

⁵ وشي منَّه طاح على أرض صخرية تربتها رقيقة، وكبر بسرعة لأن تربته ما كانت غزيرة.

⁶ و لما طلعت الشمس، أحترق ويبس لأنه كان ما له أصل.

⁷ وطاح شي من البدور بين الأشواك، ونبت الشوك وخنقه، فما أثمر.

⁸ وبعض الحبوب طاحت على أرض خصبة زينة، فأثمر بعضه مية ضعف، وبعضه ستين ضعف، وبعضه ثلاثين ضعف.

⁹ إلا فيه إداين يسمع!"

¹⁰ و بعدين جو له التلاميد وسألوه: "ليش تكلم وياهم بالأمثال؟"

¹¹ و رد عليهم: "لأن من حقكم أنكم تعرفوا أسرار ملكوت السماوات، لكن غيركم، ما أنعطى ليهم هدا الحق.

¹² وللي عنده، بينعطى أكثر و بيزيد، و ألا ما عنده، بينأخد منَّه."

¹³ عشان چدي أكلمهم بأمثال: لان هم يطلعوا و لكن ما يشوفوا، ويسمعوا و ما يستوعبوا.

¹⁴ وهدا هو الوقت إلا تحققت فيه نبوءة إشعياء لما قال: "سمع تسمعوا ولا تفهموا، ونظر تنظروا و ما تشوفوا."

¹⁵ لأن قلوب هدا الشعب صارت قاسية، وصارت إداينهم ثقيلة ماتسمع، وغمضوا عواينهم؛ عشان ما يشوفوا بعيونهم، ويسمعوا بأداينهم، ويفهموا بقلوبهم، ويرجعوا ليي، وأشفيهم!

¹⁶ و لكن أنتون، هنيئا لعيونكم لأنها تشوف، ولإداينكم لأنها تسمع.

¹⁷ بأمانة أقول ليكم: أنبياء صالحين واجد تمنوا أنهم يشوفوا إلا أنتون قاعدين تشوفوه الحين و لكن ما شافوه، و تمنوا أنهم يسمعوا إلا أنتون قاعدين تسمعوه الحين و لكن ما سمعوه!

¹⁸ وإسمعوا باقول ليكم معنى مَثَل المُزارِع:

¹⁹ كل من يسمع كلمة الملكوت ولا يفهمها، بيجي الشيطان - الشرير ويخطف إلا أنزرع في قلبه: هدا هو قصدي بالمزروع على الطٌرق.

²⁰ و المزروع على أرض صخرية، هو الشخص إلا يسمع الكلمة ويقبلها بفرح على طول،

²¹ و لكن ما يكون ليها أصل في ذاته، عشان چدي تبقى الكلمة لفترة قصيرة: وبمجرد ما يحصل للشخص ضيق أو ظلم بسبب الكلمة، يتعثر.

²² أما المقصود بالمزروع إلا بين الأشواك، فهو إلا يسمع الكلمة، و لكن هموم الزمان إلا جاي وخداع الغنى يخنقوا الكلمة، فما يعطي الشخص ثمر.

²³ وأما المقصود بالمزروع في الأرض الزينة فهو الشخص إلا يسمع الكلمة ويفهمها، و هو إلا يعطي ثمر. فيثمر الواحد ميه، والثاني ستين، وغيره ثلاثين!"

مَثَل الحشيش الغريب

²⁴ و بعدين قال ليهم مَثَل ثاني: "ملكوت السماوات أشبه ما يكون برجال زرع زرع زين في بستانه.

²⁵ و لما كانوا الناس نايمين، جا عدوه، و قام بالسكته زرع حشيش غريب في وسط القمح ومشى.

²⁶ لما نبت القمح وسنابله، نبت الحشيش الغريب وياه.

²⁷ وراحوا عبيد راعي البيت، و قالوا له: يا سيد، مو أنت زرعت في بستانك زرع زين، فمن وين جا هدا الحشيش؟

²⁸ وبيجاوبهم هدا واحد عدو ليي إلا سوى هالشي! و قاموا سألوه: تمبى نروح نقص ونجمع الحشيش؟

²⁹ و رد عليهم: لا، عشان ما تقلعوا القمح بالغلط وانتون تقصوا و تجمعوا الحشيش.

³⁰ أتركوهم أثنينهم ينبتوا ويا بعض لحد ما يجي وقت الحصاد. و في وقت الحصاد، باقول للحصادين: أول شي قصوا وجمعوا الحشيش واربطوه في حزم عشان ينحرق. لكن القمح جمعوه وجيبوه إلى مخزني."

مَثَل حبة الخردل والخميرة

³¹ وضرب ليهم مَثَل ثاني، و قال: "ملكوت السماوات أشبه ما يكون بحبة خردل أخدها رجال وزرعها في بستانه.

³² فمع إنها أصغر البدور كلها، لكنها لما تكبر بتصير من أكبر البقول، و بعدين بتصير شجرة، حتى إن طيور السما بتجي وبتبيت في أغصانها."

³³ وضرب ليهم مَثَل ثاني، و قال: "ملكوت السماوات أشبه ما يكون بخميرة أخدتها مره وخشتها في ثلاثة مقادير من الطحين، عشان تختمر العجينة كلها."

³⁴ و قال يسوع هدي الأمور كلها للناس عن طريق الامثال. و هو ما كان يكلمهم إلا بالأمثال.

³⁵ وتحقق إلا جا دكره على لسان النبي إلا قال: "بفتح بوزي وبقول ليكم أمثال، وبكشف ليكم إلا كان مخفي من بداية ما تكون العالم."

تفسير مَثَل الحشايش الغريبة

³⁶ و بعدين خلى الجماعة يروحوا و هو رجع البيت. و جوا له تلاميده و قالوا له: "وضح لينا تفسيرمثل الحشايش الغريبة في المزرعة."

³⁷ و رد عليهم و قال: "إلا يزرع الزرع الزين هو إبن الإنسان.

³⁸ وألبستان هو العالم، والزرع الزين هم أولاد الملكوت. والحشايش الغريبة هم أولاد الشيطان-الشرير.

³⁹ و العدو إلا زرع الحشيش الغريب فهو إبليس. والحصاد هو نهاية الزمان والحصادين هم الملائكة.

⁴⁰ وزي ما بتتجمّع الحشايش وبتنحرق بالنار، هالجدي بيصير في نهاية الزمان:

⁴¹ إبن الإنسان بيرسل ملائكته، و بيطردوا كل الفاسدين من ملكوته و إلا مايطبقوا الشريعة،

⁴² ويرموهم في أتون النار، هناك بيصير الصياح والحسرة و الآلم.

⁴³ والأبرار بيضوو زي الشمس في ملكوت أبوهم. و إلا فيه إداين يسمع!

مَثَل الكنز ومثل اللؤلؤة

⁴⁴ وملكوت السماوات أشبه ما يكون بكنز مدفون في مزرعة، وحصل عليه رجال، ورجع وخشه. و من فرحته، راح باع كل إلا يملكه واشترى ديك المزرعة.

⁴⁵ وملكوت السماوات أشبه ما يكون بتاجر كان يدورعلى لَّآلِئِ نادرة.

⁴⁶ و لما حصل اللؤلؤة النادرة، راح باع كل مايملك، واشتراها.

مَثَل الشبكة

⁴⁷ و بعد ملكوت السماوات أشبه ما يكون بشبكة أنرمت في البحر، وجمعت سمچ من كل نوع.

⁴⁸ و يوم أنترست سحبوها الصيادين إلى ساحل البحر وقعدوا، و بعدين قاموا يجمعوا السمج الزين في سلال، ورموا الخربان برا.

⁴⁹ وهدا إلا يصير في نهاية الزمان: بيجيوا الملائكة وبيطلعوا الشرانيين من بين الأبرار،

⁵⁰ وبيغلوهم في أتون النار، وهناك بيصير الصياح وحسرة و آلم.

⁵¹ فهمتوا كل هدي الأمور؟" وجاوبوه: "إي نعم!"

⁵² و قال ليهم: " عشان چدي، أي واحد من الكتبة يصير تلميد لملكوت السماوات، بصير أشبهه براعي البيت إلا يطلع من كنزه الجديد و العتيق!"

نبي بلا كرامة

⁵³ و بعد ما خلص يسوع من طرح الأمثال، طلع من هناك.

⁵⁴ و لما رجع قريته، قام يعلّم اليهود في معابدهم، وأستغربوا و قالوا: "من وين له هالحكمة وچيفه دا يسوي كل هالمعاجز؟

⁵⁵ مو هدا هو ولد النجار؟ مو أمه إلا أسمها مريم وأخوته يعقوب ويوسف وسمعان ويهودا؟

⁵⁶ و مو خواته كلهم ويانا؟ فمن وين له كل هدا؟"

⁵⁷ وكانوا يشكوا فيه. و قام قال ليهم: "النبي ما يكون بلا كرامة إلا في قريته وبيته!"

⁵⁸ و ما سوى معجزات واجد هناك، بسبب قلة إيمانهم به.