أعمال 27 - Qatifi New Arabic Version / الترجمة العربية القطيفية الجديدة

بولس يسافر بالبحر إلى روما

¹ وآخر شي لما تحدد إن نسافر إلى إيطاليا بالبحر، وصارت مسؤولية حراسة بولس وباقي المساجين على قائد مية أسمه يوليوس من كتيبة القيصر.

² وركبنا سفينة جاية من أدراميت ورايحة إلى الموانئ في منطقة آسيا. و كان ويانا في هدي الرحلة أرسترخس من مدينة تَسَالُونِيكِي في منطقة مقدونية.

³ و في اليوم إلا بعده وصلنا إلى صيدا. وكانت معاملة يوليوس لبولس معاملة طيبة سمح لبولس يزور أصحابه في صيدا عشان يجيبوا له إلا يحتاجه.

⁴ وأبحرنا من ميناء صيدا، وسافرنا على طول سواحل قبرص، لأن الريح كانت عكس أتجاه سيرنا.

⁵ وعبرنا البحر القريب من مناطق كِيلِيكِيَّةَ وَبَمْفِيلِيَّةَ، ووصلنا إلى ميناء ميرا في منطقة ليكية.

⁶ وهناك شاف قائد المية سفينة جاية من الإسكندرية ورايحة إلى إيطاليا، وركبنا فيها.

⁷ وسافرت السفينة على مهل لمدة كم يوم، و قربنا من ساحل كِنِيدُس بطلعة الروح، و لكن الريح منعتنا من أن ندخل المينا و ما قدرنا ننزل هناك، وسافرنا قريب من ساحل جزيرة كريت، ومرينا قريب من منطقة أسمها راس سلموني.

⁸ وبصعوبة وصلنا إلى مكان يسموه المواني الجميلة قريب من مدينة لَسَائِيَةَ.

⁹ ومرت فتره طويلة، إلين خلص الصيف وخلص وقت الصوم وصار وقتها السفر في البحر خطير واجد، ونصح بولس بحارة السفينة

¹⁰ و قال: "أشوف يا أخوتي أنا برأي أن سفرنا الحين خطر وخسارة كبيرة، مو بس على السفينة وحمولتها، بس لكن على حياتنا بعد."

¹¹ لكن قائد المية كان مقتنع بكلام ربان السفينة وصاحبها، مو بكلام بولس.

¹² ولأن المينا ما كان يصلح تكون فيه سفينة فيه في موسم الشتا، و قرروا أغلب البحارين يطلعوا منه، وكانوا متأملين أن يوصلوا إلى ميناء فينكس عشان يقضوا فيه موسم الشتا، و كان هدا المينا في كريت يواجه الجنوب الغربي والشمال الغربي.

العاصفة

¹³ وهبت ريح خفيفة من الجنوب، ففكروا البحارة إنها بتدفعهم إلى جهة فينكس، ورفعوا المرسى وأبحروا قريب من ساحل كريت.

¹⁴ و لكن عاصفة معروفة بإسم الشمالية الشرقية هبت بعد شوي،

¹⁵ وأندفت السفينة و ما قدرت تقاوم الريح، وأستسلمنا. ودزتنا العاصفة

¹⁶ إلى مكان قريب من جزيرة صغيرة أسمها كودا. وبطلعة الروح قدرنا نرفع و نحط قارب النجاة في ظهر السفينة.

¹⁷ و بعدين بسرعة البحارة سووا كل الإحتياطات الضرورية، وشدوا وسط السفينة بالحبال. ولأنهم خافوا من أنهم ينجرفوا إلى سواحل إلا على سواحل الليبية، وفيها رمال خطيرة، نزلوا الأشرعة و الحبال، وصارت الريح تدف السفينة.

¹⁸ و في اليوم إلا بعده أشتدت علينا العاصفة، و قاموا يرموا أغراض في البحر عشان يخففوا من حمولة السفينة.

¹⁹ و في اليوم الثالث تخلّصوا من عده السفينة ورموهم في البحر بأياديهم.

²⁰ وكانت العاصفة تصير أقوى يوم ورا يوم، لدرجة إنا ما شفنا الشمس ولا النجوم لمدة أيام، وأنقطع أملنا من إن نعيش.

²¹ وكانوا المسافرين وقفوا مدة طويلة عن الأكل، وجاهم بولس و قال ليهم: "كان لازم تسمعوا كلامي يا أخوه و ما تبحروا من كريت، عشان تسلموا من هالخطر وهالخسارة.

²² ولكني الحين أمبى أطمنكم، ما في أحد منكم بيموت. و لكن السفينة بتتكسر.

²³ لأن ملاك من عند الله إلا أنا له وأخدمه، ظهر ليي هالليلة،

²⁴ و قال ليي: لا تخاف يا بولس! أنت لازم تروح قدام القيصر. والله عطاك حياة و كل إلا مسافرين وياك!

²⁵ فأتطمنوا يا أخوه، لأني مؤمن بالله وبأن إلا قاله ليي بيتم.

²⁶ و لكن هدي السفينة لازم تتوقف و إلا بتضرب وبتصقع في وحدة من الجزر."

جنوح السفينة

²⁷ و في نص الليل في يوم الأرباطعش، والريح تدفنا في بحر أدريا إلى مكان ما ندري وش هو، فكروا البحارة إنهم قربوا من البر.

²⁸ وقاسوا غزارة الماي وشافوه أربعين متر. و بعد شوي قاسوا غزارة الماي وشافوه ثلاثين متر.

²⁹ وخافوا إن السفنية تضرب الحجارة، ورموا من وراها أربع مراسي، وقعدوا ينتظروا جية الصبح.

³⁰ وحاول البحارة يهربوا من السفينة، ونزلوا قارب النجاة وسوا نفسهم يمبوا يرموا المراسي من قدام السفينة.

³¹ و قال بولس لقائد المية والجنود: "إدا ما بقوا ديلين البحارين في السفينة، فما بتنجوا."

³² فقطعوا الجنود حبال قارب النجاة، وتركوه يطيح في الماي.

³³ و لما قرب الصبح، طلب بولس من الكل ياكلوا، و قال: "مر عليكم أرباطعش يوم وأنتون ما أكلتوا شي،

³⁴ فأكلوا ليكم لقمة، لأن هدا بساعدكم على النجاة. لاتخافوا ما أحد منكم بيخسر شعرة من راسه."

³⁵ بعدين أخد قرص خبز، وشكر الله قدام الكل، وقسمه وأبتدا ياكل،

³⁶ فتطمنوا كلهم وأكلوا.

³⁷ و كان ويانا في السفينة ميتين وستة وسبعين شخص.

³⁸ وبعدما شبعوا رموا القمح في البحر عشان تخف حمولة السفينة.

³⁹ و لما جا النهار، عجزوا البحارة يميزوا المكان، ولكنهم شافوا خليج له ساحل فقرروا أن يدفوا السفينة له، إدا قدروا،

⁴⁰ و قاموا قصوا المراسي وتركوها تغرق، وفلوا الحبال إلا المربوط في سكان السفينة، ورفعوا الشراع إلي قدام الريح، وتوجهوا للساحل.

⁴¹ و لكن السفينة وصلت إلى مكان فيه مرتفع رملي والماي فيه قليل بين تيارين، و وقفوا السفينة عند الرمل إلا تحت الماي، وغرزت السفينة من قدام و صارت ما تتحرك، وصارت مؤخرة السفينه تتفكك من قوة الأمواج.

⁴² وفكروا الجنود إنهم يقتلوا المساجين عشان ما يسبح أحد منهم إلى الساحل ويهرب،

⁴³ و لكن قائد المية كان يمبى ينقد حياة بولس، فمنع جنوده من أن ينفدوا هدي الفكرة، وأمر إلا يقدروا يسبحوا أنهم يتقدموا و يسبحوا إلى الساحل قبل غيرهم،

⁴⁴ والباقي منهم يحاول يوصل له على الواح خشب السفينة، أو على قطع السفينة المكسرة. وچدي وصل الكل إلى البر سالمين.