أعمال 4 - Qatifi New Arabic Version / الترجمة العربية القطيفية الجديدة

بطرس ويوحنا في المجلس

¹ و لما كان بطرس ويوحنا يخطبوا في الحاضرين، جوهم الكهنة، ورئيس حرس الهيكل والصدوقيين،

² متضايقين لأنهم كانوا يعلموا الناس ويقولوا أن قيامة الأموات حقيقية و تأكدها قيامة يسوع،

³ فمسكوهم و رموهم في السجن إلى اليوم إلا بعده، لأن جا الليل.

⁴ و واجد من إلا سمعوا الكلمة آمنوا وصار عدد المؤمنين من الرجال في حدود الخمسة آلاف.

⁵ واليوم إلا بعده أجتمع في أورشليم رؤساء اليهود والقادة والكتبة،

⁶ و كان وياهم حَنَّانُ رئيس الكهنة وقيافا و يوحنا والإسكندر و كل الناس من عشيرة رؤساء الكهنة.

⁷ وجابوا بطرس ويوحنا وسألوهم: "بأي قوة، وبإسم من سويتوا هالشي؟"

⁸ وأمتلا بطرس من الروح القدس وجاوبهم: "يا رؤساء الشعب وقادته،

⁹ إدا كنتوا اليوم قاعدين تحققوا ويانا بسبب فعل الخير إلي سويناه إلى أنسان مريض عشان تعرفوا كيف تشافى،

¹⁰ فلازم تعرفوا كلكم، وخل شعب إسرائيل كله يعرف، إنه بإسم يسوع المسيح الناصري إلا أنتون صلبتوه، و ألا الله قومه من بين الأموات، بإسمه وقف هدا إلي مايمشي قدامكم في كامل صحته!

¹¹ يسوع هو الحجر إلا رفضتوه يا البنايين، و هو نفسه صار حجر الزاوية الأساس،

¹² و الخلاص ما يكون بواحد غيره، لأن ما في تحت السما أسم ثاني الله عطاه للبشر يمكن يتم به الخلاص!"

¹³ وأستغربوا المجتمعين من شجاعة بطرس و يوحنا، لأنهم كانوا يدروا إنهم ما كانوا متعلمين وإنهم من عامة الناس، فعرفوا إنهم كانوا ويا يسوع.

¹⁴ و لما شافوا الرجال المتكسح إلا تشافى واقف وياهم، ما حصلوا شي ضدهم!

¹⁵ وأمروهم أن يطلعوا من المجلس، عشان يتشاوروا بينهم وبين بعض.

¹⁶ و قالوا: "وش نسوي في هالرجالين؟ لأن كل أهل أورشليم أكتشفوا إن معجزة عظيمة تحققت على إيدهم، و ما نقدر ننكر هالشي!

¹⁷ و عشان السالفة ما تزيد وتنتشر بين الناس، خلونا نهددهم بأن ما يذكروا هالإسم لأحد من الناس بعد هالمرة."

¹⁸ بعدين جابوهم وأمروهم أنهم ما ينطقوا بإسم يسوع ولا يقولوا للناس عنه.

¹⁹ لكن بطرس ويوحنا قالوا: "أنتون أحكموا: چى بعد عدل الحين في نظر الله أن نطاوع أمركم ونعصي أمر الله؟

²⁰ ما نقدر نوقف عن الكلام باللي شفناه وسمعناه."

²¹ و زاد المجلس من تحديره وإنداره ليهم، ولكنه ما حصلوا طريقة يعاقبوهم بها، وأمر أن يفرجوا عنهم لأنهم خافوا من ثورة الناس عليهم، لأن الناس كلها كانت تمجد الله على ديك المعجزة.

²² لأنه الرجال إلا تشافى وصارت له هدي المعجزة عمره طاف الأربعين سنة.

صلاة المؤمنين

²³ وبس أفرجوا عن بطرس ويوحنا رجعوا إلى أصحابهم، و قالوا ليهم بكل إلا قاله ليهم رؤساء الكهنة والقادة،

²⁴ و قاموا توجهوا إلى الله بقلب واحد ودعوه و قالوا: "يا رب، يا خالق السما والأرض والبحر و كل إلا فيهم،

²⁵ يا من قلت بالروح القدس على لسان عبدك داوُد: إلاويه ضجت الشعوب؟ و إلاويه تآمرت الشعوب على الباطل؟

²⁶ أجتمع ملوك الأرض و رؤساءها، وتحالفوا عشان يقاوموا الرب ومسيحه!

²⁷ وهدي الكلمات صارت وتحققت بالضبط، لأن هيرودُس تحالف ويا بيلاطس البنطي والوثنيين وأسباط إسرائيل عشان يقاوموا خادمك القدوس يسوع إلا خليته مسيح،

²⁸ و سووا كل شي كتبته إيدك من الأزل وكانت مشيئتك أنه يكون

²⁹ والحين يا رب شوف تهديدهم لينا، و أوهبنا أحنا عبيدك القدرة على إعلان كلامك بكل شجاعة.

³⁰ ومد إيدك للشفاء، عشان تتحقق المعاجز والآيات بإسم خادمك القدوس يسوع."

³¹ و لما كانوا يصلوا أرتج المكان إلا كانوا مجتمعين فيه، وأمتلوا بالروح القدس، و قاموا ينشروا كلمة الله بكل شجاعة!

المؤمنين يتشاركوا في أملاكهم

³² وكانت جماعة المؤمنين على قلب واحد و روح وحدة، و ما كان أحد فيهم يفكر إن أي شي يملكه هو له وحده، لكن كان كل شي عندهم مشترك.

³³ و بقوة عظيمة تلازمهم كانوا الرسل يشهدوا بقيامة الرب يسوع، و نعمة عظيمة حلت عليهم كلهم.

³⁴ و ما كان بينهم محتاج، لأن كل واحد فيهم يملك مزرعة أو بيت كان يبيعه ويجيب ثمنه،

³⁵ ويحطوه عند رجول الرسل، و هم يوزعوه على كل محتاج كل على حسب حاجته.

³⁶ و من بين هالناس كان يوسف، إلا سموه الرسل برنابا يعني إبن التشجيع، و هو من سبط لاوي، وجنسيته قبرصي.

³⁷ لأنه كان يملك مزرعة، و قام باعها و جاب ثمنها وحطه عند رجول الرسل!