أعمال 3 - Qatifi New Arabic Version / الترجمة العربية القطيفية الجديدة

بطرس يشافي واحد مكسح

¹ و في مره كانوا بطرس ويوحنا رايحين الهيكل الساعه ثلاث العصر عشان يصلوا.

² وعند باب الهيكل - المعروف بالباب الجميل- كان هناك رجال مكسح يقعد هناك وهدا هو حاله من يوم نولد، والناس تحمله كل يوم ويخلوه هناك يطلب صدقة من إلا داخلين الهيكل.

³ و لما شاف بطرس ويوحنا داخلين، طلب منهم صدقة،

⁴ فطالعوا فيه فتره طويله، و قال له بطرس: "طالع فينا!"

⁵ وظل يطلع فيهم، و هو منتظرهم يتصدقوا عليه بشي.

⁶ و قال له بطرس: "ما عندي لا فضة ولا دهب، و لكن بعطيك إلا عندي: بإسم يسوع المسيح الناصري قوم و أمشي!"

⁷ ومسكه بإيده اليمين و قومه، وراحت القوة على طول في رجوله وكعبه،

⁸ ووقف و قام ينط وبدأ يمشي، ودخل وياهم الهيكل و هو يمشي ويتنطط فرحان ويسبح الله.

⁹ وشافوه الحاضرين يمشي ويسبح الله،

¹⁰ وعرفوا إن هو الفقير إلا كان يطلب الصدقات و كان متعود يقعد عند الباب الجميل، وأستغربوا و أحتاروا من إلا صار له!

موعظة بطرس في الهيكل

¹¹ و لما كان في صالة الهيكل المعروف بصالة سليمان و هو بجنب بطرس ويوحنا، جو له ناس واجد يركضوا له وأجتمعوا حوله مستغربين،

¹² و قال ليهم بطرس لما شاف هالشي: "يا بني إسرائيل، إلاويه تتعجبوا من إلا صار، وإلاويه قاعدين تطالعوا فينا وكأنه صار هالشي بقدرتنا أو لأنا تقيين خلينا هالرجال يمشي؟

¹³ إله إبراهيم وإسحاق ويعقوب، إله أجدادنا، مجَّد خادمه يسوع، إلا سلمتوه أنتون للموت ونكرتوه عند بيلاطس، يوم كان يمبى يحرره.

¹⁴ أنتون أنكرتوا القدوس البار وطلبتوا العفو عن رجال قاتل

¹⁵ وقتلتوا واهب الحياة. و لكن الله قومه من بين الأموات وأحنا شهود على هالشي.

¹⁶ وبفضل الإيمان بإسمه، هدا الرجال إلا تشوفوه وتعرفوه رجَّع القوة لإسمه. لأن الإيمان بيسوع هو إلا عطاه هدي الصحة الكاملة وأنتون كنتوا كلكم شاهدين على هالشي.

¹⁷ أنا أعرف يا أخوه أنكم و رؤسائكم تعاملتوا ويا المسيح بجهل،

¹⁸ و لكن الله تمم إلا أوحى به إلى كل أنبياءه من أن المسيح بيقاسي الآلام.

¹⁹ فتوبوا وأرجعوا عشان الله يمحي خطاياكم،

²⁰ وتجيكم أيام الفرج من عند الرب، عشان يرسل ليكم يسوع المسيح مرة ثانية، و هو إلا سبق وعينه ليكم،

²¹ لأن المسيح لازم يبقى في السما إلين يجي الزمن إلا يصير يتم فيه أسترجاع وأعاده كل شي زي ما أوحى الله إلى أنبيائه التقيين من زمان.

²² و موسى قال: الرب إلهكم بيبعث ليكم من بين أخوتكم نبي زيي، أسمعوا له في كل شي يكلمكم به.

²³ و ألا ما يسمع له بيستاصل من وسط الشعب.

²⁴ و تنبأ بهدي الأزمنة كل الأنبياء، أبتدا من صموئيل إلى إلا جَو بعده.

²⁵ وأنتون يا أحفاد الأنبياء، وأولاد العهد إلا عقده الله لأجدادنا لما قال لإبراهيم: من نسلك بتحصل كل شعوب الأرض على البركة.

²⁶ عشانكم الله أرسل خادمه يسوع أول شي ليكم، عشان يبارككم و يخلي كل واحد منكم يتوب عن شره."