أعمال 5 - Qatifi New Arabic Version / الترجمة العربية القطيفية الجديدة

حنانيا وسفيرة

¹ و كان في رجال أسمه حنانيا أتفق ويا مرته سفيرة و باع قطعة أرض كان يملكها،

² و خش شوي من فلوس الأرض لنفسه، ومرته كانت عارفه، وجاب إلا بقى من الفلوس وحطها عند رجول الرُسُل.

³ و قال له بطرس: "يا حنانيا، إلاويه تركت الشيطان يملي قلبك وچدبت على الروح القدس، وأحتفظت بشوي من فلوس الأرض لنفسك؟

⁴ مو هو كان بيبقى لك كله، لو ما بعته؟ و بعد ما بعته، مو كان لك الحق أنك تحتفظ بكل قيمته؟ إلاويه نويت الغش في قلبك؟ أنت ما چدبت على الناس، لكن چدبت على الله!"

⁵ وبس سمع حنانيا هدا الكلام طاح على الأرض و مات! و كل إلا دريوا بالسالفة خافوا ماتوا خوف.

⁶ و قاموا بعض الشباب وكفنوا حنانيا، وحملوه إلى مكان ودفنوه.

⁷ و بعد ثلاث ساعات جت زوجة حنانيا وهي ما تدري باللي صار،

⁸ وسألها بطرس: "جاوبيني: بهدا المبلغ بعتوا الأرض؟" وجاوبت: "إي نعم، بهدا المبلغ."

⁹ و قال لها بطرس: "إلاويه أتفقتي ويا رجلش أنكم تمتحنوا روح الرب؟ دكو الشباب إلا دفنوا رجلش وصلوا عند الباب، والحين بيحملوش أنتين بعد!"

¹⁰ فطاحت على الأرض على طول عند رجول بطرس وماتت! و لما دخلوا الشباب شافوها ميته، فحملوا جثتها ودفنوها جنب رجلها.

¹¹ و خافوا الناس كلهم إلا في الكنيسة، و كل من سمع بالخبر.

الرسل يشفوا ناس واجد

¹² وصارت معاجز وآيات واجد بين الشعب على إيد الرسل. وكانوا يتجمعوا كلهم على قلب واحد في قاعة سليمان في الهيكل.

¹³ وما أحد تجرأ من برا يدخل بيناتهم، وكانوا الناس يقدروهم ويحترموهم.

¹⁴ و صار عدد المؤمنين يزيد و أنضموا ناس واجد - رجال ونسوان.

¹⁵ و كانوا الناس يتشيقلوا مرضاهم على منمتهم وأسرتهم إلى الشوارع، على أمل أن لما يمر بطرس يصير ظله على واحد منهم ويتعافى.

¹⁶ و جماعة كبيرة من الناس كانوا يجوا مدينة أورشليم من المدن والقرى القريبة و هم حاملين وياهم المرضى والناس المتعدبين بالأرواح النجسة، وكلهم كانوا يتشافوا من أمراضهم.

تعرض الرسل للاضطهاد

¹⁷ لكن رئيس الكهنة وجماعته من طايفة الصدوقيين أنترست قلوبهم غيرة من الرسل،

¹⁸ وأعتقلوهم و رموهم في السجن العام.

¹⁹ و لكن جا ملاك من الرب في الليل و فتح ليهم بيبان السجن وأطلق سراحهم، و قال ليهم:

²⁰ "روحوا الهيكل، وأوقفوا هناك وأعلنوا للناس كل شي يخص بشارة الحياة الجديدة."

²¹ فطاوعوه وراحوا الهيكل من غبشه في الفجر وبدوا يعلموا. و رئيس الكهنة وجماعته عقدوا أجتماع لأعضاء المجلس، وكانوا قاده إسرائيل كلهم حاضرين، وأمروا أنهم يجبوا الرسل من السجن،

²² لكن الحرس ما حصلوهم! ورجعوا و علموهم بالسالفة

²³ و قالوا: "شفنا بيبان السجن مسكرة عدل، والحراس واقفين قدامها، و لكن لما فتحناها ما حصلنا أحد داخل!"

²⁴ و لما سمع رئيس حرس الهيكل ورؤساء الكهنة هالكلام أحتاروا وأستغربوا و قاموا يسألوا روحهم: "مايندرى وين بتودينا هالسالفه؟"

²⁵ بعدين جا رجال المجلس و قال: "دكو الرجال إلا أعتقلتوهم وحطيتوهم في السجن الحين واقفين في الهيكل يعلموا الناس."

²⁶ و راح رئيس الحرس و رجاله وجابوا الرسل من دون عنف، لأنهم كانوا خايفين من الشعب يرجموهم.

²⁷ و لما جابوهم قدام المجلس قام يحقق وياهم رئيس الكهنة

²⁸ و قال: "حذرناكم إنكم ما تعلموا بهدا الإسم، لكنكم مليتوا أورشليم بتعاليمكم دي، وتمبوا تحملونا بعد مسؤولية سفك دمه!"

²⁹ و رد عليهم بطرس والرسل و قالوا: "الله هو إلا لازم نطيعه مو الناس!

³⁰ إله أجدادنا رفع يسوع، إلا قتلتوه أنتون وعلقتوه على حطبة!

³¹ و لكن الله رفعه إلى يمينه وخلاه رئيس ومخلص عشان يوهب إسرائيل التوبة وغفران الخطايا؛

³² وأحنا كنا الشاهدين على هالشي، والروح القدس بعد يشهد على هالشي، و هو نفسه الروح اللي وهبه الله للناس إلا يطاوعوه."

³³ و لما سمعوا المجتمعين هدا الكلام عصبوا حدهم، و قرروا أنهم يقتلوا الرسل و يرتاحوا.

³⁴ و كان في واحد من أعضاء المجلس-كان معلم للتوراة و يتبع المدهب الفريسي، و كل الناس كانت تحترمه - كان أسمه غَمَالَائِيلُ - قام وقف و أمر إن يطلعوا الرسل برا لفترة بسيطة،

³⁵ و بعدين قال للمجتمعين: "يا بني إسرائيل، أحدروا من تنفيد إلا ناوين تسووه في هالرجال.

³⁶ بس من فترة بسيطة أدعى ثُودَاسُ إنه واحد عظيم، وتبعوه أربعة آلاف شخص، و بعد ما أنقتل تفرقوا أتباعه، وأنتهى أمره.

³⁷ بعدين جا يهودا الجليلي في زمن الإحصاء وتبعوه ناس واجد، و لكنه هو بعد مات وتشتتوا أتباعه.

³⁸ و أنا الحين أنصحكم إنكم ما تقربوا من هديلا الرجال و تتركوهم في حال سبيلهم. فإدا كان هدا المدهب أو العمل من عند الناس فهو بينتهي بالفشل،

³⁹ و لكن إدا كان من عند الله فما بتقدروا أبدا أنكن توقفوا في وجهه، و إلا أنتون بتصيروا أعداء لله بعد."

⁴⁰ وأعتمدوا أعضاء المجلس نصيحته، و أستدعوا الرسل، و جلدوهم و أمروهم إنهم ما يعلموا الناس بإسم يسوع، و بعدين هدوهم.

⁴¹ و لكن الرسل طلعوا من المجلس فرحانين، لأنهم أعتبروهم يستحقوا الإهانة بسبب أسم يسوع.

⁴² و كانوا كل يوم في الهيكل و في البيوت، يعلموا ويبشروا بالمسيح يسوع من دون تعب أو ملل.