أعمال 6 - Qatifi New Arabic Version / الترجمة العربية القطيفية الجديدة

أختيار سبعة أنفار لمساعدة الرسل

¹ و لما زاد عدد التلاميد في ديك الأيام، أحتجوا اليهود اليونانيين على العبرانيين، لأن أراملهم ما كانوا يحصلوا على نصيبهم من المعونات اليومية.

² فقرروا الرسل الإطنعش ينادوا جماعة التلاميد و قالوا ليهم: "مايصير نترك كلمة الله عشان نتفرغ لتوزيع المعونات!

³ وأختاروا يا أخوتنا السبعة رجال منكم، معروفين بحسن السيرة وممتلين بالروح القدس والحكمة، وخلونا نعينهم مسؤولين لهالشغلة.

⁴ وأحنا نتفرغ ونظل نداوم على الصلاة وخدمة الكلمة."

⁵ وشافت الجماعة إن هدا الأقتراح عدل؛ وأختاروا إستفانوس و هو رجال ممتلي بالإيمان والروح القدس وفيلبس وبروخورس ونيكانور وتيمون وبرميناس ونيقولاوس الأنطاكي المتهود.

⁶ وجابوهم للرسل، وصلوا وحطوا أياديهم عليهم وباركوهم.

⁷ وزادت كلمة الله وأنتشرت، وزاد عدد التلاميد في أورشليم، وأمنوا مجموعة كبيرة من الكهنة و طاوعوا تعاليم المسيح.

أعتقال إستفانوس

⁸ وإستفانوس كان ممتلي بالنعمة والقوة، و بين الشعب كانت تتحقق على إيده أيات ومعاجز عظيمة.

⁹ وعارضوه مجموعة من معبد العبيد المحررين، وساندوهم جماعة من يهود القيروان والإسكندرية، وناس من منطقة كيليكيا وآسيا وصاروا يحاججوه.

¹⁰ لكنهم عجزوا عن مقاومة حكمته و قوة الروح إلا كان يتكلم به.

¹¹ فقرروا إنهم يعطوا ناس رشوه عشان يقولوا: "سمعنا إستفانوس يتكلم بكلام كفر عن موسى وعن الله!"

¹² وهالتهمة تسببت في أثارة الشعب والقادة والكتبة على إستفانوس، وأعتقلوه وجابوه قدام المجلس،

¹³ وجابوا شهود زور يشهدوا عليه بأنه "دايما يتهجم في كلامه على الهيكل المقدس والتوراة

¹⁴ وسمعناه يقول إن يسوع الناصري بيهدم هدا الهيكل وبغير الأحكام والعادات إلا جتنا من موسى."

¹⁵ و لما طالعوا فيه كل الحاضرين في المجلس شافوا وجهه منور كأنه وجه ملاك.